ԵՐԵՒԱՆ, «Արմէնփրէս».- Հայաստանի 3 միլիոն 226 հազար 700 բնակիչներէն մօտ 1 միլիոն 106 հազարը կը բնակի Երեւանի մէջ:
Ըստ ազգային վիճակագրական ծառայութեան տուեալներուն, 11 մարզերէն (բացի Երեւանէն) ամենամեծ քանակով բնակչութիւն ունի Լոռին՝ 281,900, ապա Արմաւիրը՝ 281,100 եւ Շիրակը՝ 280,800: Ամենափոքր բնակչութիւնը ունի Վայոց Ձորը՝ 55.7 հազար, կը յաջորդէ Տաւուշի մարզը՝ 134,100 եւ Արագածոտնը՝ 140,300 բնակիչով:
Մայրաքաղաքի 12 համայնքներէն ամենամեծ թիւով բնակիչ ունի Նոր Նորք համայնքը՝ 144,300, ապա Շէնգաւիթը՝ 143,400 եւ Մալաթիա-Սեբաստիան՝ 140,500: Բնակիչներու ամենափոքր թիւը Նուբարաշէնի մէջ է՝ 9.5 հազար, ապա Նորք-Մարաշ՝ 11.4 հազար: Դաւիթաշէնի մէջ կը բնակի 40.6 հազար, Աւանի մէջ’ 50.7 հազար, Քանաքեռ-Զէյթուն համայնքին մէջ՝ 78.3 հազար, Աջափնեակի մէջ՝ 107.1 հազար, իսկ Էրեբունիի մէջ՝ 120 հազար քաղաքացի: Կեդրոն համայնքի բնակիչներու թիւը 129.7 հազար է, Արաբկիրի բնակիչներու թիւը՝ 131.3 հազար:
Նշենք, որ բնակիչներուն 2 միլիոն 68 հազար 700ը քաղաքաբնակ է, 1 միլիոն 158 հազարը՝ գիւղաբնակ: