Գարեգին Բ. Ամենայն Հայոց կաթողիկոսը Հայոց Ցեղասպանութեան նահատակներու յիշատակի օրուան առիթով յղեց հետեւեալ ուղերձը.
«Դու չես լքի նրանց, ովքեր փնտռում են Քեզ, Տէր» (Սաղմ․ 9.11):
«Սիրելի՛ բարեպաշտ ժողովուրդ,
«Այսօր Հայաստանում եւ ի սփիւռս աշխարհի ոգեկոչում ենք Հայոց Ցեղասպանութեան 110րդ տարելիցը` խոնարհումով եւ աղօթքով յիշելով մեր սուրբ նահատակներին, ովքեր մարտիրոսութեան պսակն ընդունեցին «վասն հաւատոյ եւ վասն հայրենեաց»:
«20րդ դարասկզբին Օսմանեան կայսրութեան կողմից կազմակերպուած հրէշաւոր ցեղասպանութեանը զոհ դարձան մեր ժողովրդի մէկեւկէս միլիոն զաւակներ: Իրագործուած եղեռնի եւ հայրենազրկումի մեծ ողբերգութիւնները, սակայն, չկարողացան սպառել մեր ազգի կենսական ուժերը: «Ճնշուած, բայց ոչ` ընկճուած, կարօտեալ, բայց ոչ` յուսահատ, հալածուած, բայց ոչ` լքուած» (Բ Կորնթ. 4.8-9) մեր ժողովուրդը վերապրեց` ապաւինելով խաչուած եւ յարութիւն առած Փրկչին աշխարհի, վերապրեց յանուն արդարութեան ամէնօրեայ պայքարով, իր ինքնութեանը կառչած եւ Հայոց արդար դատի յաղթանակի հաւատով: Աստուածպարգեւ մեր հինաւուրց հայրենիքի հանդէպ սերը, նուիրուածութիւնն իր սրբութիւններին, հաւատարմութիւնն իր պատմութեանն ու դարաւոր յիշատակներին զօրացրեցին ազգիս աշխարհի տարբեր երկրներում նոր կեանք ընձիւղելու, իսկ Արարատի փէշերին` Արեւելեան Հայաստանում, անկախ պետականութիւն վերակերտելու: «Դու չես լքի նրանց, ովքեր փնտռում են Քեզ, Տէր»` սուրբգրային յուսառատ խօսքի հաւատով ազգիս զաւակները ամէնուր դիմակայեցին ժամանակների փորձութիւններին, կենարար աւիշ առան` ազգային-հոգեւոր իրենց կեանքը վերականգնելու, բարձր արուեստ ու մշակոյթ ստեղծելու եւ գիտութիւն ու կրթութիւն զարգացնելու:
«Յիշատակի այս նուիրական օրը, սիրելինե՛ր, աշխարհում ամէն տեղ մեր ժողովրդի զաւակները իրենց քայլերն են ուղղում դէպի եկեղեցիներ եւ Մեծ Եղեռնի յուշակոթողներ` վերանորոգելու յանձնառութեան սրբազան ուխտը` իբրեւ պետութիւն, իբրեւ Եկեղեցի եւ ժողովուրդ շարունակելու մշտական ջանքերը Հայոց Ցեղասպանութեան ճանաչման համար: Արդարեւ, մարդկութեան ու մարդկայնութեան դէմ գործուած ոճրագործութիւնները չունեն ո՛չ արդարացում եւ ո՛չ վաղեմութեան ժամկէտ: Հայոց Ցեղասպանութեան ճանաչումն ու համընդհանուր դատապարտումը առաքելութիւն է մեր ժողովրդի եւ քաղաքակիրթ ողջ մարդկութեան համար: Շնորհիւ աշխարհասփիւռ մեր ժողովրդի համախումբ ջանքերի եւ միջազգային հանրութեան աջակցութեան` բազմաթիւ երկրներ ու իրաւապաշտպան կազմակերպութիւններ իրենց ձայնն են բարձրացրել յանուն արդարութեան եւ Հայոց Ցեղասպանութիւնը ճանաչել ու որակել են որպէս մարդկութեան դէմ իրագործուած յանցագործութիւն:
«Հայոց Ցեղասպանութեան դատապարտումը չպիտի սահմանափակուի սոսկ յուշարձանների մօտ համախմբումով, այլ պիտի գործադրուեն հետեւողական քայլեր` մեր ժողովրդի հանդէպ արդարութիւնը վերականգնելու եւ կանխելու նման ողբերգութիւնները: Առանց այսօրինակ յանցագործութիւնների դատապարտման, առանց պատմական արդարութեան հետ առերեսուելու` հնարաւոր չէ խաղաղութիւն հաստատել ազգերի եւ պետութիւնների միջեւ եւ սերունդներին փոխանցել լուսաւոր ապագայ: Ապահով ու անվտանգ աշխարհ կառուցելու ճանապարհը բացառումն է բռնութիւնների, պատերազմների, ատելութեան ու թշնամանքի հրահրումների: Մեր արդար դատի պահանջատիրութիւնը չունի իր մէջ ատելութիւն ու թշնամանք: Պահանջատիրութիւնը ցուցիչն է ազգային մեր արժանապատուութեան եւ յարացոյցը` մեր սուրբ նահատակների նկատմամբ յարգանքի ու նրանց յիշատակի առջեւ մեր խոնարհումի: Պահանջատիրութիւնը մեր պատասխանատուութիւնն է գալիք սերունդների առջեւ:
«Սիրելի ժողովուրդ հայոց, մերօրեայ ծանր ու դժուարին իրավիճակում, երբ նոր ցեղասպանութեան իրականացմամբ այլեւս բռնազաւթուած եւ հայաթափուած է Արցախը, եւ Հայաստանը գտնւում է անվտանգային սպառնալիքների առջեւ, առաւել հրամայական է անսասան պահել հաւատարմութիւնը հաւատք, ազգ ու հայրենիք նուիրական արժէքներին, հրամայական է միաբանուել ու մշտապէս գործել արդարութեան յաղթանակի համար եւ վերափոխել մեր կեանքի ընթացքը` յանուն ազգային վերազարթօնքի: Տէրը չի լքում Իրեն փնտռողներին` այս անխախտ համոզումով շարունակենք արիաբար դիմակայել մեզ բաժին ընկած փորձութիւններին եւ համատեղ ուժերով բարեզարդել ազգային եւ հայրենական մեր կեանքը: Հակառակ առկայ անվտանգային սպառնալիքների եւ շարունակուող ներազգային պառակտուածութեան, հակառակ մեր իրականութեան մէջ տեղ գտնող պատմութեան ու արժէքային խեղաթիւրումների, քարոզուող այլեւայլ կեղծ ընկալումների` նախանձախնդիր լինենք հոգեւոր ու բարոյական մեր արժէքների պահպանութեանը եւ զօրանանք հայրենիքի ու ազգի հանդէպ սիրով: «Յիրաւի, մեր նախնեաց ժառանգութեան նկատմամբ հաւատարմութիւնը, համազգային համերաշխութիւնն ու հայրենիքի հանդէպ պարտքի բարձր գիտակցութիւնը երաշխիքն են մեր ազգի յարատեւութեան եւ անկախ պետականութեան գոյութեան:
«Մեր սուրբ նահատակների յիշատակն այսօր մեզ ազդարարում է հրատապութիւնը ազգային միասնականութեան: Մեր համախոհութեան մէջ է գործում Աստուած Իր օրհնութեամբ ու շնորհներով: Այս ուղիով առաջնորդուելով, սիրելիներ, պիտի կարողանանք ապահովել անվտանգութիւնն ու բարօրութիւնը մեր հայրենիքի եւ իրագործել ապագայի մեր տեսիլքներն ու երազանքները:
«Այս հաւատով աղօթք վերառաքենք առ Աստուած եւ հայցենք մեր սուրբ նահատակների բարեխօսութիւնը, որ մարդկութեան կեանքում տեղ չգտնեն եղեռնական ոճրագործութիւնները, եւ յարուցեալ Քրիստոսի շնորհների ներքոյ խաղաղ ու ապահով լինեն մեր հայրենիքն ու մեր ժողովուրդը ի սփիւռս աշխարհի, եւ յոյսով ամուր ու սիրով միասնական` ի զօրու լինենք յաղթահարելու մեր առջեւ ծառացած բոլոր փորձութիւնները:
«Թող յարուցեալ մեր Տէր Յիսուս Քրիստոսի ողորմութիւնը, օրհնութիւններն ու խաղաղութիւնը լինեն մեզ հետ եւ ամէնքի, այսօր եւ միշտ։ Ամէն»:
