ԵՐԵՒԱՆ, «Լրագիր».- 13 Յունիսին, իր մահկանացուն կնքեց Հայաստանի ժողովրդական արուեստագէտ, դերասան Ռաֆայէլ Քոթանջեան, որ ծնած է 1942ին, Թիֆլիս։ Ան 1946ին, իր ընտանիքին հետ տեղափոխուած է Երեւան:
1960-1964 ուսանած է Երեւանի գեղարուեստա-թատերական հիմնարկի դերասանական բաժանմունքին մէջ, ուրկէ աւարտած է: 1964-1966 իբրեւ դերասան եւ բեմադրիչ աշխատած է Զանգեզուրի Շիրվանզադէի անուան թատրոնին մէջ:
1980ին արժանացած է վաստակաւոր արուեստագէտի կոչման, 2003ին՝ Հայաստանի ժողովրդական արուեստագէտի կոչման, Հայաստանի մշակոյթի նախարարութեան ոսկի մետալին եւ Հայաստանի «Մովսէս Խորենացի»ի մետալին, 2017ին՝ «Հայրենիքին մատուցած ծառայութիւններու համար» առաջին աստիճանի շքանշանին եւ այլ պարգեւներու:
Ան դերեր ստանձնած է բազմաթիւ ներկայացումներու մէջ, ինչպէս նաեւ՝ հայկական եւ արտասահմանեան ժապաւէններու՝ «Ադամանդէ Ձեռքը» (1968), «Տղամարդիկ» (1972), «Բաղդասարը Բաժանւում Է Կնոջից» (1977), «Օտար Խաղեր» (1986), «Երեքի Սրտերում» (1992), «Ուրախ Ուղեւորութիւն» (1994), «Ծովահէնների Կայսրութիւնը» (1994), «Մեր Բակը» (1996), «Կոմսուհի Դը Մոնսորօ» (1997), «Ռոքսօլանա» (1998-2003), «Կախարդի Եօթերորդ Մատանին» (1998), «Սէրը Չար Է» (1999), «Մեր Բակը 3» (2006), «Պոպրիշչին» (2007), «Մի Նայիր Հայելուն» (2009), «11:41» (2015) եւ այլն:
