Յարգելի ներկաներ եւ սիրելի ընկերներ,
Չեմ եկել տօնակատարութեան մասնակցելու, եկել եմ պարտքի գիտակցութեամբ մի շրջան, որի նկատմամբ ամբողջ հայութիւնը եւ մասնաւորաբար Սփիւռքը յարգանք ունի, պարտք ունի եւ սրտի դողով հետեւում է ձեր մտահոգութիւններին, ձեր անորոշութեանը եւ հակառակ առկայ առօրեայ դժուարութիւններին՝ չի կարող անտեսել, չկարեւորել ձեր ցուցաբերած համահայկական կեցուածքները՝ ի խնդիր Հայ Դատի, երկրում ինքնուրոյն կենսունակ քաղաքական ներկայութեան, ի խնդիր Լիբանանում թուրքական ուժերի ներկայութեան դէմ ձեր արի ու արթուն դերակատարութեան:
Յարգանքով ու մեծ ակնկալիքներով, գէթ՝ բարոյապէս, ձեզ հետ կիսում ենք ձեր երկրի ու գաղութի դժուարութիւնները եւ յոյս ունենք՝ վերջնական խաղաղութիւնն ու կայունութիւնը կը վերադառնայ անկախ ու ամբողջական Լիբանան, եւ դուք կը շարունակէք ձեր միասնական կեցուածքով կենսունակ ներկայութիւն լինել երկրի քաղաքական, տնտեսական կեանքում եւ ձեր կարելին չէք խնայի ներքին համերաշխութեան մթնոլորտի ստեղծման գործում:
Եւ վերջապէս, առիթը օգտագործելով՝ կոչ ունեմ ուղղելու շրջանի ազգային եւ քաղաքական ղեկավարութեանը՝ ծրագրուած ու հետեւողական աշխատանքով վերաորակաւորել ազգային, հասարակական կեանքը մեր այս կարեւոր շրջանում: Դուք ունէք մեծ ներուժ, օրինակելի աւանդութիւններ, եւ մեծ են մեր ժողովրդի ակնկալիքները այս շրջանից:
Դաշնակցութեան 117ամեակ… Քանի ամեակներ ենք նշել եւ չենք յոգնում նշելուց, չենք յոգնում նշելուց, որովհետեւ բան ունենք ասելու, գործ ունենք կատարած, հաշիւ ունենք տալու: Այն օրը, երբ աւելորդ կը համարենք այս օրուայ նշումը, կը նշանակի՝ սովորական ենք դարձել, ձանձրալի ու անբան:
Ի հեճուկս Դաշնակցութեանը չսիրողների՝ կրկին եկել ենք, բաց ճակատով ենք եկել մեր ժողովրդի մօտ, ներկայացել ենք մեր ժողովրդին, ու ի սկզբանէ տարակուսանքի մէջ ենք. խօսենք արածի,՞ թէ՞ անելիքի մասին: Հաշիւը արածի մասին են ներկայացնում, բայց ամէն մի հաշուետուութեան մէջ կայ ինքնաբաւարարուածութեան նշան: Մենք չունենք այդ զգացումը: Մեր անելիքը առջեւում է:
Կարեւորութեան աստիճանները նկատի չունենալով՝ նշենք անցած տարուայ ընթացքում մի քանի ձեռքբերումների մասին եւ անցնենք առաջ.
– ԱՄՆին չյաջողուեց Հայաստանի Հանրապետութիւնում դեսպան նշանակել այն անձին, որը մերժել էր Ցեղասպանութեան փաստը:
– ԱՄՆ Քոնկրէսի Արտաքին հարցերի յանձնաժողովի կողմից ճանաչուեց Հայոց Ցեղասպանութիւնը՝ հաստատելով 106րդ բանաձեւը:
– Լեռնային Ղարաբաղի Հանրապետութիւնում համաժողովրդական հանրաքուէի միջոցով յաջողուեց ԼՂՀ փաստացի սահմանները ամրագրել սահմանադրութեան մէջ:
– Հայաստանի Հանրապետութեան Ազգայի ժողովը հաստատեց օրէնք երկքաղաքացիութեան մասին:
– Եւրոպայում՝ Եւրախորհրդարանի շէնքում, գումարուեց եւրոպահայութեան երկրորդ խորհրդաժողովը:
– Չաւախքում կազմակերպուեց ժողովրդային ստորագրահաւաք, որին մասնակցում էին նաեւ տարածաշրջանի հայ պետական այրեր: Բարձրացուեցին Չաւախքի պահանջները, ինքնավարութեան մեր հարցը:
– Հայաստանի Հանրապետութեան Ազգային ժողովի ընտրութիւններին յաջողեցինք աւելի մեծ ներկայութիւն ապահովել:
– Կազմակերպուեց Հ.Յ.Դ.-ՌԱԿ համաժողովը՝ իբրեւ ապացոյց ներազգային առողջ համագործակցութեան:
– Պրիւքսէլում՝ Եւրախորհրդարանի առջեւ, կազմակերպուեց եւրոպահայութեան բողոքի ցոյցը Թուրքիայի՝ Եւրոմիութեանը անդամակցութեան դէմ:
Գիտակցաբար չեմ անդրադառնում մի շարք կարեւոր միջկուսակցական հանդիպումների, միջազգային կազմակերպութիւնների մէջ մեր ներկայութեանն ու անելիքներին, պետական կարելիութիւններ դէպի Հայաստան ուղղորդող մեր ճիգերին, երիտասարդական-ուսանողական միութիւնների մակարդակում կատարուած աշխատանքներին, Ուաշինկթընի կենտրոնում Հայ Դատի սեփական գրասենեակի ստեղծմանը, Չաւախքում Երիտասարդական կենտրոնների կառուցմանը եւ բազում հիշուող ու չհրապարակուող աշխատանքների:
Պէտք է խնայեմ ձեր ժամանակը, սակայն բացառութեան կարգով պէտք է անդրադառնամ մեր կազմակերպութեան մէկ կարեւոր որոշմանը:
Հ.Յ.Դաշնակցութիւնը Հայաստանի նախագահական ընտրութիւններին առաջադրում է ընկեր Վահան Յովհաննիսեանի թեկնածութիւնը:
Ճշմարիտ են ասել՝ քաղաքականութիւնը հնարաւորը կարելի դարձնելու արուեստն է, թէպէտ մենք մեր պատմութեան ընթացքին յաճախ պարտաւորուել ենք կարելի դարձնել նաեւ անկարելին, կամ ուրիշների կողմից անկարելի թուացող անկարելին: Սակայն անկարելին կարելի դարձնելու մեր վճռականութեան մէջ խուսափել ենք հնարաւորի ձախողման արկածախնդրութիւնից: Դաշնակցութիւնը որոշել է յաջողեցնել, կարելի դարձնել անկարելի թուացող մի նպատակ՝ ընտրութիւնների միջոցով ստանձնել երկրի նախագահութիւնը:
Մեր կողմից հնարաւոր այդ նպատակն ինչո՞ւ է անկարելի համարւում ուրիշների կողմից: Հրապարակի, մամուլի եւ զանազան վայրերում հնչած կարծիքներն է, որ կը փորձեմ ամփոփել այժմ եւ միաժամանակ կը փորձեմ յստակեցնել հարցերը:
Թէ ինչո՞ւ են անկարելի համարում մեր յաղթանակը, ինչո՞ւ են կասկածամտօրէն վերաբերւում մեր պայքարի իրական նպատակներին.
1.- Թուլամորթները ամենազօր են համարում իշխանութիւններին, որոնց դէմ, իբրեւ, «խաղ չկայ»:
– Անշուշտ, ամենազօրի հարց գոյութիւն չունի, առկայ է միահեծանութեան վտանգ, եւ այդ վտանգը բացառելու համար ամենաիրական երաշխիքն է մեր յաղթանակը: Ամենազօրութեան մասին չափազանցուած վերագրումները իշխանութիւններին աւելի շատ հետեւանք է անկազմակերպուածութեան, անզօրութեան, թող թոյլ տրուի ասելու՝ նաեւ վախկոտութեան ու թուլամորթութեան:
Չպէտք է մոռանալ. ամենազօրը ժողովուրդն է եւ արդարութեան համար պայքարող կազմակերպուած եւ զոհաբերութեան պատրաստ հաւաքականութիւնները: Ի հարկէ, այլ խօսք է, որ ինչպէս նախկինները, այսօր էլ կան մարդիկ, ովքեր աւելորդ ինքնավստահութիւնից ելնելով են յանգում այն սին համոզումին, թէ իրենց դէմ խաղ չկայ:
Քաղաքական-պետական կեանքում քաղաքական ուժեր, դէմքեր յաճախ նաեւ կործանւում են, երբեմն՝ նաեւ վերջնականապէս, ինքնասիրահարուածութեան, չափազանց ինքնավստահութեան պատճառով: Անցեալը սպառուած է, ներկան ինքնասպառման վտանգի է ենթակայ: Անցեալը սպառնում է ցնցում, յեղաշրջում, որը ոչ մի լաւ բան իր հետ չի բերելու, գալիս է անցեալը՝ կրկնուելու, ազգայինը կործանելու: Ներկան յամառում է իր միահեծան տիրապետութիւնը ստեղծելու: Եւ այս իրողութիւնը ամենահիմնական պատճառն է մեր հրապարակ գալու համար: Մենք յայտ ենք ներկայացնում երկրի պետական կարգը, քաղաքական դաշտը կարգաւորելու, հաւասարակշռելու համար, մենք յայտ ենք ներկայացնում մեր կեանքը աւելի քաղաքակիրթ դարձնելու, զարգացման համար իրաւահաւասար, արդար փոխյարաբերութիւններ եւ իրական կարելիութիւններ ստեղծելու համար:
2.- Կասկածամիտները ենթադրում են, թէ Դաշնակցութիւնը աւելի քան 10 տարի իշխանութիւնների հետ լինելով՝ այսօր չի կարող, չի համարձակուի, անյարմար կը զգայ սեփական թեկնածուով ասպարէզ գալ, եւ այդ առումով ներկայիս յայտը ժամանակաւոր է եւ յետին նպատակ է հետապնդում:
– Շատերն այդպէս էլ չհասկացան Դաշնակցութեանը եւ իրենց արշինով փորձեցին չափել նաեւ մեզ, սակայն մէկ աւելորդ անգամ էլ փորձենք բացատրել. Դաշնակցութիւնը համագործակցել է իշխանութիւնների հետ յստակ նպատակներ հետապնդելով եւ բացայայտ սկզբունքների հիման վրայ: Իշխանութիւնը մեզ չի հրամցուել, իբրեւ կաշառք չի ներկայացուել, համագործակցութեան ամբողջ ընթացքում չենք նոյնացել իշխանութիւնների հետ, չենք դադարել մեր կողմից յայտարարուած արժէքների, նպատակների, տեսակէտների համար պայքարելուց, չենք խուսափել բարձրաձայնել այն ամէնի մասին, ինչին հետ համաձայն չենք եղել, տարբերուել ենք իշխանութիւններից:
Մենք բացայայտ ենք գործել, մենք ո՛չ իշխանութիւններին, ո՛չ մեր գործընկերներին եւ ո՛չ էլ մեր ժողովրդին ենք փորձել նուազագոյն չափով այլ կերպ ներկայացնել իրականութիւնը: Այն, ինչի համար մենք եղանք իշխանութիւնների հետ, անարդիւնք չէր, եւ դրա համար ոչ միայն ափսոսելու բան չունենք, այլեւ հակառակը: Մենք ոչ մէկին պարտական չենք եւ համարձակութեան խնդիր չունենք, անյարմար զգալու պատճառ չունենք: Այո, մենք իշխանութիւնների հետ համագործակցութեան իսկ ժամանակ եղել ենք թէ՛ իշխանութիւններին եւ ոչ միայն նրանց, նաեւ ընդդիմութիւններին իրական այլընտրանք, որովհետեւ անցեալի ու ներկայի իշխանութիւնների, իշխանութեան ու ընդդիմութեան ճակատում գտնուած ուժերը շատ բաներում են իրարից տարբերւում, սակայն տնտեսական, ընկերային հարցերում, ուր մեր ժողովրդի հիմնական դժգոհութիւնների պատճառներն են առկայ, նրանք նոյնն են: Այս հարցերում մենք ենք իրենց իրական այլընտրանքը:
3.- Յոռետեսները կանխագուշակում են. 10 երկար տարիներ իշխանութիւնների հետ լինելով եւ այսօր սեփական թեկնածուով ասպարէզ դուրս գալով՝ Դաշնակցութիւնը ենթարկուելու է թէ՛ իշխանութիւնների եւ թէ՛ ընդդիմութեան հարուածներին: Այլ խօսքով՝ ըստ նրանց, ո՛չ իշխանութիւն, ո՛չ ընդդիմութիւն Դաշնակցութեան որդեգրած քաղաքական ուղին դատապարտուած է ձախողման:
– Այսօր իշխանութիւնը բեւեռացած է Սերժ Սարգսեանի առանցքի շուրջ, իսկ ընդդիմադիր բեւեռը՝ Լեւոն Տէր Պետրոսեանի: Երկուսն էլ, իրենց ձախող քարոզչական աշխատանքով, մէկը միւսին հզօրացնելով են զբաղուած: Ամենայն համոզումով ու հպարտութեամբ յայտարարում ենք՝ մենք այս իշխանութեան հետ նոյնը չենք եւ առաւել՝ այս տեսակ ընդդիմութեան նման չենք ու հետը չենք, չենք կարող լինել: Մենք պատճառաբանուած ու հիմնաւորուած այլընտրանք ենք այս իշխանութիւններին ու այս ընդդիմութեանը: Փաստը մնում է փաստ. իշխանութիւնները հանդուրժում են մեզ, ընդդիմութիւնը հասկանում է մեզ: Մենք այս իրաւունքը վաստակել ենք: Այդպէս էլ չլինէր՝ ողբերգութիւն չէր լինի:
4.- Ի սկզբանէ հոգով պարտուածները կարծում են՝ իշխանութիւնները ունեն կարողութիւն ու ցանկութիւն՝ ընտրութիւնները կեղծելու, հետեւաբար՝ անիմաստ է ընտրութիւնների միջոցով հարցեր լուծել:
– Անշուշտ, հաստատման առաջին բաժինը ճիշդ է, սակայն սխալ է հետեւութիւնը: Անկեղծ լինելու համար պէտք է հաստատենք, որ իւրաքանչիւր ընտրութիւն նախորդից աւելի լաւ ընտրութիւններ են, եւ այդ համեմատական լաւը արձանագրւում է մեր եւ ուրիշների մասնակցութեամբ, պայքարով: Չի կարելի պատկերացնել, որ կարելի է սպասել մինչեւ այն օրը, երբ լաւ ընտրութիւններ կÿունենանք եւ յետոյ մասնակցենք ընտրութիւնների:
Որքան մենք լաւ կազմակերպուենք, որքանով կուսակցութիւնները ունենան գիտակից, անկաշառ, քաջ անդամներ, այդչափով էլ կը պարտաւորեցնեն իշխանութիւններին՝ լաւ ընտրութիւններ կազմակերպելու:
5.- Չարագուշակները մտորում են՝ նախկին իշխանութիւնների վերադարձի եւ դրա իբրեւ հետեւանք՝ երկրի քաղաքական կուրսի մէջ փոփոխութեան վտանգն այնքան մտահոգիչ է, որ Դաշնակցութիւնը վերջապէս այդ վտանգը բացառելու համար ընդհանուր ճակատ կազմելու անհրաժեշտութեան դիմաց կը զիջի իր շանսը:
– Բաւական է անընդհատ պարտաւորուենք վատի ու վատագոյնի միջեւ ընտրութիւն կատարել: Մենք ձեւաւորում ենք լաւի, դրականի հզօր կողմը եւ մեր ժողովրդին ընձեռում ենք հնարաւորութիւն ու կարելիութիւն՝ լաւն ու դրականը ընտրելու:
Անցած 17 տարիներին մեր գլխաւոր ձեռքբերումը անկախութիւնն է եղել ու Ազատ Արցախը: Այն, ինչ այսօր կենսական անհրաժեշտութիւն է ու համաժողովրդական պահանջ՝ արդարութիւնն է, ընկերային արդարութիւնն է, ժողովրդավարութիւնն է ու ազատ մրցակցութիւնը, օրէնքի առջեւ բոլորի հաւասարութիւնը, իշխանութեան ու օրէնքի անաչառութիւնն է ու ժողովրդական բոլոր շերտերի պաշտպանուածութիւնը: Պետական համակարգը, իշխանութիւնները՝ անցեալի ու ներկայի տեսքով, ոչ թէ մէկը միւսին փոխարինելու հարց ունեն, այլ պէտք ունեն փոփոխութիւնների, որակաւորման, մաքրման: Ով որ յամառի, ականջալուր չդառնայ համաժողովրդային այս պահանջին՝ լրջօրէն ռիսքի է ենթարկում կարծեցեալ իշխանութիւնն ու իշխանութեան յարատեւութիւնը:
Ընդդէմի հասկացողութեամբ շարժում ձեւաւորելու նպատակ չենք հետապնդում, ոչ էլ աչքակապութեամբ ենք ուզում զբաղուել, իրերը կոչելու ենք իրենց անունով:
Անցեալի եւ ներկայի միջեւ, անշուշտ, կան էական տարբերութիւններ, սակայն նրանք ապացուցել են, որ ի վիճակի չեն արդարութիւն հաստատել, ի վիճակի չեն անաչառ լինել, ժողովրդավարութիւնը նրանց համար միայն արտաքին աշխարհի ճնշումներից ազատուելու պարտադրուած համակարգ է: Մենաշնորհը, անարդարութիւնը այն ճիւղն է, որի վրայ նստած են իրենք եւ չեն կտրելու: Նրանք հաւատացած են՝ հարստութիւնն է ուժի աղբիւրը, ոչ թէ արդարութիւնը, վախն է ժողովուրդներին ղեկավարելի դարձնում, ոչ թէ օրինականութիւնը, արդարութիւնն ու անաչառութիւնը՝ ղեկավարման արուեստը:
Մարդ-քաղաքացին նրանց համար գնահատւում է գոռոզութեան, անխղճութեան աստիճանով, թիկնապահների թուով, դրամատնային հաշուով, ինքնաշարժի մոտէլով: Արուեստն ու մշակոյթը նրանց համար ծիտիկների թռվռոց է կամ երջանկայիշատակ «Մարիանա»ի» հերոսուհու մեծարում: Գիտութիւնը՝ ամէն գնով աւարտական փաստաթղթի ձեռքբերման փաստ: Մենք, նրանց համեմատութեամբ, տարբեր աշխարհներում ենք ապրում, աւելի ճիշդ՝ աշխարհն այլ կերպ ենք ընկալում:
Մենք այլընտրանք ենք: Մենք այլընտրանք ենք ոչ միայն մեր տնտեսական քաղաքականութեամբ, ընկերային համոզումներով, նաեւ՝ բարոյական արժէքների ընկալումներով:
6.- Թերահաւատները կանխատեսում են՝ Հայաստանի Հանրապետութեան ժողովուրդը դեռ քաղաքականօրէն ամբողջութեամբ կազմակերպուած չէ եւ հեռու է գիտակցաբար ընտրութիւն կատարելու հնարաւորութիւնից: Նման միջավայրում աւելի շատ դերակատար են ընտրակաշառքը եւ ամբոխավարութիւնը:
– Առանց աւելորդ յաւակնութիւնների՝ մենք համեմատական առումով ամենակազմակերպուած քաղաքական ուժն ենք, թէպէտ այս առումով դեռ խնդիրներ եւ բարձունքներ ունենք լուծելու եւ նուաճելու, իսկ մեր մասնակցութիւնը ցանկացած ընտրութիւնների էականօրէն նպաստում է ժողովրդի քաղաքականացմանը եւ մեր կազմակերպութեան առաւել հզօրացմանն ու ժողովրդականութեան ամրապնդմանը: Մենք ընտրապայքարի ենք ելնում քաղաքական, գաղափարական աշխատանք ծաւալելով: Այլ ելք չկայ ընտրակաշառքների եւ ամբոխավարութեան դէմն առնելու. միայն քաղաքականապէս հասուն եւ բարոյական արժէքներով ապրող հասարակութիւնն է, որ կուլ չի գնայ ընտրակաշառքների ժամանակաւոր գայթակղութիւններին ու ամբոխավարութեանը:
7.- Տատանուողները հետեւութիւն են անում. Դաշնակցութեան ժողովրդականութիւնը՝ ռէյթինկը, միշտ էլ աւելի մեծ է եղել, քան իր ղեկավարներից որեւէ մէկի՝ առանձնաբար ունեցած ժողովրդականութիւնը, եւ այդ ժողովրդականութիւնը բաւարար չէ յաղթանակ ապահովելու համար:
– Այս հաստատումի մէջ մեզ համար՝ Դաշնակցութեան համար, կայ դրական գնահատական, սակայն պէտք է նկատի ունենալ, որ այդ տպաւորութիւնը հետեւանք է աւելի շատ այն իրողութեան, որ հրապարակում միշտ կան նախագահի յաւերժական թեկնածուներ, որոնք իրենց՝ յաճախ չունեցած ռէյթինկը ձեւաւորել են տասնեակ տարիների եւ մի քանի նախագահական ընտրութիւնների ընթացքում, իսկ մեր Վահանը հազիւ մի քանի շաբաթուայ նախագահի թեկնածու է եւ արդէն իսկ վաստակել է մրցակցութեան ու յաղթելու իրական, մեկնարկային հնարաւորութիւն:
Վահան Յովհաննիսեանն արժանի թեկնածու է: Նայէք ձեր շուրջը, տեսէ՛ք, թէ ով՝ ով է, եւ գնահատէ՛ք մարդկանց: Վահանը չար չէ, այլ բարի, բացասական կերպար չէ, այլ դրական ու պայծառ, վախկոտ ու լպրծուն չէ, այլ՝ քաջ ու կայուն, գլուխգովան ու պարծենկոտ չէ, այլ՝ համեստ ու խոհեմ: Վահանը անցել է երկար ճանապարհ, Ղարաբաղի պայքարի բովով է անցել. Ղարաբաղում չէր ապրում, եւ պայքարը չէր, որ գտել էր նրան, այլ գիտակցաբար ինքն էր փնտռել պայքարը՝ Ղարաբաղը: Ղարաբաղի պայքարը նրա համար նպատակ էր, ոչ թէ քաղաքական ասպարէզի միջոց, նա Ղարաբաղը չի յիշել Ազգային ժողովի աթոռին տիրանալուց յետոյ: Նա քաղաքական պայքարի ինքնուրոյն ուղի է անցել, նա բոլոր ժամանակների իշխանութիւնների մէջ ու կողքին չի եղել, ժամանակին նրանց համար լծակ չի եղել, նրանց գովքը չի հիւսել, այլ սեփական կեցուածքով ու պայքարով է նուաճել իր ձեռք բերածը: Հալածուել է բայց չի կոտրուել, յաջողել է՝ ինքը իրեն պարտադրել:
Դաշնակցութիւնը գիտակցաբար է ճամբայ ելել նախագահական ընտրապայքարի, եւ մեր քաղաքականութիւնը, մեր մարտավարութիւնը բաց է ու պարզ: Եւ որովհետեւ բաց է ու պարզ, ոմանց մէջ առաջացնում է կասկածամտութիւն, խաղ է թւում մեր արածը, յետին նպատակներ են վերագրւում մեզ, բայց որովհետեւ բաց է ու պարզ, նաեւ մաքուր է, համարձակ ու յաղթելու ներուժով օժտուած:
Արդարեւ, դժուար է մեր ուղին, որին դէմ ենք դնում մեր հաւաքական, դաշնակցականներիս հաւաքական կամքը: Մենք չունենք որեւէ պետութեան թիկունքը, չունենք ընտրակաշառքի համար փողեր, չունենք ահաբեկելու լծակներ, չունենք էժան խօսքի, ամբոխավարութեան, աներեսութեան պերճանքները: Մենք ճամբայ ենք ելել՝ յոյսը դնելով մեր տրամաբանական խօսքի, մեր ճշմարտութեան, կենսագրութեան, տքնաջան աշխատանքի եւ մեր սիրելի ժողովրդի գիտակցութեան վրայ: Մերն է յաղթանակը, որովհետեւ մերն է ճշմարտութիւնը, բարոյականութիւնն ու կամքը:
Մենք լրջօրէն խորհրդակցութիւններ ենք սկսել ազգային մի քանի ուժերի հետ, որպէսզի առաւել հզօրութեամբ մասնակցենք նախագահական ընտրութիւններին: Մենք տոգորուած ենք վճռականութեամբ ու բարեացակամութեամբ, յոյս ունենք՝ յանուն մեր հայրենիքի եւ ժողովրդի բարօրութեան երկարացրած ձեռքը անպատասխան չի մնայ, եւ մեր օրինակը աւելի մեծ խթան կը դառնայ բոլորի համար՝ այս ընտրութիւններով փոխելու մեր կեանքը, քաղաքական կայունութեան պայմաններում ապահովելու փոփոխութիւններ:
Իշխանութեան տենչը չէ, որ պատճառ է դարձել համագործակցութեան ձեռք մէկնելուն: Մեզ համար իշխանութիւնը ինքնանպատակ չէ, մենք պատրաստ ենք համագործակցելու բոլոր նրանց հետ, ովքեր բաժանելու են մեր պատկերացումները ու բարոյական հասկացողութիւնները:
Իշխանութիւնը մեզ համար մեր շրջապատի հարստացման միջոց չէ, իշխանութիւնը մեզ համար ազգի պոտենցիալ հնարաւորութիւնների կազմակերպման ու նպատակային ուղղուածութիւն տալու միջոց է: Իշխանութիւնը մեզ համար միջոց է ազգի անվտանգութիւնն ու յարատեւութիւնը ապահովելու համար: Իշխանութիւնը մեզ համար միջոց է ժողովրդի բոլոր շերտերի զարգացման կարելիութիւնն ստեղծելու համար: Ժողովրդի բոլոր շերտերի նկատմամբ հոգատարութեան դրսեւորման դէպքում միայն, հնարաւոր է ազգի համախմբումը մեր հետապնդած նպատակների շուրջ:
Մենք ոչ թէ իշխելու, այլ ղեկավարման նպատակ ենք հետապնդում, իսկ ղեկավարելու համար պէտք է ժողովրդին քո կողքին ունենաս: Բարօրութեան եւ արդարութեան մթնոլորտում է հնարաւոր հասնել ստեղծագործող մարդու եւ հասարակութեան մակարդակի:
Մենք այլընտրանք ենք, եւ այս համոզումը մեր իշխանատենչութիւնն ու մեծամտութիւնը արդարացնող հնարք չէ, նրանց էութիւնն է մեր տեսակը արժեւորել եւ անխուսափելի անհրաժեշտութիւն դարձրել:
Մենք գիտակից ենք մեզ վիճակուած առաքելութեան, մենք գիտակից ենք ժողովրդի ակնկալիքներին եւ ահա հրապարակ ենք իջնում եւ մեր հերթին ակնկալում ու կոչ ուղղում մեր ժողովրդի բոլոր շերտերին, բոլոր բոլորին՝ անհատ առ անհատ:
Համախմբուէ՛ք Դաշնակցութեան շուրջ, Դաշնակցութեան նախագահի թեկնածուի շուրջ: Մենք յաղթելու ենք միասին:
Հայ մտաւորականութիւն, քաղաքականացած, մտածող հասարակութիւն, դուք, որ կեանքում կարող էք արժեւորել ընդհանուրի շահն ու բարոյական արժէքները, դուք, ում վիճակուած է լուծումներ գտնել ընդհանուրի համար, մեր դռները բաց են ձեր առաջ, միացէ՛ք մեզ եւ ձեր մտքի հզօրութեամբ ու աշխատանքով առաւել հզօրացրէք մեր երթը:
Հայ աշխատաւոր ու գիւղացի, միացի՛ր մեր երթին, քեզ հարազատ կուսակցութեանը, քո իրաւունքների, քո վաստակի պաշտպան կազմակերպութեանը: Մենք չենք կարող քեզ ընտրակաշառքներ տալ, սակայն մենք քո մնայուն շահերի պաշտպանն ենք, մենք մեր հայրենիքի ամբողջական ազատագրմանը զուգահեռ՝ ձգտում ենք նաեւ մեր ժողովրդի ամբողջական ազատագրմանը: Չի կարող որեւէ ժողովուրդ ազատ լինել, եթէ դեռ առկայ է տնտեսական շահագործումը: Ուրեմն՝ առա՛ջ դէպի ընդհանուր ազատագրում:
Հայ ձեռներէց, արհեստաւոր զարգացումն ու առաջընթացը հնարաւոր է միայն արդարութեան, օրինականութեան մթնոլորտում, միացէ՛ք մեզ, որպէսզի իրականութիւն դառնայ մեր բոլորի երազած հայրենիքը:
Հայ երիտասարդութիւն, ուսանողութիւն, մենք ձեր կազմակերպութիւնն ենք. երիտասարդութեան գլխաւոր յատկանիշը համարձակութիւնն է ու անկեղծութիւնը: Միացէ՛ք մեզ, եւ մեր յաղթանակը անխուսափելի կը լինի:
Բոլոր-բոլորդ, միացէ՛ք մեզ, ետ չմնաք, մեր երթից դուրս չմնա՛ք, մենք գնում ենք յաղթելու:
