Ս. Էջմիածինի Գերագոյն հոգեւոր խորհուրդը 13 Յունիսին յայտարարեց, որ՝ օրհնութեամբ եւ նախագահութեամբ Ամենայն Հայոց Գարեգին Բ. կաթողիկոսին, համախմբուելով Մայր Աթոռ Սուրբ Էջմիածինի մէջ, օրակարգային հարցերու քննարկումներուն ընթացքին խոր մտահոգութեամբ անդրադարձ կատարեցին հայրենիքի առջեւ ծառացած ներքաղաքական հարցերուն եւ արտաքին ապահովական մարտահրաւէրներուն:
Նշեալ յայտարարութիւնը՝ ստորեւ.
«Յետ-պատերազմեան շրջանում Հայաստանի իշխանութիւնների վարած քաղաքականութիւնը եւ յատկապէս վերջերս սահմանազատման եւ սահմանագծման գործընթացի անուան ներքոյ կատարած տարածքային միակողմանի զիջումները հիմնաւոր նոր անհանգստութիւնների ու տագնապների պատճառ են դարձել ինչպէս հայրենիքում, այնպէս եւ Սփիւռքում, տեղիք տուել անվստահութեան ձեւաւորման՝ յանգեցնելով նաեւ Հայաստանի վարչապետի հրաժարականի պահանջին:
«Հայրենիքի առջեւ ծառացած անվտանգային մարտահրաւէրների շուրջ ժողովրդի բարձրաձայնած մտավախութիւնները, ազգային կառոյցների եւ մասնագիտական հանրոյթի կոչերն ու յորդորները, սակայն, անտեսւում են ՀՀ իշխանութիւնների կողմից եւ կամ հակադարձւում հաւանական պատերազմի սպառնալիքներով: Իսկ հանրային ստուար շրջանակներում իշխանութիւնների նկատմամբ ձեւաւորուած արդարացի դժգոհութիւնները, որ դրսեւորւում են բողոքի եւ անհնազանդութեան խաղաղ գործողութիւնների միջոցով, փորձ է արւում լռեցնել ցուցարարների նկատմամբ արժանապատուութեան նսեմացմանն ուղղուած գործողութիւններով եւ բռնի անհամաչափ ուժի գործադրութեամբ:
«Խստիւ դատապարտում ենք Յունիսի 12ին Երեւանում խաղաղ հաւաքի մասնակիցների նկատմամբ ձեռնարկուած ակնյայտ ապօրինի քայլերը եւ գործադրուած միջոցները, ինչի հետեւանքով ցուցարարների եւ ոստիկանների շրջանում կան բազմաթիւ տուժածներ, այդ թւում՝ մարմնական ծանր վնասուածքներով:
«Մեր կոչն է ՀՀ իշխանութիւններին զերծ մնալ բռնութիւնից, ատելութիւն եւ թշնամանք սերմանելու մերժելի դրսեւորումներից: Մեր կոչն է նաեւ իրենց բողոքի ձայնն արտայայտող հայրենակիցներին գործել ամենայն զգօնութեամբ եւ օրինայարգութեամբ: Ներկայ վտանգաշատ կացութիւնը կարօտ է արժանապատիւ հանգուցալուծումների, առկայ ճգնաժամը՝ հանդարտութեան եւ զգաստութեան մէջ քաղաքական երկխօսութեան:
«Դատապարտելի է նաեւ, որ իշխանութեան բարձրաստիճան ներկայացուցիչներն ու նրանց աջակից անձերը հետեւողականօրէն լծուել են հանրահաւաքների կազմակերպման պատասխանատուութիւնը Եկեղեցուն վերագրելու անհիմն եւ ստայօդ լուրերի տարածմանը՝ փորձելով արդարացնել հակաեկեղեցական իրենց կեցուածքը, որի ամօթալի դրսեւորումներից էր Մայիսի 28ին Սարդարապատի յուշահամալիրում Ամենայն Հայոց կաթողիկոսի եւ եկեղեցականների դէմ հրահրուած սադրանքը:
«Բոլոր ժամանակներում հայրենի իշխանութիւնների կոչումն ու առաքելութիւնն է ներհասարակական համերաշխութեան պահպանումը եւ համազգային միաբանութեան ձեւաւորումը, ինչը կենսականօրէն անհրաժեշտ է յատկապէս մերօրեայ պայմաններում: Իշխանութիւնն ինքնին որեւէ մէկի կամ որեւէ քաղաքական ուժի համար չպէտք է լինի սոսկ ձգտում, այլ առաջին հերթին՝ միջոց ժողովրդին եւ հայրենիքին խոհեմ, շրջահայեաց ու անձնուրաց ծառայութեան եւ խաղաղ ու ապահով կեանքի կերտման:
«Հաւատում ենք, որ հայրենիքի հանդէպ սէրը եւ պատասխանատուութիւնը պիտի հարթեն շաւիղները՝ համազգային մեր ներուժն ու բոլոր կարողութիւնները ի սպաս դնելու Հայաստանի Հանրապետութեան պաշտպանութեանն ու զօրացմանը եւ իրականութեան կոչելու ապագայի համընդհանուր մեր տեսլականը:
«Թող Ամէնողորմ Տէրը համերաշխ ու միասնական պահի ու պահպանի աշխարհասփիւռ մեր ժողովրդին եւ հայրենի մեր երկիրը խաղաղ ու անվտանգ ընթացքով առաջնորդի դէպի լուսաւոր նոր հանգրուաններ»:
