Յունուարի 29ին «Ուրբաթ» ակումբի հիւրն էր Հ.Յ.Դ. Բիւրոյի ներկայացուցիչ Հրանդ Մարգարեանը: Պատասխանելով լրագրողներին յուզող հարցերին՝ Հ. Մարգարեանը նշեց, որ կուսակցութեան համամասնական ցանկը, ինչպէս նախկինում էր, կազմուած է լինելու ինքնուրոյն քաղաքական արժէք ունեցող դէմքերից: Թէեւ ցանկի վերջնական տարբերակը կ’որոշի Փետրուարին կայանալիք Հ.Յ.Դ. արտահերթ ժողովը, սակայն պարզ է, որ ոչ դաշնակցականների թիւը նախորդի համեմատ նուազելու է:
Հրանդ Մարգարեանը նշեց նաեւ, որ թէեւ կը լինեն տարբեր ընտրատարածքներում մեծամասնական ընտրակարգով առաջադրուած թեկնածուներ, բայց կուսակցութեան ուշադրութեան կենտրոնում կը լինի համամասնական ընտրակարգը: Իսկ թէ ո՛ր գործիչը ցուցակի ո՛ր տեղում կը լինի, Հրանդ Մարգարեանի համոզմամբ, ոչ մի տարբերութիւն չկայ, քանզի կուսակցութիւնից ով էլ անցնի խորհրդարան, պէտք է իրականացնի Դաշնակցութեան որդեգրած քաղաքականութիւնը, ինչը արւում է հիմա:
Հրանդ Մարգարեանը յայտնեց, որ ընտրութիւններին Դաշնակցութիւնը ներկայանալու է ծրագրով, ո՛չ ընդդէմի սկզբունքով՝ միւսներին վարկաբեկելով եւ այդ ֆոնին լաւ երեւալով, այլ. «Մենք կը փորձենք ապացուցել, որ անելիք ունենք, բան ունենք այս երկրին տալու, եւ կարծում ենք՝ պահը հասունացել է, որ մեր ժողովուրդը վերջապէս լուրջ ընտրութիւն կատարի, որպէսզի պահի ազդեցութեամբ կամ ինչ-որ հեղինակութեան տուրք տալով, ինչ-որ բանից վախենալով եւ րոպէական շահագրգռութեամբ չընտրի այն, ինչը յետոյ պէտք է չորս տարի քաշի»: Հրանդ Մարգարեանը համոզուած է՝ մեր ժողովուրդը կարող է եւ ի վիճակի է հասկանալու, որ քուէարկութիւնը ուղղակիօրէն առնչւում է վաղուայ իշխանութեան տեսակին ու որակին, եւ ուղղակի իր քուէով է պայմանաւորուած այն, ինչը վաղը կը ստեղծուի Հայաստանում:
Իսկ դրա համար ժողովուրդը, իր քուէն եւ արժանապատուութիւնը արժեւորելով, ձայնը չպէտք է վաճառի. պէտք է կողմնորոշուի այն ուժի ուղղութեամբ, որի ներկայացրած ծրագրով կարող է վերջապէս մեր երկիրը տանել հանդարտութեան, կայունութեան, «որտեղ բոլորը օրէնքի առջեւ հաւասար կը լինեն, ոչ ոք իրեն անապահով չի զգայ, ոչ ոք իրաւունք չի ունենայ 10 զինուած մարդ հետեւը գցած՝ ճնշել, նեղացնել, որտեղ խտրականութիւն չի լինի, որտեղ վզի հաստութիւնը եւ բազուկների լայնութիւնը մարդկանց իրաւունք չեն տայ օրէնքը խախտել, կը ստեղծուի արժանապատիւ կեանք, կարգ ու կանոն, որտեղ բոլորը կ’իմանան՝ իրենց վաստակածը իրենցից խլելու մտադրութիւն ոչ ոք չունի, բայց իր վաստակածը պէտք է կարողանայ ապահովել օրինականութեան պայմաններում՝ պետութեան հասանելիքը ամբողջութեամբ վճարելով: Մենք անարդարութեան դէմ ենք ընդհանրապէս, ում կողմից եւ ում նկատմամբ ուզում է կիրառուի», նշեց Հ.Յ.Դ. Բիւրոյի ներկայացուցիչը՝ աւելացնելով, որ սա բխում է կուսակցութեան ընկերային համոզմունքներից:
Բանախօսի համոզմամբ, մեր երկրի տնտեսական ներուժը տալիս է հնարաւորութիւն, որ մենք ապրենք շատ աւելի լաւ, քան այսօր ապրում ենք: Երկիրը յառաջիկայ չորս տարում կը մտնի բնականոն հուն, հնարաւոր կը լինի պայքարել ստուերային տնտեսութեան ու կոռուպցիայի դէմ եւ լուծել ընկերային խնդիրները, միայն թէ այդ ամէնի համար պէտք է քաղաքական կամք այն ուժի կողմից, որի համար իշխանութիւնը ոչ թէ հարստանալու միջոց է, այլ միջոց՝ ժողովրդին եւ երկրին ծառայելու: Շուտով կը հրատարակուի կուսակցութեան ծրագիրը, որը ընկերային յստակ ուղղուածութիւն ունի:
Հրանդ Մարգարեանի համոզմամբ, Հայաստանի ապագան պայմանաւորուած է այն ուժով, որը կարող է քաղաքական կամք դրսեւորել եւ չշեղուել իր նպատակներից՝ մնալով դրանց հաւատարիմ:
Իսկ Դաշնակցութեանը ոչ ոք չի կարող կամք պարտադրել. «Այդ կառոյցը իր ղեկավարութեանը ղեկավարել, զսպել, ղեկավարութիւնից հաշիւ պահանջել գիտի, եւ սա ամենահիմնականն է, որ մենք այս երկրում պէտք ենք, որովհետեւ մինչեւ ընտրութիւն ամէն մարդ լաւ է, ընտրութիւնից յետոյ՝ տարբեր, իսկ մենք այդ հնարաւորութիւնը չունենք, դա թոյլ չեն տայ մեր շարքերը», նշեց բանախօսը:
Հ.Յ.Դ. Բիւրոյի ներկայացուցիչը նշեց, որ Դաշնակցութիւնը անդամների առումով շատ համեստ կուսակցութիւն է՝ ունի ընդամէնը 7 հազար անդամ, բայց իրական ուժ է այս երկրում:
Ըստ նրա, ամբողջութեան մէջ Դաշնակցութեանը չընդունողները նոյնպէս կուսակցութեան օգտին կը քուէարկեն, եթէ իրենք իրենց յարգում են եւ մտածում վաղուայ օրուայ մասին: Բանախօսը համոզուած է, որ ԱԺ գործունէութեանը ծանօթ մարդը կը տեսնի, որ Դաշնակցութիւնը խորհրդարանում որակի պակաս կամ տեսակի խնդիր չունի, «որովհետեւ, ես հաւատում եմ, մեր շարքերը մեր ժողովրդի փոքրացուած տեսակն են»:
Ցաւալի երեւոյթ համարելով, որ ընկերային առումով անապահով հասարակութիւնը օրուայ հացի խնդիր լուծելու համար իր քուէն ծախում է, Հ. Մարգարեանը համոզմունք յայտնեց, որ վերջին տարիների ընթացքում ժողովրդի կարիքի նուազումը հնարաւորութիւն կը տայ, որ մեր ժողովուրդը ընտրութիւն կատարելիս մտածի ոչ թէ օրուայ մասին, այլ՝ վաղուայ:
Կառավարութեանը մաս կազմել-չկազմելը Հ.Յ.Դ.ի համար ինքնանպատակ չէ: «Եթէ ԱԺում մեծամասնութիւն ձեւաւորելու համար անհրաժեշտ լինի մեր մասնակցութիւնը, այն ժամանակ բանակցութեան մէջ կը մտնենք, եւ դրանից յետոյ կ’որոշենք՝ մաս կազմե՞լ կառավարութեանը, թէ՞ ոչ:
Մենք պատասխանատուութիւնից չենք խուսափում եւ չենք ափսոսում կառավարութեան մէջ լինելու համար», նշեց բանախօսը՝ աւելացնելով, որ կառավարութեանը մաս կազմելիս Հ.Յ.Դ.ն ունէր նպատակներ եւ յայտարարել է, թէ որ նպատակների իրագործման համար է կոալիցիայի մէջ մտնում։ Առաջադրած նպատակները յաջողուել է իրականացնել, ինչը չէր կարող, եթէ իշխանութեանը մաս չկազմէր:
Ինչ վերաբերում է Դաշնակցութեան ընդդիմութիւն դառնալուն, Հրանդ Մարգարեանը այդ առնչութեամբ ասաց. «Այսօր ես փորձում եմ մտածել, որ պիտի դառնանք իշխանութիւն. դրա համար ենք աշխատում: Բայց ընդդիմութիւն դառնալը ինձ համար սարսափելի բան չէ: Եթէ մեծամասնութեան մաս չկազմեմ, ինքնաբերաբար կը դառնամ ընդդիմութիւն: Բայց այս ընդդիմութեան նման չեմ դառնայ: Կը դառնամ կարգին ընդդիմութիւն, կը սպասեմ յաջորդ ընտրութիւններին, որպէսզի ընդդիմութեան միջոցով իշխանութիւն փոխեմ, կարգ ու կանոն հաստատեմ այս երկրում. կը փորձեմ աշխատել այդ ձեւով:
«Կը դառնամ այնպիսի ընդդիմութիւն, ինչպիսին լինում է բնականոն երկրներում. կը քննադատեմ, կը պայքարեմ այն բոլոր սխալ երեւոյթների դէմ, որ կան, կը փորձեմ ժողովրդի վերահսկողութիւն ստեղծել ընտրական համակարգի վրայ, ամէն ինչ կ’անեմ, բայց՝ մարդավարի»: Ըստ Հ. Մարգարեանի, ընդդիմութիւնն էլ իշխանութիւն է, որը Դաշնակցութիւնը ճաշակել է եւ դրանից չի վախենում:
Ինչ վերաբերում է այլ ուժերի հետ համագործակցութեանը, Հ.Յ.Դ. Բիւրոյի ներկայացուցիչը նշեց, որ կուսակցութիւնը պատրաստ է համագործակցել բոլորի հետ, բայց ցանկացած համագործակցութիւն լինում է ինչ-որ նպատակներ եւ ծրագիր իրականացնելու համար: Յոյս յայտնելով, որ այս անգամ ընտրութիւններին կեղծումներ չեն լինի, նա նշեց, որ այս հարցով Դաշնակցութիւնը պատրաստ է համագործակցել բոլոր շահագրգռուածների հետ: Իսկ այս ընտրութիւնների արդար անցկացման հարցում, նրա համոզմամբ, պէտք է շահագրգռուած լինեն բոլորը, ընդդիմութիւնը՝ իր շահերից ելնելով, իշխանութիւնը՝ իր:
Ընտրութիւնները կ’անցնեն արդար, եթէ ժողովուրդը իր իրաւունքներին տէր է: Սակայն ժողովուրդը այսօր չի հաւատում, որ իր քուէն դերակատար է ապագայի համար. «Պէտք է համոզուեն, որ մարդու արժանապատուութիւնը արժէք է, որը ո՛չ կը ծախուի, ո՛չ կը յարմարուի, ո՛չ տուրք կը տայ: Իմ երեխաների ապագան է: Ամէն մարդ պէտք է այսպէս մտածի», նշեց Հ. Մարգարեանը՝ աւելացնելով, որ, վերջապէս, իր ապագան որոշում է միմիայն ժողովուրդը:
«Ինչո՞ւ նախընտրել Դաշնակցութեանը այլ կուսակցութիւններից» հարցին Հրանդ Մարգարեանը պատասխանեց. «Որովհետեւ մենք ունենք յստակ ծրագիր, հաւաքական ղեկավարութիւն, որը ոչ թէ հետեւորդ է ինչ-որ մարդու, այլ՝ ծրագրի եւ գաղափարախօսութեան։ Սա է մեզ իրար կողքի հաւաքել, եւ ոչ թէ ինչ-որ մարդու նկատմամբ ունեցած սիրահարուածութիւնը կամ փոխադարձ շահը:
«Եթէ կազմակերպութեան հիմքում դրուած չէ գաղափարախօսութիւն ու քաղաքականութիւն, դրուած է լինում շահը: Կարող էք հանգիստ խոստովանել, որ շատ կազմակերպութիւններ կան, որոնց ղեկավարին եթէ վերցնէք, տակը բան չի մնայ: Մեր դէպքում այդպէս չէ:
«Մեզնից առանձնացրէք մի երեսուն նշանաւոր անձանց, որոնք հրապարակի վրայ են, միեւնոյն է՝ մազ չի պակասի», նշեց Հ.Յ.Դ. Բիւրոյի ներկայացուցիչը՝ աւելացնելով. «Մենք 16 տարուայ քննութիւն ենք տուել Հայաստանում, Ղարաբաղի պայքար մղել, հալածուել ենք, ընդդիմութիւն ենք եղել, իշխանութեան մաս ենք կազմել: Եւ այսօր կարող ենք բաց ճակատով կանգնել ու ասել՝ սա մենք ենք, սրանք էլ մեր յայտարարած նպատակներն են»: