ԵՐԵՒԱՆ․- Հայաստանի Կեդրոնական դրամատունը 13 Հոկտեմբերին շրջանառութեան մէջ դրաւ «Ալեքսանդր Սպենդիարեանի ծննդեան 150ամեակ» արծաթէ յուշադրամը։
Ալեքսանդր Սպենդիարեան (1871-1928) հայ մեծանուն երաժշտահան, խմբավար, մանկավարժ, երաժշտական-հասարակական գործիչ, ՀԽՍՀ ժողովրդական արուեստագէտ (1926) էր:
1892-1894ին ան Մոսկուայի մէջ ուսումնասիրած է յօրինումի տեսութիւն՝ Ն. Կլենովսքիի մօտ, իսկ 1896-1900ին՝ Ն. Ռիմսքի Քորսաքովի մօտ, Փեթերսպուրկի մէջ: Ան ապրած է Խրիմի մէջ, ունեցած է խմբավարական եւ երաժշտական-հասարակական գործունէութիւն ու իբրեւ երաժշտահան կազմաւորուած է ռուսական եւ հայկական մշակոյթներու ազդեցութեամբ։
1924էն սկսեալ Սպենդիարեան ապրած է Երեւանի մէջ: Այդ շրջանին ան ստեղծած է «Երեւանեան Էտիւդներ»ը եւ աւարտին հասցուցած է հայկական երաժշտական թատրոնի լաւագոյն ստեղծագործութիւններէն մէկը՝ «Ալմաստ» օփերան (Յ. Թումանեանի «Թմկաբերդի Առումը»ին հիման վրայ):
Սպենդիարեան մեծ դեր ունեցած է հայկական ազգային երաժշտահանութեան դպրոցի ձեւաւորման գործին մէջ՝ հարստացուցած է հայկական երաժշտութիւնը նոր թեմաներով, ընդարձակած տեսակերը, հիմք դրած հայկական ազգային «սիմֆոնիզմ»ին։ Անոր «Ղրիմի էսքիզները», «Երեք Արմաւենի», «Երեւանեան Էտիւդները» եւ այլ սիմֆոնիք գործեր հայկական սիմֆոնիք երաժշտութեան դասական նմուշներ են:
Երեւանի մէջ հիմնուած է Սպենդիարեանի տուն-թանգարանը: Երաժշտահանի անունը կը կրեն Երեւանի օփերայի եւ պալէի ազգային ակադեմիական թատրոնը (1933) եւ թիւ 1 երաժշտական դպրոցը: