ՖՐԵԶՆՕ.- Ֆրեզնոյի Ս. Երրորդութիւն Մայր եկեղեցին Կիրակի, 18 Նոյեմբերին նշեց իր հիմնադրութեան 118րդ տարեդարձը։ Այս առիթով, Արեւմտեան թեմի առաջնորդ Մուշեղ արք. Մարտիրոսեան այցելեց Ֆրեզնօ, եղաւ եկեղեցւոյ համայնքին հետ, Ս. պատարագ մատուցեց եւ ուղղեց իր պատգամը, ապա նաեւ նախագահեց եկեղեցւոյ սրահին մէջ կազմակերպուած տօնական ճաշկերոյթին։ Ս. Սեղանին սպասարկեցին եկեղեցւոյ հոգեւոր հովիւ Տաճատ վրդ. Աշըգեան եւ սարկաւագները։ Ներկայ էին Ազգային վարչութեան անդամներէն Պերճ սրկ. Աբգարեան եւ Կարպիս Պէզճեան, եկեղեցւոյ ժողովականութեան անդամներ եւ հաւատացեալներու բազմութիւն մը։
Իր պատգամին սկզբնաւորութեան, առաջնորդը շնորհաւորանքի խօսք ուղղեց համայնքի զաւակներուն եւ գնահատանքով արտայայտուեցաւ հովիւին, երեսփոխաններուն, հոգաբարձութեան ու անոնց կողքին ծառայող բոլոր անձնդիր սպասարկուներուն՝ այրերու ընկերակցութեան, տիկնանց միութեան, երիտասարդաց միութեան, դպրաց դասի անդամներուն, Կիրակնօրեայի յարկին տակ ծառայողներուն եւ համայնքի զաւակներուն, մաղթելով, որ անոնք միասնաբար եւ նոյն եռանդով կերտեն եկեղեցւոյ ու ծխական համայնքին յառաջիկայ տարեդարձները։
Սրբազանին պատգամին բնաբանն էր Ղուկասու Աւետարանի այն համարները, ուր Յիսուս կը խօսի խոնարհութեան մասին։ Ան կանգ առաւ քրիստոնեային համեստ ու խոնարհ ըլլալու նկարագիրին ու նմաններուն ծառայելու յատկանիշներուն վրայ, որ ճշմարիտ մեծութիւնն է։ «Արամ Ա. կաթողիկոսին բառերով՝ ծառայութիւնը մեր հաւատքին էութիւնն է, ծառայութիւնը կեանքի որակ, ճանապարհ, ու նպատակ է», շեշտեց առաջնորդը եւ յորդորեց հաւատացեալները այս առաքինութիւնները իրականացնելու։
Նկատել տալով, որ շուտով պիտի նշենք Գոհաբանութեան եւ Ս. Ծննդեան տօները, սրբազանը ընդգծեց կարեւորութիւնը յատկապէս նման առիթներով մեր նմաններուն հանդէպ սիրոյ, բարեգործութեան եւ ազնուութեան արտայայտութեանց, յիշեցնելով, որ մեր օգնող ձեռքերուն կարիքը ունին մասնաւորաբար Հայաստանի ու Արցախի մեր քոյրերն ու եղբայրները, յորդորելով մասնակցիլ թելեթոնին։
Սրբազանը նաեւ կոչ ուղղեց աղօթք բարձրացնելու վերջին օրերուն Քալիֆորնիոյ տարբեր շրջանները պատուհասող հրդեհներու զոհերուն եւ անոնցմէ վնասուողներուն համար։
Պատգամին վերջին բաժինով, առաջնորդը յիշեցուց, որ այս տարի տօնեցինք Հայաստանի Հանրապետութեան 100ամեակը, նաեւ կը տօնենք Հիւսիսային Ամերիկայի մէջ Կիլիկեան Ս. աթոռի հովանին վայելող թեմի հիմնադրութեան 60րդ ու Արեւմտեան թեմի 45րդ տարեդարձները, որոնք հրաւէր են բոլորիս՝ շարունակելու ծառայել սիրով, խոնարհութեամբ բարի կամեցողութեամբ եւ վերանորոգ հաւատքով։ «Այս ուղիին հրաւիրուած ենք ոչ թէ անձնական փառքի համար, այլ ի փառս Աստուծոյ ու բարգաւաճման մեր եկեղեցւոյ ու ազգին», շեշտեց ան։
«Տէր Ողորմեա»ի պահուն, ա-ղօթք բարձրացուեցաւ աղէտալի հրդեհներու զոհերուն ու ծանր վնասներու ենթարկուողներուն համար, խնդրելով Աստուծմէ, որ հովանի ըլլայ բնակարան վերականգնողներուն ու պահապան՝ հրշէջներուն։ Նշենք, որ թեմի բոլոր եկեղեցիներուն մէջ եւս նոյն նպատակով աղօթք բարձրացուեցաւ։
ՃԱՇԿԵՐՈՅԹԸ
Եկեղեցւոյ սրահին մէջ տեղի ունեցաւ 118րդ ամեակի ճաշկերոյթը։ Բացման խօսքը արտասանեց օրուան հանդիսավարը՝ Առաքել Արիսեան։ Գէորգ Աճէմեան երգեց ամերիկեան ու հայկական քայլերգները։ Առաջնորդ սրբազանը կատարեց սեղաններու օրհնութիւնը։
Յանուն Ազգային վարչութեան, խօսք առաւ Պերճ սրկ. Աբգարեան, որ շնորհաւորեց ծխական համայնքը եւ գնահատանք ուղղեց ծառայողներուն։ Այրերու ընկերակցութիւնն ու տիկնանց յանձնախումբը ներկայացուցին իրենց աշխատանքներուն տեղեկագիրը եւ մատուցեցին եկեղեցւոյ իրենց տարեկան նուէրները։ Հոգաբարձութեան ատենապետ Պիլ Սաաթճեան շնորհակալութեան ու գանահատանքի խօսք ուղղեց զոյգ միաւորներուն, ինչպէս նաեւ գնահատանք արձանագրեց հոգեւոր հովիւին, իր անձնդիր ծառայութիւններուն համար։
Հայր Տաճատ ուղղեց իր խօսքը, ապա ներկայացուց Ֆրեզնոյի Բժիշկներու ընկերակցութիւնը եւ շնորհակալութիւն յայտնեց իրենց մարդասիրական ծառայութեանց համար։
Հոգաբարձութիւնը այս տարի եւս գնահատանքի արժանացուց եկեղեցւոյ բազմամեայ ծառայութիւն մատուցած ծխականները։ Յուշանուէրներու արժանացան՝ Սրբուհի Մսըրլեան, Լիւսիլ Գահուէճեան եւ Եդուարդ Մկրտիչեան։ Յուշանուէր մը յանձնուեցաւ նաեւ Բժիշկներու ընկերակցութեան, որուն գործունէութեան մասին տեսերիզով ներկայացում մը կատարեց Ալեն Եկմալեան։
Եզրափակիչ խօսքը արտասանեց առաջնորդը. ան շնորհաւորեց համայնքի զաւակները եւ գնահատեց հայր Տաճատը՝ իր նուիրեալ ծառայութեան համար։ Ան շեշտեց հոգեւոր հովիւին հետ գործակցութեան կարեւորութիւնը, «որ պիտի ամրապնդէ յարաբերութիւնները եւ պիտի նպաստէ յաջողութեան», գնահատանք արձանագրեց նաեւ եկեղեցւոյ կամաւոր ծառայողներուն, շնորհաւորեց պատիւի արժանացողները եւ Բժիշկներու ընկերակցութիւնը՝ անոր ծառայութեան համար։
Տօնախմբութիւնը աւարտին հասաւ «Կիլիկիա»ի խմբերգումով։
Նշենք, որ առաջնորդ սրբազանը եւ Ազգային վարչութեան անդամներ Շաբաթ, 17 Նոյեմբերի երեկոյեան, հանդիպում ունեցան հոգեւոր հովիւին ու հոգաբարձութեան հետ, խորհրդակցելու համար անմիջական ծրագիրներու, աշխատանքի ընթացքին ու զայն աւելի եւս բարելաւելու միջոցներուն մասին։