Աւելի քան 80 հիւրերի մասնակցութեամբ, Ուրբաթ, Հոկտեմբերի 25ին տեղի ունեցաւ Շամլեան Ազգ. վարժարանի մարզասրահի օգտին դրամահաւաքի միջոցառումը, որը ջերմօրէն հիւրընկալուեց տէր եւ տիկին Գէորգ եւ Միրնա Քաջարեանների գեղատեսիլ բնակարանում:
Հիւրընկալ Քաջարեանների բարի գալստեան խօսքերից յետոյ, հիւրերը համախմբուեցին բնակարանի ընդարձակ բակում, ուր ջազային հաճելի երաժշտական մթնոլորտում ճաշակեցին համադամ ճաշեր:
Միջոցառման բացման խօսքն ասաց մարզասրահի դրամահաւաքի յանձնախմբի ատենապետ Րաֆֆի Քէնտիրճեանը, որից յետոյ բեմ հրաւիրուեց թեմիս առաջնորդ Մուշեղ արք. Մարտիրոսեանը իր օրհնութեան խօսքը փոխանցելու ներկաներին: Սրբազան հայրը անդրադառնալով երկու տարի առաջ Մեծի Տանն Կիլիկիոյ Արամ Ա. կաթողիկոսի ձեռամբ մարզասրահի հիմնօրհնէքի պատմական արարողութեանը, մեծապէս գնահատեց անցնող տարիներին մարզասրահի կառուցման ուղղութեամբ ծնողների, դրամահաւաքի յանձնախմբի եւ վարժարանի ծնողա-օժանդակ մարմնի անդադրում ջանքերը, որոնց շնորհիւ մարզասրահի վաղեմի երազը վերածուեց իրողութեան:
Վերյիշելով «Առողջ միտքը՝ առողջ մարմնի մէջ» ժողովրդական ասացուածքը, սրբազան հայրը վստահութիւն յայտնեց, որ մարզասրահի կառուցմամբ աշակերտները հնարաւորութիւն կ՛ունենան աւելի բարեյաջող կերպով հետեւելու իրենց մարմնամարզական վարժութիւններին, ինչը բարեբեր արդիւնք կ՛ունենայ իրենց կրթադաստիարակչական կեանքում: Նա իր խօսքն աւարտեց, յոյս յայտնելով, որ շուտով կ՛աւարտուեն շինարարական աշխատանքները եւ տեղի կ՛ունենայ մարզասրահի բացման հանդիսաւոր ու հոգեպարար արարողութիւնը:
Այնուհետեւ ելոյթ ունեցաւ վարժարանի տնօրէն Վազգէն Մատէնլեանը, որը բարձրօրէն դրուատելով դրամահաւաքի յանձնախմբի անխոնջ ջանքերը, շնորհակալութիւն եւ երախտագիտութիւն յայտնեց նաեւ միջոցառման հիւրընկալ տէր եւ տիկին Քաջարեաններին:
Միջոցառման մասնակիցները երաժշտական ելոյթներից ու ճաշատեսակներից բացի, վայելեցին կատակախօս Արա Պազիլի ծիծաղաշարժ ներկայացումը:
Ձեռնարկը աւարտուեց յաջողութեամբ եւ ներկաների կողմից հանգանակուեց շուրջ 27,000 դոլար մարզասրահի շինարարական շարունակուող աշխատանքների օգտին:
