Էջմիածին, Մայր Աթոռի Մամլոյ Դիւան.- Ամանորի առիթով Գարեգին Բ. կաթողիկոսը հետեւեալ շնորհաւորական ուղերձը յղեց.
«Սիրելի բարեպաշտ ժողովուրդ,
«Մայր Աթոռ Սուրբ Էջմիածնից ողջունում ենք ձեզ ի հայրենիս եւ ի Սփիւռս եւ բերում ամէնքիդ հայրապետական մեր սէրն ու օրհնութիւնը։
«Նոր տարուայ շէմին ենք, երբ նորի, աւելի լաւի սպասումով անդրադառնում ենք եւ անցնող տարուան, եւ յատկապէս՝ ապագայի մեր ծրագրերին ու յոյսերին։ Այս պահին գոհութեան աղօթք ենք բարձրացնում երկինք, որ Տէրը պարգեւեց մեզ խաղաղութեան մէջ մեր կեանքը կառուցելու, դէպի ձեռքբերումներ ընթանալու հնարաւորութիւն՝ բարիք ստեղծելու, բարին գործելու եւ բարու մէջ հաստատուելու՝ իւրաքանչիւրս առանձին եւ բոլորս՝ իբրեւ քրիստոնեայ ժողովուրդ՝ հայ եկեղեցի, հայոց պետութիւն։
«2006 թուականն էլ ապրեցինք մեր հայրենիքի ու համայն մեր ժողովրդի միացեալ ու լուսաւոր գալիքի հանդէպ հաւատով։ Աստծոյ օգնութեամբ նեղութիւնների ու դժուարութիւնների առջեւ չտկարացանք, մեծ ու փոքր փորձութիւններ յաղթահարեցինք, ձեռքբերումներ ունեցանք եւ դեռ ճանապարհ պիտի անցնենք դէպի մեր ժողովրդի ցանկալի բարեկեցութիւն, դէպի մեր բոլոր յոյսերի մարմնաւորում։ Մեր յաջողութիւնները, ինչ որ ունեցանք հայրենիքում եւ Սփիւռքում, հնարաւոր եղան միայն մեր ժողովրդի համատեղ ջանքերով ու միասնական տեսիլքով, առ հայրենին ունեցած սիրով ու նուիրումով։ Այսպէս, այս ոգով 2006 թուականին տօնեցինք Հայաստանի եւ Արցախի անկախութեան 15րդ տարեդարձը։ Մայր հայրենիքում գումարուեց Հայաստան-Սփիւռք համաժողովը, Ռուսաստանում եւ Ֆրանսայում անցկացուեցին Հայաստանի տարուան նուիրուած միջոցառումները, կեանքի կոչուեցին հայրենաշէն ծրագրեր ու նախաձեռնութիւններ։ Արցախի մեր ժողովուրդն իր ազատ, նոր կեանքը կառուցելու հաւատով ու վստահութեամբ ընդունեց սահմանադրութիւնը Լեռնային Ղարաբաղի Հանրապետութեան։
«2006 թուականի յիշարժան ձեռքբերումներով նշանաւորուեց նաեւ եկեղեցական մեր կեանքը։ Հայրենիքում եւ Սփիւռքում իրենց դռները բացեցին վերանորոգուած ու նորակառոյց եկեղեցիներ, հռչակուեց Ֆրանսայի Հայոց թեմը, ծառայութեան կոչուեցին բազմաթիւ եկեղեցականներ եւ աննուազ եղաւ ջանքը՝ հոգալու հոգեւոր կարիքները մեր ժողովրդի եւ արթուն ու զօրացեալ պահելու հաւատը մեր կեանքում։ Արդիւնաւոր եղաւ նաեւ համագործակցութիւնը քոյր եկեղեցիների հետ՝ ի սէր ժողովուրդների բարի յարաբերութիւնների եւ աշխարհում խաղաղութեան հաստատման։
«Փառք երկնաւորին, որ պարգեւեց մեզ նորոգուած յոյս ու հաւատ։
«Նոր տարի է սկիզբ առնում, ուրեմն, ինչպէս առաքեալն է ասում, «քննենք լաւը եւ թէ ինչ է Աստծոյ կամքը՝ բարին եւ հաճելին եւ կատարեալը» եւ քայլենք Աստծոյ կամքով բարին ընտրելով՝ կատարեալին ձգտելով եւ Աստուած պիտի օրհնի մեր ջանքերը՝ ստեղծելու եւ կառուցելու, բարօր ու շէն դարձնելու հայրենի մեր երկիրը, մեր հայրերի ժառանգութեամբ, գիտութեամբ ու մշակոյթով պայծառ ազգ մնալու եւ յարատեւելու։ Տարեմուտի խորախորհուրդ այս պահին աղօթք ենք բարձրացնում երկինք աշխարհասփիւռ մեր ժողովրդի զաւակների համար։ Աղօթում ենք հայոց բանակի քաջարի զինուորների ու սպաների համար, ովքեր այս պահին մեր երկրի սահմանների պաշտպանութեան դիրքերում են, բոլոր նրանց համար, ովքեր նոր տարին դիմաւորում են իրենց ծառայութեան մէջ։ Աղօթում ենք հիւանդների, նեղեալների ու կարիքաւորների համար եւ հայցում Բարձրեալի օրհնութիւնը, ամենաառատ շնորհն ու զօրակցութիւնը։
«Սիրելի հաւատաւոր զաւակներ մեր, թող հաստատուն ու զօրեղ լինի հաւատը մեր սրտերում, եւ մեր գործերը յաջողութեամբ կեանքի կոչուեն ի սէր Աստծոյ, ի սէր մեր հայրենիքի ու մեր Սուրբ եկեղեցու։
«Թող Տէրը խաղաղութեան մէջ պահպանի աշխարհը եւ մեր հայրենին, պարգեւի շնորհով, բարիքով եւ ուրախութեամբ լեցուն օրհնեալ տարի։
Շնորհաւոր նոր տարի»։