ԵՐԵՒԱՆ, «Արմէնփրէս».- ՀՀ Ազգային ժողովի բոլոր խմբակցութիւններն ու խումբերը երէկ հրապարակեցին «Ակօս» շաբաթաթերի գլխաւոր խմբագիր Հրանդ Տինքի սպանութիւնը դատապարտող միացեալ յայտարարութիւն:
«ՀՀ Ազգային ժողովը խստօրէն դատապարտում է «Ակօս» շաբաթաթերի գլխաւոր խմբագիր Հրանդ Տինքի նենգ սպանութիւնը եւ այդ յանցագործութիւնը գնահատում է որպէս խօսքի ազատութեան, մարդու իրաւունքների եւ հայկական փոքրամասնութեան ներկայացուցչի դէմ կատարուած ոճրագործութիւն:
«ՀՀ Ազգային ժողովն արձանագրում է, որ Թուրքիայի ազգայնամոլական շրջանակների կողմից ծրագրուած անմարդկային այդ ոճիրը խոր արմատներ է գցել հայատեացութեան, հակահայկական քարոզչութեան տարածման հետեւանքով:
«Թուրքիայի իշխանութիւնների մակարդակով սեփական պատմութեան ուրացման, 1915 թուականի Հայոց Ցեղասպանութեան հերքման ուղղութեամբ տարուող լայնածաւալ քարոզչութեան, ինչպէս նաեւ հարցի արծարծման համար բազմաթիւ մտաւորականների նկատմամբ քրէական հետապնդումների սանձազերծումն ազգայնական շրջանակների ուղեղում ծնեց նման ոճրագործ արարքով ազատութեան ձայնը լռեցնելու ցանկութիւն:
«Միաժամանակ՝ մեր մտահոգութիւնն ենք արտայայտում այս վայրագ յանցագործութեան առնչութեամբ Թուրքիայում նկատուող վերջին դրսեւորումների վերաբերեալ:
«Տինքի սպանութիւնից յետոյ հասարակական ընդվզմանն այսօր արդէն սկսում է փոխարինել հակառակ միտումը՝ նորից գլուխ է բարձրացնում թուրք ազգայնամոլութիւնը, այլատեացութիւնը, յանցագործի հերոսացումը եւ որպէս հետեւանք նոր թափ են ստանում սպառնալիքները ինչպէս Հրանդ Տինքի խմբագրած թերթի, ազատ մտածողութիւն ունեցող անձանց, այնպէս էլ հայ հաւաքականութեան հասցէին:
«Մտահոգիչ են եւ խորքային քննութեան առիթ են տալիս այն բացայայտումները, ըստ որոնց, իրաւապահները նախապէս տեղեակ են եղել եւ չեն փորձել կանխել կազմակերպուող մահափորձը: Այսօր կենսական պահանջ է դառնում յանցագործութեան ամբողջական, այդ թւում պատուիրատուների, բացայայտման անհրաժեշտութիւնը:
«Ազգային ժողովն արձանագրում է. այս սպանութիւնը եւս մէկ անգամ փաստեց այն իրողութիւնը, որ երկու ժողովուրդների փոխվստահութեան մթնոլորտի ստեղծման համար հրատապ է դառնում Թուրքիայի իշխանութիւնների կողմից սեփական պատմութեան հետ հաշտուելու եւ 1915 թուականի Հայոց Ցեղասպանութեան փաստը ճանաչելու, ինչպէս նաեւ ազատ խօսքը ոտնահարող եւ նմանատիպ դրսեւորումները հնարաւոր դարձնող քրէական օրէնսգրքի 301րդ յօդուածը վերացնելու միջազգային հանրութեան պահանջի կատարումը», կ’ըսուի յայտարարութեան մէջ: