Արցախի արտաքին գործոց նախարարութիւնը յայտարարութիւն հրապարակեց Պրիւքսէլի մէջ 14 Մայիսին կայացած եռակողմանի հանդիպման արդիւնքներուն վերաբերող Շարլ Միշէլի արտայայտութիւններուն գծով՝ նշելով, որ, ինչպէս յայտարարութեան ընդհանուր բովանդակութիւնը, այնպէս ալ անոր առանձին դրոյթները կը վկայեն, որ Եւրոպական Միութեան ղեկավարութիւնը կը շարունակէ անտեսել Արցախի ժողովուրդին օրինական իրաւունքներն ու շահերը եւ կ՛առաջնորդուի միայն տարածաշրջանին մէջ ունեցած աշխարհաքաղաքական եւ կարճաժամկէտ շահերով՝ ի վնաս միութեան կողմէ հռչակուած ժողովրդավարութեան եւ մարդկային իրաւունքներու արժէքներուն:
Յայտարարութեան մէջ նաեւ կը նշուի. «Այդ է վկայում, մասնաւորապէս այն, որ տուեալ յայտարարութիւնում բացակայում է որեւէ յիշատակում Լաչինի միջանցքի արդէն աւելի քան 5 ամիս շարունակուող արգելափակման, միջանցքի մուտքի մօտ ադրբեջանական ապօրինի անցակէտի տեղադրման եւ Արցախի 120 հազար բնակչութեան փաստացի պաշարման մասին՝ դրանից բխող բոլոր հումանիտար (մարդասիրական) հետեւանքներով: Այս փաստը ցոյց է տալիս, որ Եւրոպական խորհրդի նախագահը ոչ միայն չի խոչընդոտում, այլեւ փաստացի խրախուսում է Ադրբեջանին Արցախի ժողովրդի տառապանքներն օգտագործել որպէս քաղաքական գործիք:
«Սակայն, եթէ Արցախում հումանիտար աղէտ հրահրելու եւ էթնիկ (ցեղային) զտումներ իրականացնելու Ադրբեջանի մտադրութիւններն ու տեսանելի գործողութիւնները չեն մտահոգում Եւրոպական խորհրդի նախագահին, ապա մենք իրաւունք ունէինք ակնկալելու, որ նրա ներկայացրած կազմակերպութիւնն անմիջական շահագրգռուածութիւն կը ցուցաբերի Ադրբեջանի կողմից ժամանակակից միջազգային իրաւակարգի հիմնասիւներից մէկը հանդիսացող՝ Մարդու իրաւունքների եւրոպական դատարանի եւ ՄԱԿի Միջազգային դատարանի որոշումների անշեղ իրականացման նկատմամբ: Այս առումով տարակուսանք է առաջացնում, որ Եւրոպական խորհրդի նախագահը ցուցադրաբար անտեսում է Ադրբեջանի կողմից ՄԱԿի բարձրագոյն դատական մարմնի իրաւաբանօրէն պարտադիր վճռի հետեւողական չիրականացումը, ինչպէս նաեւ միջազգային իրաւունքի նորմերի, մասնաւորապէս, ուժի կամ ուժի սպառնալիքի չկիրառման եւ վէճերի խաղաղ կարգաւորման սկզբունքների համակարգուած խախտումները:
«Միայն միջազգային հանրութեան գործուն քայլերը՝ ուղղուած Ադրբեջանի կողմից 2020ի Նոյեմբերի 9ի եռակողմ յայտարարութեամբ ստանձնած պարտաւորութիւնների, ինչպէս նաեւ Արդարադատութեան միջազգային դատարանի 2023ի Փետրուարի 22ի որոշման անյապաղ եւ լիարժէք իրականացման ապահովմանը, կարող են վկայել, որ միջնորդի դերում հանդէս եկողներն անկեղծ շահագրգռուած են տարածաշրջանում երկարատեւ խաղաղութեամբ եւ կայունութեամբ: Համոզուած ենք, որ այն միջազգային դերակատարները, որոնք իրենց գործողութիւններով կամ անգործութեամբ խրախուսում են Բաքուին իր ագրեսիւ (յարձակողական, թշնամական), ծաւալապաշտական քաղաքականութեան եւ միջազգայնօրէն հակաիրաւական գործողութիւնների մէջ, ոչ միայն պատասխանատու են դրանց ծանր հետեւանքների համար, այլեւ արդարացնում են նման քաղաքականութեան եւ խախտումների կրկնութիւնն աշխարհի այլ կէտերում:
«Կրկին յիշեցնում ենք, որ 1991ին Արցախի ժողովուրդը, միջազգային իրաւունքի նորմերին եւ այն ժամանակ գործող ներպետական օրէնսդրութեանը լիովին համապատասխան, իրացրել է ինքնորոշման իր անքակտելի իրաւունքը եւ ստեղծել իր պետականութիւնը նոյն հիմքերի վրայ, ինչ Ադրբեջանը եւ Հայաստանը: Արցախի իշխանութիւնները հետեւողականօրէն պաշտպանել եւ շարունակելու են պաշտպանել իրենց ժողովրդի օրինական ընտրութիւնն ու ազատ կամարտայայտութիւնը:
«Առանձին երկրների եւ միջազգային կազմակերպութիւնների որեւէ ներկայացուցիչ իրաւունք չունի տնօրինել Արցախի ժողովրդի ճակատագիրը: Աւելին, ուժի ապօրինի կիրառման եւ շարունակուող ահաբեկչութեան օրինականացման վրայ հիմնուած օրակարգն Արցախի ժողովրդին պարտադրելու ցանկացած փորձ հաւասարազօր է մեղսակցութեան Արցախի էթնիկ զտմանն ու տարածաշրջանում լարուածութեան մշտական օջախի պահպանմանն ուղղուած Ադրբեջանի յանցաւոր ծրագրերի իրականացմանը, ինչպէս նաեւ՝ վերջինիս տարածքային նկրտումների ու ագրեսիւ քաղաքականութեան խրախուսման:
«Այս կապակցութեամբ կրկին վերահաստատում ենք Արցախի Հանրապետութեան ժողովրդի եւ իշխանութիւնների վճռականութիւնը՝ շարունակել պայքարն իրենց անքակտելի իրաւունքների համար՝ միջազգային իրաւունքի նորմերին եւ սկզբունքներին համապատասխան: Համոզուած ենք, որ միայն Արցախի ժողովրդի կողմից իրացուած ինքնորոշման իրաւունքի ճանաչումը կարող է հիմք հանդիսանալ հակամարտութեան կայուն կարգաւորման եւ տարածաշրջանում երկարաժամկէտ ու արդար խաղաղութեան եւ կայունութեան հաստատման համար:
«Միաժամանակ, յիշեցնում ենք, որ Արցախի Հանրապետութեան իշխանութիւնները մշտապէս հանդէս են եկել բանակցութիւնների միջոցով ադրբեջանա-ղարաբաղեան հակամարտութեան համապարփակ կարգաւորման օգտին: Արցախի Հանրապետութիւնը շարունակում է բաց մնալ հակամարտութեան բոլոր բաղադրիչների եւ խաղաղ կարգաւորմանն ուղղուած ողջամիտ առաջարկների քննարկման համար` համաձայնեցուած եւ միջազգայնօրէն ճանաչուած բանակցային ձեւաչափով, կողմերի իրաւահաւասարութեան հիման վրայ եւ նրանց ստանձնած պարտաւորութիւնների իրականացման միջազգային ամուր երաշխիքների առկայութեան պայմաններում»: