ԵՐԵՒԱՆ, «Արմէնփրէս».- Դեկտեմբեր 9ի կառավարութեան արտահերթ նիստին, հիմ ընդունելով նախագահի 1997 Մայիս 6ի մարզերուն մէջ պետական կառավարման մասին ՆՀ-728 հրամանագիրի 1.7 կէտը՝ կառավարութիւնը որոշեց Արամ Քոչարեանը նշանակել Լոռիի մարզպետ եւ Աշոտ Ղահրամանեանը՝ Արմաւիրի մարզպետ:
Արամ Վլատիմիրի Քոչարեան 1999-2005 տարիներուն պաշտօնավարած է իբրեւ Լոռիի մարզպետի տեղակալ, իսկ 2005էն մինչ նշանակումը՝ Ընկերային ապահովագրութեան պետական հիմնադրամի նախագահի տեղակալ: Ամուսնացած է, ունի երկու զաւակ, Հայաստանի Հանրապետական կուսակցութեան անդամ է:
Իսկ Աշոտ Սարգիսի Ղահրամանեան 1996-1999 տարիներուն եղած է Լոռիի մարզային ներքին գործոց վարչութեան պետ, 1999ին՝ Երեւանի ՆԳ քաղաքային վարչութեան պետ, իսկ 2002էն մինչ նշանակումը եղած է ոստիկանութեան Սիւնիքի մարզային վարչութեան պետ: