1. ՀԱՄԱԳՈՐԾԱԿՑՈՒԹԵԱՆ ՆՊԱՏԱԿՆԵՐԸ
2007թ. Մայիսի 12ին կայացած ընտրութիւնների արդիւնքում Հայաստանի Հանրապետութեան Ազգային ժողովում ստեղծուած Քաղաքական կոալիցիան եւ Հայ Յեղափոխական Դաշնակցութիւնը ՀՀ նախագահի աջակցութեամբ կնքում են համագործակցութեան սոյն համաձայնագիրը յանուն՝
– Կառավարութեան գործունէութեան ծրագրի եւ Հ.Յ.Դ.ի նախընտրական ծրագրի մեծապէս համընկնող նպատակների իրականացման,
– Հայաստանի Հանրապետութեան առջեւ ծառացած մարտահրաւէրների արդիւնաւէտ դիմակայման։
Համաձայնագրի կողմերը հաւաստում են իրենց կամքն ու վճռականութիւնը Համաձայնագրի նպատակների իրագործման համար։
2. ՀԱՄԱԳՈՐԾԱԿՑՈՒԹԵԱՆ ՇՐՉԱՆԱԿՆԵՐՈՒՄ ԳՈՐԾՈՒՆԷՈՒԹԵԱՆ ՍԿԶԲՈՒՆՔՆԵՐԸ
Համաձայնագրի կողմերը, առաջնորդուելով փոխադարձ յարգանքի, փոխըմբռնման, հանդուրժողականութեան, համերաշխութեան, տարաձայնութիւնները բանակցութիւնների ու քննարկումների միջոցով լուծելու սկզբունքներով, պարտաւորւում են գործել սոյն համաձայնագրի տառին ու ոգուն համապատասխան, իրականացնել միասնական քաղաքականութիւն՝ միմեանց եւ Հայաստանի Հանրապետութեան նախագահի հետ համագործակցութեամբ։
3. ՀԱՄԱՁԱՅՆԱԳՐԻ ԿՈՂՄԵՐԻ ՊԱՐՏԱՒՈՐՈՒԹԻՒՆՆԵՐԸ
Համաձայնագրի կողմերը պարտաւորւում են՝
Ա.- Ամէն ջանք գործադրել կառավարութեան ծրագրի արդիւնաւէտ իրականացման համար,
Բ.- Ապահովել համաձայնագրի շրջանակներում ձեռք բերուած պայմանաւորուածութիւնների իրագործումը իշխանութեան օղակներում գործող իրենց անդամների եւ իրենց երաշխաւորած անձանց կողմից,
Գ.- Չձեռնարկել այնպիսի քայլեր, որոնք կարող են ուղղակիօրէն կամ անուղղակիօրէն վնասել սոյն համաձայնագրում ամրագրուած նպատակները։
4. ՔԱՂԱՔԱԿԱՆՈՒԹԵԱՆ ԱՌԱՉՆԱՀԵՐԹՈՒԹԻՒՆՆԵՐԸ
Համագործակցութեան քաղաքական առաջնահերթութիւններն են՝
– Տնտեսական կայուն եւ անվտանգ զարգացումը՝ ստուերային տնտեսութեան էական կրճատմամբ, եկամուտների բաշխման առաւել արդարացի մեքանիզմների կիրառմամբ,
– Արտահանման կողմնորոշում ունեցող արտադրութեան խրախուսումը,
– Կոռուպցիայի դէմ պայքարի արդիւնաւէտութեան մեծացումը,
– Հասարակական կարգուկանոնի լիարժէք ապահովումը, երկրում բարոյահոգեբանական մթնոլորտի հետագայ առողջացումը,
– Սահմանադրական փոփոխութիւններին օրէնսդրութեան համապատասխանեցման ամբողջացումը,
– Իշխանութեան թեւերի միջեւ հակակշիռների եւ զսպումների լիարժէք համակարգի ձեւաւորման սահմանադրական երաշխիքների արմատաւորումը երկրի օրէնսդրութիւնում եւ քաղաքական համակարգում,
– Ընտրական օրէնսգրքի կատարելագործումը,
– Արդիւնաւէտ քաղաքական մրցակցութիւն ապահովող լիարժէք բազմակուսակցական համակարգի կայացումը,
– Քաղաքացիական հասարակութեան ամրապնդման համար նպաստաւոր պայմանների բարելաւումը,
– Պետական ծառայութեան բարեփոխումների աւարտումը՝ ձեւաւորելով ազնիւ եւ արդիւնաւէտ գործող կառավարման համակարգ,
– Դատական օրէնսգրքի ներդրումը՝ համակարգի գործունէութիւնը եւրոպական չափանիշներին լիարժէքօրէն համապատասխանեցնելու նպատակով։
5. ՀԱՄԱԳՈՐԾԱԿՑՈՒԹԵԱՆ ՁԵՒԱՉԱՓԸ ՊԵՏԱԿԱՆ ԿԱՌԱՎԱՐՄԱՆ ՀԱՄԱԿԱՐԳՈՒՄ
5.1. Համագործակցութեան համաձայնագրի կողմերը չորրորդ գումարման Ազգային ժողովի պաշտօններում ընտրութիւնների ժամանակ պաշտպանելու են՝
Ա.- Կոալիցիոն յուշագրի համաձայն առաջադրուած թեկնածուներին,
Բ.- Հայ Յեղափոխական Դաշնակցութեան առաջադրած թեկնածուներին ՀՀ ԱԺ նախագահի տեղակալի, ՀՀ ԱԺ արտաքին յարաբերութիւնների մշտական յանձնաժողովի նախագահի, ՀՀ ԱԺ պաշտպանութեան, ներքին գործերի եւ ազգային անվտանգութեան հարցերի մշտական յանձնաժողովի նախագահի պաշտօններում։
5.2. Համաձայնագրի կողմերը համակարծիք են, որ գիւղատնտեսութեան նախարարի ու կրթութեան եւ գիտութեան նախարարի պաշտօններում նշանակուեն Հ.Յ.Դ.ի առաջադրած թեկնածուները։
5.3. Հայ Յեղափոխական Դաշնակցութիւնը պատասխանատուութիւն է կրում պետական կառավարման համակարգում իր ներկայացուցիչների կողմից կառավարութեան գործունէութեան ծրագրի իրականացման համար։
5.4. Կողմերը կարող են հետ կանչել իրենց առաջադրած պաշտօնեաներին եւ նրանց փոխարէն առաջադրել նոր թեկնածուներ։
6. ՀԱՄԱԳՈՐԾԱԿՑՈՒԹԵԱՆ ՀԱՄԱՁԱՅՆԱԳՐԻ ՇՐՉԱՆԱԿՆԵՐՈՒՄ ԳՈՐԾՈՒՆԷՈՒԹԵԱՆ ԿԱԶՄԱԿԵՐՊՄԱՆ ԿԱՐԳԸ
Կոալիցիայի համադրող խորհրդում հայեցակարգային եւ ռազմավարական նշանակութեան փաստաթղթերի նախագծերի քննարկումներին խորհրդակցական ձայնի իրաւունքով կարող են մասնակցել Հ.Յ.Դ.ի ներկայացուցիչները։
Կողմերից մէկի առաջարկութեամբ միասնական դիրքորոշման ձեւաւորման նպատակով կարող է քննարկման առարկայ դառնալ Ազգային ժողովի եւ կառավարութեան գործունէութեանը վերաբերող ցանկացած հարց։
Չհամաձայնեցուած հարցերի վերաբերեալ կողմերից իւրաքանչիւրն ազատ է արտայայտելու սեփական այլընտրանքային դիրքորոշումը։
7. ՀԱՄԱԳՈՐԾԱԿՑՈՒԹԵԱՆ ԺԱՄԿԷՏԸ
Սոյն համաձայնագիրն սկսում է գործել ստորագրման պահից եւ ուժի մէջ է մինչեւ յաջորդ նախագահական ընտրութիւնները։
Համաձայնագիրը վաղաժամկէտ կարող է դադարեցուել անյաղթահարելի սկզբունքային անհամաձայնութեան առկայութեան դէպքում, կողմերից մէկի յայտարարութեամբ կամ կողմերի միջեւ կայացած համաձայնութեամբ։
Ստորագրութիւններ՝
Հայաստանի Հանրապետական կուսակցութիւն
«Բարգաւաճ Հայաստան»
կուսակցութիւն
Հայ Յեղափոխական
Դաշնակցութիւն
Ստորագրուած է
2007թ. Յունիսի 6ին