Նոր կազմուած Ազգային Ժողովին առաջարկ ներկայացուած է ստեղծելու Տեղեկատուական արհեստագիտութեան նախարարութիւն, որ կարեւոր է տեղակատուական, հաղորդակցութեան արհեստագիտութեան բնագաւառին մէջ յաւելեալ աշխուժ աշխատանք տանելու եւ այդ գործունէութիւնը համակարգելու առումով։ Առաջարկը ներկայացուած է «Ինֆորմացիոն տեխնոլոգիաների ձեռնարկութիւնների միութեան» կողմէ։
Ներկայացուած առաջարկին մէջ կ՛ըսուի հետեւեալը. «Նախարարութեան առկայութիւնը հնարաւորութիւն կը տայ խուսափել ոլորտի զարգացմանը խոչընդոտող բազմաթիւ հանգամանքներից, ինչպիսիք են՝ ոլորտի միասնականութեան խաթարումը՝ տարբեր պետական մարմինների միջեւ բաժանուածութեամբ, գործառոյթների յաճախակի կրկնողութիւնները, իրար միջեւ բաժանելու անկարողութիւնը, միասնական համակարգման գրեթէ բացակայութիւնը եւ այլն: Արդիւնքում ոլորտի կառավարմանը, զարգացմանն ուղղուած ջանքերը հիմնականում ձեւական բնոյթ են կրում:
«Մեր կարծիքով Տեղեկատուական, հեռահաղորդակցման տեխնոլոգիաների եւ ինովացիոն զարգացման նախարարութեան մոդելը համահունչ է գործող պետական կառավարման համակարգին եւ որեւէ հակասութիւն չի առաջացնում: Պետական կառավարման նմանատիպ մարմնի ստեղծմամբ չի առաջանում էական ծախսերի անհրաժեշտութիւն, քանզի այն չի ենթադրում մեծ աշխատակազմի ստեղծում, իսկ ներկայիս տարբեր պետական մարմիններում նշուած ուղղութիւններով զբաղուող, եւ յաճախ գործառոյթներով իրար կրկնող ստորաբաժանումներում ներգրաւուած են մի քանի անգամ աւելի շատ մարդկային ռեսուրսներ:
«Նախարարութեան ստեղծումը կը բերի որոշակի ռեսուրսների խնայողութեան՝ ի հաշիւ նշուած անարդիւնաւէտ կառավարման մեխանիզմների վերացման, գործառութային կրկնութիւնների բացառման, իրականացուող ծրագրերի համակարգուածութեան, առկայ ռեսուրսների կենտրոնացուած կառավարման, չհաշուած ոլորտի զարգացման արդիւնքում եկամտաբերութեան եւ հարկային մուտքերի աւելացումը:
«Ակնկալում ենք, որ սոյն նախաձեռնութիւնը կ՛արժանանայ պետական եւ մասնաւոր հատուածի ներկայացուցիչների աջակցութեանը, եւ առաջարկում ենք միանալ յայտարարութեանը», նշուած է տարածած հաղորդագրութեան մէջ: