ԵՐԵՒԱՆ, «Արմէնփրէս».- Երէկ, Երեւանի մէջ սկսան տաղանդաւոր երաժշտահան եւ դաշնակահար Առնօ Բաբաջանեանի ծննդեան 85ամեակին նուիրուած ձեռնարկները: Այս առթիւ հրաւիրուած ասուլիսի ժամանակ մշակոյթի եւ երիտասարդութեան փոխնախարար Կարինէ Խոդիկեան ըսաւ, թէ Կոմիտասի անուան սենեկային տան մէջ տեղի պիտի ունենայ համերգ, մասնակցութեամբ Կոմիտասի անուան քառեակի, դաշնակի երրեակի, դերասաններ Սվեթլանա Նաւասարդեանի, Մարինա Աբրահամեանի եւ Արփինէ Յարութիւնեանի:
Հոկտեմբեր 22ին, Ա. Խաչատուրեանի անուան համերգասրահին մէջ տեղի պիտի ունենայ էսթրատային համերգ, որու ընթացքին առաջին անգամ ըլլալով ելոյթ պիտի ունենայ Ա. Բաբաջանեանի անուան էսթրատային նուագախումբը՝ վաստակավոր դերասան Թոմաս Մադաթովի ղեկավարութեամբ, մասնակցութեամբ Իոսիֆ Կոբզոնի, Ռուբէն Մաթեւոսեանի, Չիւան Գասպարեանի, Արա Բաբաջանեանի, Էտկար Կարապետեանի եւ այլ երգիչ-երգչուհիներու:
«Առնօ Բաբաջանեանի կարիքը շատ է զգացւում ոչ միայն Հայաստանում, որովհետեւ նա իր ներդրումն ունի համաշխարհային երաժշտութեան գանձարանում: Եւ դա է պատճառը, որ նրա երաժշտութիւնը , երգերը համախմբել են ու առ այսօր համախմբում են մարդկանց լայն շերտերի, անկախ նրանց ազգային պատկանելութիւնից», ըսաւ ասուլիսին ներկայ գտնուող Ռուսիոյ մէջ Առնօ Բաբաջանեանի յիշատակին նուիրուած հիմնադրամի գլխավոր արտադրիչ, բանաստեղծ եւ լրագրող Վլատիմիր Փոփքով:
Ան նշեց, որ Մոսկուայի մէջ կայանալիք փառատօնի ծիրէն ներս, Նոյեմբեր 15ին, տեղի պիտի ունենայ սիմֆոնիք համերգ՝ խմբավարութեամբ Կոստանդին Օրբելեանի: Նաեւ, Դեկտեմբեր 15ին, Քրեմլինի պալատի դահլիճին մէջ տեղի պիտի ունենայ էսթրատային կալա-համերգ: Նոյն օրը, Մոսկուայի Կազէթնայեա նրբանցքի շէնքի պատին, ուր 1956-1983 ապրած է Ա. Բաբաջանեան, պիտի ամրացուի յուշաքար:
Նշենք, որ ասուլիսին ներկայ էին Ա. Բաբաջանեանի որդին՝ Արա Բաբաջանեանը եւ դերասան Թոմաս Մադաթովը: