ԵՐԵՒԱՆ, «Նոյեան Տապան».- 2006ին Հայաստանի մէջ ներքին համախառն արդիւնքի ծաւալը շուկայական գիներով կազմած է 2 թրիլիոն 665 միլիառ 663.4 միլիոն դրամ (աւելի քան 6 միլիառ 407 միլիոն տոլար՝ հաշուարկուած վերոնշեալ ժամանակահատուածի 1 տոլարը 416.04 դրամ միջին փոխարժէքով), որ 13.4%ով կը գերազանցէ նախորդ տարուան համապատասխան ցուցանիշը:
Արդիւնաբերական արտադրութեան ընդհանուր ծաւալը 2006ին կազմած է 643 միլիառ 503.7 միլիոն դրամ՝ նախորդ տարուան համեմատ կրճատուելով 0.9%ով, իսկ առանց ադամանդի արտադրութեան՝ 640 միլիառ 696.7 միլիոն դրամ՝ աճելով 2.3%ով: Գիւղատնտեսութեան համախառն արտադրութիւնը կազմած է 555 միլիառ 922.3 միլիոն դրամ եւ նախորդ տարուան համեմատ աճած է 0.4%ով, շինարարութեան ծաւալը կազմած է 623 միլիառ 111.5 միլիոն դրամ եւ աճած է 37.1%ով:
2006ին Հայաստանի արտաքին առեւտրաշրջանառութիւնը կազմած է 3 միլիառ 198 միլիոն տոլար կամ 15.2%ով աւելի, քան նախորդ տարին: Առանց ադամանդի այդ ցուցանիշները կազմած են 2 միլիառ 729.4 միլիոն տոլար եւ 21.7%: Արտածումի ծաւալը կազմած է 1 միլիառ 4 միլիոն տոլար եւ աճած 3.1%ով, իսկ առանց ադամանդի՝ 758.4 միլիոն տոլար եւ աճած 6.7%ով: Ներածումի ծաւալը կազմած է 2 միլիառ 194.3 միլիոն տոլար եւ աճած 21.8%ով, իսկ առանց ադամանդի՝ 1 միլիառ 971 միլիոն տոլար եւ աճած է 28.7%ով:
Անցեալ տարի Հայաստանի մէջ միջին ամսական անուանական աշխատավարձը կազմած է 64,001 հազար դրամ կամ 23.5%ով աւելի, քան նախորդ տարին: Պետական պաշտօնեաներու պարագային այդ ցուցանիշները կազմած են 45,130 հազար դրամ եւ 125.8%, իսկ ոչ պետական հաստատութիւններու աշխատողներու պարագային՝ 77 հազար 883 դրամ եւ 21,2%: Բնակչութեան դրամական եկամուտները կազմած են 1 թրիլիոն 721 միլիառ 466.9 միլիոն դրամ կամ 19.8%ով աւելի, դրամական ծախսերը՝ 1 թրիլիոն 649 միլիառ 900 միլիոն դրամ կամ 19%ով աւելի:
Տոլարի նկատմամբ հայկական դրամի միջին փոխարժէքը 2006ին կազմած է 416.04 դրամ՝ նախորդ տարուան 457.69 դրամի փոխարէն:
