ՍՏԵՓԱՆԱԿԵՐՏ, Karabakh-Open Կայքէջ.- Լեռնային Ղարաբաղի Հանրապետութեան Ազգային ժողովի արտաքին յարաբերութեանց յանձնաժողովը երէկ հաղորդագրութեամբ մը պատասխանեց ԵԽ գլխաւոր քարտուղար Թերի Տէյվիսի այն սխալ գնահատականին, ուր ան «անջատողական» որակած էր Լեռնային Ղարաբաղը:
Հաղորդագրութիւնը կ’ըսէ, թէ Տէյվիս «Երեւանում աւարտելով բանակցութիւնները, անդրադարձել է տուեալ պահի իր առաքելութեան հետ առնչութիւն չունեցող խնդիրների: Մենք հասկանում ենք, որ պարոն Տէյվիսը դա արել է ի պատասխան լրագրողների հարցադրման, սական զարմանալի է, որ այլ դէպքերում դիւանագիտօրէն սակաւախօս եւրոպական պաշտօնեան թոյլ է տուել շեշտադրումներ, որոնք, մեր կարծիքով, չեն պատշաճում ոչ իրեն, ոչ այն հեղինակաւոր կառոյցին, որը ներկայացնելու պատիւն այսօր ունի նա»:
Ապա կը շարունակէ ըսելով. «Ինչ վերաբերում է ԼՂՀ իշխանութիւնների հասցէին հնչեցուած արտայայտութիւններին, ապա ստիպուած ենք պարոն Տէյվիսին նկատել տալ, որ անկախութեան ձգտող բոլոր ժողովուրդներն էլ պատմական մի որոշակի ժամանակահատուածում ստիպուած են լինում անցնել «անջատողականութեան» ճանապարհը: ԼՂՀ ժողովրդի մեղքը չէ, որ Խորհրդային Միութեան փլուզման օրերին ՄԱԿը կամ Եւրոպայի խորհուրդը հասկանալի պատճառներով չէին կարող Լեռնային Ղարաբաղում հաստատել «արտաքին կառավարում», ինչը օրինականութիւն կը տար ներկայիս անկախութեանը:
«Աւելին, այն, ինչ ՄԱԿն արել է Եւրոպայում՝ կանխելով էթնիք զտումները եւ ցեղասպանութեան սպառնալիքը, ԼՂՀ ժողովուրդն իրականացրել է բացառապէս սեփական ուժերով՝ օգտագործելով ինքնապաշտպանութեան իր անկապտելի իրաւունքը: Եթէ պարոն Տէյվիսը չի տիրապետում փաստերին, ապա ստիպուած ենք նրան յիշեցնել, որ 1991ի Նոյեմբերի 24ին Ատրպէյճանի Գերագոյն խորհրդի որոշմամբ լուծարուել է ԼՂ ինքնավար կարգավիճակը եւ պաշտպանութեան ու ներքին գործերի նախարարութեանը յանձնարարուել է «միջոցներ ձեռնարկել՝ պաշտպանելու ԼՂ ատրպէյճանցիների անվտանգութիւնը»: Եթէ սա ԼՂ բնիկ հայ բնակչութիւնը տարհանելու կամ բնաջնջելու նպատակով ընդունուած որոշում չէ, ապա խնդրում ենք, որ Եւրոպայի խորհրդի գլխաւոր քարտուղար Թերի Տէյվիսը մեկնաբանի, թէ ինչո՞ւ Ատրպէյճանի իշխանութեան բարձրագոյն մարմնի որոշման մէջ ոչ մի խօսք չկայ ԼՂ հայ բնակչութեան քաղաքացիական եւ մարդկային իրաւունքների մասին:
«Կարծում ենք, որ Ատրպէյճանի զինուած նախայարձակումը յաջողութեամբ յաղթահարած, պետական կառավարման որոշակի ուղի անցած եւ այսօր ժողովրդավարական զարգացման ձգտող Լեռնային Ղարաբաղի Հանրապետութիւնը միջազգային հանրութեան կողմից ճանաչուելու աւելի օրինական հիմքեր ունի, քան այն կազմաւորումը, որին յղում է անում պարոն Տէյվիսը»: