ԱՒԵՏԻՍ ԲԱԲԱՋԱՆԵԱՆ
Յուլիսի 19ին ԼՂՀում տեղի են ունենալու նախագահական ընտրութիւններ: Բացի գործող նախագահ Բակօ Սահակեանից, առաջադրուել են եւս երեք թեկնածուներ՝ Արցախի հերոս, ԼՂՀ ՊԲ հրամանատարի նախկին տեղակալ, 2005թ. մինչ օրս ԼՂՀ ԱԺ պատգամաւոր Վիտալի Բալասանեանը, ՀՀ պետական ագրարային համալսարանի Ստեփանակերտի մասնաճիւղի փոխտնօրէն Արկադի Սողոմոնեանը եւ ԼՂՀ ԱԺ ընդհանուր բաժնի նախկին պետ Վալերի Խաչատրեանը:
Բակօ Սահակեանի հիմնական ընդդիմախօսը համարւում է Վիտալի Բալասանեանը, ով 2005թ. խորհրդարանական ընտրութիւններից յետոյ «Շարժում 88»-ՀՅԴ ընդդիմադիր դաշինքի խորհրդարանական խմբակցութեան անդամ էր, իսկ 2010թ. խորհրդարանական ընտրութիւններից յետոյ անդամակցում է ՀՅԴ խմբակցութեանը: Բալասանեանը ոչ միայն ընդդիմադիր խմբակցութեան անդամ է, այլեւ մշտապէս հանդէս է եկել ընդդիմադիր դիրքերից: Մասնաւորապէս Բալասանեանը ԼՂՀ խորհրդարանում առաջարկել է ընդունել որոշում, որով ՀՀ իշխանութիւններին կ՛արգելուի ԼՂ հակամարտութեան կարգաւորման բանակցութիւններին մասնակցել առանց ԼՂՀ մասնակցութեան: Մեր հարցազրոյցը Վիտալի Բալասանեանի հետ իր թեկնածութեան առաջադրման մասին է:
ԱՒԵՏԻՍ ԲԱԲԱՋԱՆԵԱՆ.- Պարոն Բալասանեան, ԼՂՀ նախագահ Բակօ Սահակեանի կողմից վարուող քաղաքականութեան մէջ ի՞նչը ձեզ չի բաւարարում եւ ի՞նչն էք ցանկանում փոխել:
ՎԻՏԱԼԻ ԲԱԼԱՍԱՆԵԱՆ.- Իմ հիմնական դժգոհութիւնը վարուող արտաքին քաղաքականութիւնից է: Ներկայ քաղաքականութեան արդիւնքում ԼՂՀն դուրս է մնացել բանակցային գործընթացից, իսկ ես համոզուած եմ, որ Ղարաբաղը կարող է եւ պարտաւոր է բանակցութիւնների օբյեկտից (առարկայ-Խմբ.) վերածուել սուբյեկտի (ենթակայի-Խմբ.):
ԱՒԵՏԻՍ ԲԱԲԱՋԱՆԵԱՆ.- Ինչ է՝ Բակօ Սահակեանը չի՞ ցանկանում, որ ԼՂՀն լինի բանակցութիւնների կողմ:
ՎԻՏԱԼԻ ԲԱԼԱՍԱՆԵԱՆ.- Ես չէի ասի, թէ նա դէմ է, ուղղակի նրա կողմից վարուող քաղաքականութիւնը դրան չի յանգեցնում: Այնպէս որ այդ քաղաքականութիւնը պէտք է փոխել: ԼՂՀն Հայաստանի Հանրապետութեան հետ պէտք է կնքի ռազմաքաղաքական դաշինք, որով Հայաստանը կը դառնայ ԼՂՀի եւ նրա ժողովրդի անվտանգութեան երաշխաւոր:
ԱՒԵՏԻՍ ԲԱԲԱՋԱՆԵԱՆ.- Հիմա երաշխաւոր չէ՞: Չէ՞ք կարծում, որ այդպիսի պայմանագրային յարաբերութիւնները կը պաշտօնականացնեն եւ ինչ որ իմաստով կը նսեմացնեն այն, ինչ ենթադրւում է, որ պէտք է լինի ինքնըստինքեան: Դա նոյնը չէ՞, որ երկու եղբայր նօտարի միջոցաւ պայմանագիր կնքեն, որ պէտք է իրար դժուար պահին ձեռք մեկնեն:
ՎԻՏԱԼԻ ԲԱԼԱՍԱՆԵԱՆ.- Ի հարկէ Հայաստանը ԼՂՀ անվտանգութեան երաշխաւորն է, բայց միջպետական յարաբերութիւնները կը փոխեն դրանց որակը: Օրինակ, ԽՍՀՄ փլուզումից յետոյ Հայաստանը եւ Ռուսաստանը դարձան ռազմավարական դաշնակիցներ, բայց այդ դաշնակցութիւնն ամրագրուած է բազմաթիւ փաստաթղթերով, որոնք չեն նսեմացնում այդ յարաբերութիւնների էութիւնը:
ԱՒԵՏԻՍ ԲԱԲԱՋԱՆԵԱՆ.- Դուք Հայաստան-Ռուսաստան եւ Հայաստան-ԼՂՀ յարաբերութիւնները տեսնում էք նոյն հարթութեա՞ն մէջ:
ՎԻՏԱԼԻ ԲԱԼԱՍԱՆԵԱՆ.- Ես տեսնում եմ տարբերութիւնը: Բայց ինչպէս Հայաստան- Ռուսաստան ռազմաքաղաքական դաշինքն է պակասեցնում պատերազմի հաւանականութիւնը տարածաշրջանում, եւ այդ դաշինքի հիման վրայ Ռուսաստանն իր բազաներն է տեղակայել Հայաստանում, այնպէս էլ Հայաստան-ԼՂՀ ռազմաքաղաքական դաշինքը կը պակասեցնի պատերազմի վերսկսման վտանգը, եւ Հայաստանը կը կարողանայ այդ դաշինքի հիման վրայ իր օրինական ներկայութիւնն ապահովել ԼՂՀում: Հայաստանը ՀԱՊԿ անդամ է, եւ նրա օրինական ներկայութիւնը կարող է զսպող ազդեցութիւն ունենալ Ադրբեջանի համար:
ԱՒԵՏԻՍ ԲԱԲԱՋԱՆԵԱՆ.- Իսկ վարուող տնտեսական քաղաքականութեան նկատմամբ ի՞նչ վերապահումներ ունէք:
ՎԻՏԱԼԻ ԲԱԼԱՍԱՆԵԱՆ.- Ես ունեմ տնտեսական զարգացման իմ ծրագիրը եւ կարծում եմ, որ կարելի է աւելի մեծ յաջողութիւնների հասնել մարդկանց բարեկեցութեան ապահովման գործում: Բայց ես կարծում եմ, որ այսօր ղարաբաղցիներին աւելի շատ հետաքրքրում են Ղարաբաղի կարգավիճակի եւ անվտանգութեան հարցերը, իսկ տնտեսական, սոցիալական հարցերը երկրորդական են:
ԱՒԵՏԻՍ ԲԱԲԱՋԱՆԵԱՆ.- ՀՅԴն եւ «Շարժում 88»ը ինչպիսի՞ վերաբերմունք ունեն ձեր առաջադրման նկատմամբ, սատարո՞ւմ են ձեզ:
ՎԻՏԱԼԻ ԲԱԼԱՍԱՆԵԱՆ.- Ես անկուսակցական եմ եւ առաջադրուել եմ որպէս անկախ թեկնածու, կը պաշտպանեն, թէ չեն պաշտպանի՝ պարզ կը լինի գրանցումից յետոյ:
ԱՒԵՏԻՍ ԲԱԲԱæԱՆԵԱՆ.- Հայաստանում իւրաքանչիւր ընտրութիւն ուղեկցւում է անկախ թեկնածուների կողմից ընտրակեղծիքների մասին յայտարարութիւններով եւ մտահոգութիւններով: Դուք ունէ՞ք այդպիսի մտահոգութիւն:
ՎԻՏԱԼԻ ԲԱԼԱՍԱՆԵԱՆ.- Ղարաբաղում եղել են նորմալ նախագահական եւ խորհրդարանական ընտրութիւններ, չնայած եղել են նաեւ դէպքեր, երբ կիրառուել է վարչական ռեսուրսը: 2005թ. խորհրդարանական ընտրութիւնների ժամանակ ես դա զգացել եմ իմ նկատմամբ, իսկ 2010ին նման բան գրեթէ չի եղել: Կարծում եմ, որ դա չի կարող վճռորոշ լինել ընտրութիւնների իրական արդիւնքների վրայ: