Ըստ Հ.Յ.Դ. Բիւրոյի ներկայացուցիչ Հրանդ Մարգարեանի, յառաջիկայում ընտրութիւնը կատարուելու է այս չորս երեւոյթների շուրջ:
ՀԱՐՑՈՒՄ.- Տարեվերջին դուք շեշտեցիք, որ սա Դաշնակցութեան կառավարութիւնը չէ, քանի որ դուք չունէք նրանում ամբողջական պատասխանատուութիւն, սրանից նախընտրական հոտ է գալիս. արդեօ՞ք այս յայտարարութեամբ դուք չէք ուզում ասել, որ այս կառավարութեան վատ աշխատանքի մեղքը չգցեն Դաշնակցութեան վրայ:
ՊԱՏԱՍԽԱՆ.- Հարցը պատասխանատուութիւնից խուսափելը չէ եւ ոչ էլ անցեալի համար զղջում ենք: Մենք 11 տոկոս վստահութեան քուէ ենք ունեցել, այդ չափով մասնակից ենք եղել կառավարութեանը, դա մեր իշխանութիւնը չի եղել, եւ այս առումով դա պէտք է շատ բնական ընդունել: Եթէ սա մեր իշխանութիւնը լինէր, պէտք է յստակօրէն տարբերուէր առաջին հերթին տնտեսական քաղաքականութեամբ՝ այն պէտք է ունենար շեշտուած ընկերային ուղղութիւն, երկրորդ՝ հասարակական փոխյարաբերութիւնները պէտք է արդարութեան եւ անաչառութեան վրայ հիմնուած լինէին. մենք հաւատում ենք, որ իշխանութիւնները պէտք է հոգատար լինեն ժողովրդի նկատմամբ, ժողովուրդը պէտք է զգայ, որ իշխանութիւնները իր համար մտահոգ են: Իսկ սա մեր իշխանութիւնը չէր, եւ դրա մէջ վատ բան չպէտք է տեսնել, ես չեմ ուզում դրանով մեղք վերագրել որեւէ մէկին կամ պախարակել:
Հ.- Այնուամենայնիւ, նախընտրական շրջան է, եւ արդէն ձեր այդ յայտարարութիւնից ակնյայտ է, որ խորհրդարանական ընտրութիւնների քարոզարշաւի ընթացքում Դաշնակցութիւնը ընտրողներին անընդհատ ասելու է, որ սա իր կառավարութիւնը չէր եւ սխալների համար պէտք է դատել ուրիշներին եւ ոչ թէ Դաշնակցութեանը:
Պ.- Ոչ, սխալները՝ նոյնիսկ եթէ իշխանութեան մէջ չլինէինք, մերն են, որովհետեւ այս երկրի քաղաքական ղեկավարութիւնը բաղկացած է բոլորից. եթէ մենք սխալի առաջը չենք կարողանում առնել, դա եւս մեղաւորութիւն է: Այսինքն՝ դա պատասխանատուութիւնից խուսափել չէ: Մենք ուզում ենք գալ իշխանութեան, մեր ծրագրով, մեր շնչով, մեր մշակոյթով եւ, բնականաբար, պէտք է բացատրենք, որ դա մերը չէր, մերը պէտք է լինի այն, ինչ մենք կը ստեղծենք 2007ի Մայիսին, երբ կ’ունենանք ժողովրդի համապատասխան քուէն:
Հ.- Դուք հնարաւոր համարո՞ւմ էք, որ Հ.Յ.Դ.ն կարող է ամբողջութեամբ վերցնել իշխանութիւնը:
Պ.- Հնարաւոր համարում եմ, բայց չեմ ուզում ընկնել երեւակայութեան գիրկը եւ մեծախօսութիւն անել, քանի որ ընտրութիւնների մեքանիզմը Հայաստանի մէջ բաւարար չափով քաղաքականացուած չէ: Առանց որեւէ մէկին վիրաւորել ցանկանալու, ասեմ, որ յառաջիկային ընտրութիւնը կատարուելու է չորս բանի միջեւ՝ հայհոյանքի, ֆինանսների, լծակների եւ ծրագրերի: Մենք ունենք ծրագիր, ունենք համապատասխան քատրեր եւ, ամէնից կարեւորը, ունենք կամք՝ մեր ծրագիրը իրականացնելու համար: Ունենք կուսակցական կարգապահութիւն՝ մեր ծրագիրը նպատակային դարձնելու եւ յաջողեցնելու համար: Այս առումով կարծում եմ, որ ժողովրդի ընտրութիւնը դէպի մեզ պէտք է լինի, բայց նաեւ հասկանում եմ, որ այս պայմաններում, այս յուսահատական վիճակի մէջ, երբ ժողովուրդը ունի ֆինանսական լուրջ դժուարութիւններ, հոգեբանական խնդիրներ, անապահովութեան զգացում, յաճախ ժամանակաւոր ուժեղ մարդու հովանաւորութիւնը, հայհոյանքը (որ սիրտ է թեթեւացնում) կարող է նախընտրել ծրագրից: Բայց մենք կ’ունենանք մեր ժողովրդի համոզուած, գիտակից եւ քաղաքականացուած շերտի քուէն:
Հ.- Դաշնակցութեան համար վիրաւորական չէ՞ր, որ մի քանի անգամ նուիրուեցիք Ռոպերթ Քոչարեանին, սատարեցիք նրան, բայց նա իր համար մի նոր կուսակցութիւն ստեղծեց, որին այսօր յենւում է, եւ նոյնիսկ թուարկած չորս կուսակցութիւնների մէջ Դաշնակցութեան անունը անգամ երկրորդը չէր, այլ՝ երրորդը կամ չորրորդը: ԲՀԿի ստեղծումը արդեօք հէնց ձեզ համար վիրաւորական չէ՞ր, ինչո՞ւ ձեր նախագահը չյենուեց ամբողջութեամբ Դաշնակցութեան վրայ:
Պ.- Կարծում եմ, հարցերի պատասխանները չպէտք է այդքան պարզեցնել, որպէսզի կարելի լինի ճիշդ պատասխանները գտնել: Նախ, ինչի՞ համար են այդ հիմքերը ձեւաւորուել, ի՞նչ անելու համար. կարծում եմ, այդ միջոցով ստացուածը, առանց խօսքս որեւէ կուսակցութեան ուղղորդելու, այն էժան քուէն է, որ պէտք է ձեռք բերեն նրանք, եւ ոչ այն քուէն, որ Դաշնակցութեանն է: Դաշնակցութիւնը գիտակից, համոզումով տրուած քուէն է ձեռք բերում: Բնականաբար, Դաշնակցութիւնը թռիչքային առումով, այսինքն՝ քուէների մեծ, ճոխութեան իմաստով, կուսակցութիւն չի, մենք նախընտրում ենք 8ը սարքել 11, 11ը՝ 20, եւ այդպէս շարունակ:
Հ.- Այսինքն՝ դուք փուլային զարգացման կողմնակից էք:
Պ.- Ոչ թէ փուլային, այլ՝ տրամաբանական զարգացման, կեղծ զարգացման կողմնակից չենք, մենք հաւատում ենք, որ մեր ներկայութիւնը ԱԺում պէտք է համապատասխանի մեր իրական ուժին, այդ իրական ուժը մեր գաղափարական ժողովրդականութիւնն է:
Հ.- ԳՄ ընդհանուր ժողովի որոշումը՝ բաւարար քուէներ չստանալու դէպքում դառնալ ընդդիմութիւն, ձեր կոալիցիոն գործընկերների կողմից կարծես լուրջ չի ընդունւում, վարչապետը այդ մասին իմ հարցին ի պատասխան ասաց, որ Դաշնակցութիւնը այդ կարգի յայտարարութիւն արդէն եօթ տարի շարունակ անում է: Եւ յետոյ, եթէ իրօք դուք ընդդիմութիւն դառնաք, պատկերացնո՞ւմ էք ձեզ ՀՀՇի, «Այլընտրանքի», «Քաղաքացիական անհնազանդութեան», «Հակաքրիմինալի» եւ միւսների կողքին:
Պ.- Ընդդիմադիր դաշտում մենք կարող ենք ունենալ մեր ինքնուրոյնութիւնը, ինչպէս իշխանութեան մէջ ենք ունեցել, դա մեզ չի վախեցնում, ես հաւատում եմ, որ Դաշնակցութիւնը կարող է բոլորի համար ճիշդ օրինակ դառնալ: Թէպէտ որոշների համար եօթ տարին էլ բաւարար չեղաւ մեզ ճիշդ հասկանալու, ինչ մնաց՝ օրինակներ վերցնելու եւ դարձի գալու։
Հ.- Սակայն այսօր արդէն պարզ է, որ իշխանական ուժերը ներսում միմեանց տանել չեն կարողանում եւ փոխադարձ վիրաւորանքներ եւս հնչում են, մասնաւորապէս՝ Ալվարդ Պետրոսեանը յիշեցրեց, որ ոմանց գետնախնձոր բաժանելու գործողութիւնները իրեն ստիպեցին մտածել «ընկերային տարուինիզմի» մասին: Ինչպէ՞ս էք իրար հետ մրցելու, չէ՞ որ իրարից էք ձայներ խլելու:
Պ.- Ալվարդ Պետրոսեանը վաւերական մտաւորական է եւ ունի ազատութիւն՝ արտայայտուելու, եւ նրա իրաւունքը ոչ մէկը չի փորձում խլել: Մենք ոչ մի անգամ չենք փորձել եւ չենք էլ փորձելու որեւէ մէկին վիրաւորել, մրցակցութիւնը առճակատում չէ, պայքարը մեր ծրագրերը ներկայացնելու, մեր տարբերութիւնները ցոյց տալու մէջ պէտք է լինի, իսկ սա պատճառ չէ, որ մէկը միւսին վիրաւորի, ի հարկէ, լինում են մարդիկ, որ այդ ձեւերին դիմում են, բայց, կարծում եմ, դա մեզ սազական չի եւ մենք դա չենք անի:
Հ.- Ձեր բոլոր գործընկերները արդէն անցած տարուանից կաշառում են ժողովրդին՝ նուէրներ, գետնախնձոր, Նոր տարուայ տոպրակներ են բաժանում, դուք չէք կարող, չէ՞, պնդել, որ Դաշնակցութիւնը այդ կարգի բաներ չի անելու:
Պ.- Պատկերացրու, կարող եմ պնդել, որովհետեւ մենք այդ միջոցները չունենք:
Հ.- Ինչո՞ւ չունէք, ունէք չորս նախարար, մարզպետներ, փոխնախարարներ, վարչութիւնների պետեր, այսինքն՝ գործադիրում լաւ էլ ներկայացուած էք:
Պ.- Այո, բայց մենք աշխատանքով ենք փորձում մեր տեղը վաստակել մեր ժողովրդի մէջ, մեր գումարները ժողովրդից ձեռք բերուած հնարաւորութիւններ են, որի համար մենք մեծ ճիգ ու ջանք ենք գործադրում, չաշխատած գումարներ չունենք, որ բաժանենք, եւ առեւտրի էլ չենք ելել մեր ժողովրդի հետ, որ այսօր մէկը տանք, վաղը երկուսը խլենք, ոչ էլ բարեգործական կազմակերպութիւն ենք: Բարեգործութիւնը շատ լաւ բան է, բայց՝ բարեգործական կազմակերպութիւնների համար: Իսկ մենք քարոզչութեան գործի վրայ ենք շեշտը դնելու: Մեր գաղափարները քարոզելով ենք ակնկալելու մեր ժողովրդի քուէն, մենք նիւթական կարողութիւններ ունենք, Դաշնակցութիւնը շատ հսկայ կառոյց է, բայց կաշառելու հնարաւորութիւն եւ համոզմունք չունենք: Քաղաքական կուսակցութիւնը չի կարող բաժանել եւ բաժանելով ձայներ ակնկալել, մենք այդ մեթոտին չենք դիմել եւ չենք դիմելու, դրա համար էլ ասում եմ՝ մենք մեր ժողովրդի գիտակից քուէի անհրաժեշտութիւնն ունենք, գիտակից մարդկանցից է, որ մենք ձայներ ենք ակնկալում:
Հ.- Պաշտպանութեան նախարարը տարեվերջեան հարցազրոյցում չբացառեց, որ կարող է առաջադրուել նախագահի թեկնածու. եթէ այդպէս լինի, Դաշնակցութիւնը կը պաշտպանի՞ Սերժ Սարգսեանի թեկնածութիւնը:
Պ.- Ես մի քանի անգամ պատասխանել եմ այս հարցին, սակայն անընդհատ հարցը կրկնւում է։ Իսկապէս, մենք մեր սեփական թեկնածուն ենք ունենալու նախագահական ընտրութիւններում:
Հ.- Դո՞ւք էք լինելու այդ թեկնածուն:
Պ.- Ոչ, ես չեմ լինելու:
Հ.- Իսկ ո՞վ է լինելու:
Պ.- Մեր մէջ թեկնածուները շատ են:
Հ.- Իսկ Դաշնակցութեան համամասնական ցուցակը դո՞ւք էք գլխաւորելու:
Պ.- Ոչ, որովհետեւ իմ կուսակցական հանգամանքը աւելի շատ ինձնից համահայկական դերակատարութիւն է ակնկալում, ես բաւական բազմազբաղ եմ, իսկ կարող ուժերի առումով մեր կուսակցութիւնը պակաս չունի:
«ԱՌԱՒՕՏ»
Յունուար 17, 2007