Տարեմուտը յատկանշող այս աւանդական տօնը, որ կոչւում է նաեւ Կաղանդ, գալիս է դարերից։ Յայտնի է, որ այն երբեմն նոյնացուել է գարնան զարթօնքը խորհրդանշող՝ Բարեկենդանի հետ, ապա տեղափոխուել Նաւասարդի 1 (Օգոստոսին): Այս տօնից մի քանի օր անց՝ Յունուար 6ը Քրիստոսի ծննդեան օրն է։ Ժողովրդական-ծիսական եւ կրօնական այս տօները յաճախ զուգակցւում են եւ նշւում միասին։
Յարգելով հնամեայ սովորոյթը, ՀՕՄի «Մայր» մասնաճիւղի Շաբաթօրեայ դպրոցը ամէն տարի կանոնաւորապէս նշում է այս զոյգ տօները՝ ուսուցիչների, ծնողների, տնօրէնութեան, ՀՕՄի վարչութեան եւ մասնաճիւղի անդամուհիների ներկայութեամբ։
Այս տարուայ աշակերտական հանդէսը տեղի ունեցաւ Շաբաթ, Դեկտեմբեր 23, 2006ին, Հոլիվուտի «Կարապետեան» սրահում։
Ներկաներին բարեմաղթանքի խօսք յղեց շաբաթօրեայ դպրոցի տնօրէնուհի Կատիա Քուշերեան, խօստանալով, որ եկող՝ 2007 թուականը պիտի հանդիսանայ շարունակութիւնը այս տարուայ իրագործումների եւ նոյնիսկ աւելիով պիտի կրկնապատկուեն ջանքերը՝ ուսման որակի բարձրացման առումով։ Ապա, տօնական շնորհաւորանքներ ուղղեց աշակերտներին, ծնողներին եւ ուսուցիչներին, ինչպէս նաեւ Շաբաթօրեայ դպրոցին միշտ քաջալեր հանդիսացող ՀՕՄի «Մայր» մասնաճիւղի վարչութեան, որ ներկայ էր հանդէսին։
Յանուն ՀՕՄի, տօնական շնորհաւորանքներ եւ յաջողութեան սրտագին մաղթանքներ փոխանցեց ներկաներին «Մայր» մասնաճիւղի վարչութեան ատենապետուհի Ռոզ Սուքիասեան։ Մեծապէս գնահատելով աշակերտների ուսման գործում ծնողների ունեցած կարեւոր դերը, նա շնորհաւորանքի ջերմ մաղթանքներ յղեց ծնողներին եւ բոլոր ներկաներին։
Այս տարուայ տօնական հանդէսի պատասխանատուութիւնը ստանձնել էին վաստակաւոր ուսուցչուհիներ՝ Սիրանոյշ Յարութիւնեան եւ Կարինէ Սեւունի։ Տարբեր կարգերի ուսուցիչները պատրաստել էին ճաշակով եւ միաժամանակ՝ աշակերտների մտապաշարը հարստացնող մի ծրագիր, որ սիրով ընդունուեց ներկաների կողմից։ Օրուայ պատշաճ հագուստներով, կրտսեր, միջին եւ բարձր կարգերի աշակերտները ներկայացրին տօնական երգեր («Լուռ գիշեր», «Խնճոյքի երգ» եւ այլն), ղեկավարութեամբ եւ դաշնամուրի նուագակցութեամբ՝ երաժշտութեան ուսուցչուհի Լիզա Էքմէքճեանի։ Դպրոցի բարձր կարգի սաները հերթով ներկայացրին Նոր տարուայ հաւատալիքներն ու վաղեմի սովորոյթները աշխարհի տարբեր ժողովուրդների մօտ, ապա՝ նշանաւոր մարդկանց՝ Ճորճ Պայրընի, Անթուան Մէյէի, Վիքթոր Հիւկոյի ասոյթները Հայաստանի եւ հայերի մասին։ Ծրագրի վերջում աշակերտները արտասանեցին Համօ Սահեանի «Գարունդ հայերէն է գալիս» բանաստեղծութիւնը։ Ուրախութեամբ ընդունուեց կաղանդ պապայի գալուստը, որ նուէրներ բաժանեց աշակերտներին։
Հանդէսի աւարտին, իր սրտի խօսքն ասաց եւ շնորհաւորեց բոլորին հանդիսավար Սեդա Գըւըրեան, մաղթելով, որ աշխարհում շատանայ բարին, քանի որ՝ «մի պտղունց բարին կարող է աշխարհում մի բլուր չարութիւն հալեցնել»։
(Թղթակցութիւնը ՀՕՄի «Մայր» Մասնաճիւղէն)
Դեկտեմբեր 28, 2006