ՀԱՐՑԱԶՐՈՅՑ ԺՈՂՈՎՈՒՐԴՆԵՐԻ ԴԵՄՈԿՐԱՏԱԿԱՆ ԿՈՒՍԱԿՑՈՒԹԵԱՆ ՀԱՄԱՆԱԽԱԳԱՀ ՍԵԼԱՀԱԹԹԻՆ ԴԵՄԻՐԹԱՇԻ ՀԵՏ
Վարեց՝ ԱԼԲԵՐՏ ՄԱՆԱՍԵՐԵԱՆ
ԱԼԻՆ ՕԶԻՆԵԱՆ.- Պարոն Դեմիրթաշ, Հրանդ Դինքն ասում էր՝ եթէ Թուրքիան ժողովրդավար դառնայ՝ բոլորի համար աւելի հեշտ կը լինի լուծել իրենց ե՛ւ պատմական, ե՛ւ ներկայ խնդիրները: Այսօր քրդական շարժումը եւ ձեր կուսակցութիւնը թերեւս ամենաշարժիչ ուժն են Թուրքիայի ժողովրդավարացման տեսանկիւնից: Ի՞նչ էք կարծում՝ եթէ Թուրքիայում այսօր չլինէր քրդական շարժումը, ինչպէ՞ս կ՛ընթանար ժողովրդավարացման գործընթացը երկրում:
Ս. ԴԵՄԻՐԹԱՇ.- Անշուշտ, կան տարբեր խմբեր, այդ թւում՝ քրդերը, ինչպէս նաեւ զանազան կրօնական, ազգային խմբեր, յարանուանութիւններ, որոնք Թուրքիայում խնդիրների են առերեսւում: Թուրքիայի հասարակութեան մէջ կան նաեւ հատուածներ, որոնց առջեւ ծառացած են դասակարգային եւ գենդերային բնոյթի խնդիրներ: Թերեւս այս խմբերը կազմում են Թուրքիայի հասարակութեան 90 տոկոսը: Թուրքիայում բնակչութեան միայն 10 տոկոսն է, որ երբեք չի ենթարկուել ճնշման ու վայելել է Թուրքիան՝ որպէս երկիր:
Մնացածը՝ լինեն թուրքեր, քրդեր, հայեր, չէրքէզներ, արաբներ, լազեր, վրացիներ, կանայք, տղամարդիկ, ալեւիներ, սուննիներ, բոլորն էլ անցել են տառապալի ու ցաւոտ գործընթացների միջով: Այդուհանդերձ՝ քրդերը բոլոր այս զարգացումներում հասարակութեան հէնց այն հատուածն են կազմում, որն ամենաշատն է ընդվզել: Հէնց այդ պատճառով էլ նրանք եղել են Թուրքիայում ժողովրդավարութեան ու ազատութեան համար պայքարի առաջատար ուժը: Դա նաեւ հէնց քրդերին է վերափոխել: Այսպէս՝ քրդերը, պայքարելով ժողովրդավարութեան, ազատութիւնների եւ մարդու իրաւունքների համար, ենթարկուեցին փոփոխութիւնների՝ վերոյիշեալ գաղափարներին ու հայեցակարգերին իրենց յանձնառութեան եւ դրանց միջազգայնացման առումով: Երբ գործընթացը դիտարկում ես այս տեսանկիւնից, ապա՝ այո՛, քանի դեռ Թուրքիայում չի զարգացել ժողովրդավարութիւնը, քանի դեռ առաջընթաց չի գրանցուել մարդու ազատութիւնների ոլորտում, երկրի եւ ոչ մի խնդիր հնարաւոր չի լինի լուծել: Նախեւառաջ՝ արտայայտման, մտքերն ազատօրէն արտայայտելու ազատութեան անհրաժեշտութիւն կայ…
Քանի դեռ այս ազատութիւնը չի ապահովուել, ինչպէ՞ս կարող ենք խօսել, օրինակ, քրդական խնդրի, Հայոց Ցեղասպանութեան կամ ալեւիական հարցի մասին: Այլ կերպ ասած՝ բոլոր ազատութիւնների ընդլայնումը կը նպաստի խնդիրների լուծմանը, իսկ խնդիրների լուծումը կը ծառայի որպէս ազատութիւնների խթանման գործիք: Սրանք գործընթացներ են, որոնք սնում են մէկը միւսին եւ քրդերին՝ իրենց մղած պայքարում. քուրդ ժողովուրդը մշտապէս փորձել է սատարել Թուրքիայում միւս ժողովուրդների պայքարին՝ սեփական խնդրի՝ քրդական հարցի լուծման, ինչպէս նաեւ միւս ազգերի, ինքնութիւնների խնդիրների լուծման նպատակով: Դա հնարաւոր դարձնելու համար քրդերի ու միւս ժողովուրդների միջեւ դաշինքներ ու համատեղ պայքարի միութիւններ են ստեղծուել: Այն կէտը, որին այսօր հասել ենք, այնքան էլ վատը չէ:
Ս. ԴԵՄԻՐԹԱՇ.- Անկասկած՝ դա հեշտ չէ: Ինչպէս նշեցիք՝ նախագահական վերջին ընտրութիւններն ապացուցեցին, որ մեր առաջադրած սկզբունքները՝ ժողովրդավարութիւնը, ազատութիւնը, խաղաղութիւնը, եղբայրութիւնը, հաւասարութեան եւ արդարութեան վրայ հիմնուած կեանքը, ճնշուածների, աշխատաւորների, կանանց իրաւունքների պաշտպանութիւնը, իրապէս արժանանում են հանրային նշանակալի աջակցութեան: Նման պայմաններում 10 տոկոս ձայն հաւաքելը շատ դժուար գործ էր, մենք կարողացանք նման արդիւնքի հասնել միահամուռ ուժերով: Այժմ այդ արդիւնքներից ուժեղացած՝ մեր կուսակցութիւնը փորձում է շարունակել բանակցութիւնները կառավարութեան հետ՝ քրդական հարցի լուծմանը հասնելու համար ու, նաեւ այդ արդիւնքների շնորհիւ ամրացնելով մեր դիրքերը, մենք պայքարում ենք կառավարութեան ճնշող եւ մոնիստական քաղաքականութեան դէմ:
Եւ միայն այն դէպքում, երբ պայքարն ու բանակցութիւնը զուգահեռ են ընթանում, կարելի է յաջողութեան հասնել: Բանակցել, խօսել որեւէ հարցի մասին չի նշանակում նահանջել, կամ պայքարը չի ենթադրում միայն կազմակերպել դիմակայութիւն եւ փակել բանակցային բոլոր ալիքները: Հնարաւոր է, որ երկուսը միաժամանակ իրականացուեն եւ ամրապնդեն մէկը միւսին: Եթէ մտնէք բանակցային գործընթացի մէջ, որը միեւնոյն ժամանակ կազմուած չլինի պայքարից ու դիմակայութիւնից, ուղղահայեաց դիրքից, այդ դէպքում ձախողման հաւանականութիւնը կը մեծանայ: Նմանապէս՝ եթէ դիմակայութեան մէջ մտնէք, որը բանակցութիւնների ու երկխօսութեան համար տեղ չի թողնում, ապա ձեզ դժուար կը լինի պահել դիմակայութեան արդիւնքում նուաճած քաղաքական ձեռքբերումները:
ԱԼԻՆ ՕԶԻՆԵԱՆ.- Յաճախ ենք լսում, որ հայերը փորձում են թուրքերին բացատրել, որ իրենք մահացել են, սպանուել են այս հողերի վրայ, մինչդեռ քրդերը փորձում են ասել, որ իրենք ապրում են այստեղ: Այս առումով՝ արդեօք ձեր եւ ձեր կուսակցութեան քաղաքական դիրքորոշումն այն է, որ տեղ հասցնէք իշխանութեան ղեկի մօտ կանգնածներին հետեւեալը՝ մենք՝ որպէս քրդեր, գոյութիւն ունենք, եւ դուք պէտք է ապահովէք մեր իրաւունքները: Թէ ասում էք՝ մենք նոյնպէս կարող ենք կառավարել այս երկիրը:
Ս. ԴԵՄԻՐԹԱՇ.- Մենք հաւատացած ենք, որ Թուրքիայի բոլոր սոցիալական կառոյցները, բոլոր ազգութիւնները պէտք է երկրի կառավարման մաս լինեն: Հէնց այս պատճառով պնդում ենք, որ ոչ թէ կենտրոնացուած, այլ ապակենտրոնացուած կառավարման մոդելն է աւելի համապատասխանում Թուրքիայի իրականութեանը: Կարծում ենք՝ ինքնավարութեան մոդելի հիման վրայ Թուրքիայով մէկ պէտք է լինեն ինքնավար եւ տեղական կառավարութիւններ: Նկատի ունեմ՝ մենք հանդէս ենք գալիս նրա օգտին, որ Թուրքիայում լինեն բազմաթիւ ինքնավար, տեղական իշխանութիւններ եւ կոնկրետ շրջանում ապրող մարդկանց ներկայացուցիչներն ունենան մանդատ այդ ինքնավար սուբյեկտների խորհրդարաններում՝ տեղական խորհրդարաններում: Ասենք՝ Կարս, Իգդիր, Արդահան եւ Աղրը շրջանները ստեղծեն իրենց սեփական ինքնավար մարմինները:
Եթէ տեղական վարչակազմերն ունենան իրենց յատուկ խորհրդարանը՝ ինքնավար օրէնսդիր մարմինը, այդ դէպքում ազերիները, թուրքմէնները, հայերը, քրդերը, թուրքերը այդ խորհրդարանում կ՛ունենան իրենց մանդատները, այնպէս, որ կարողանան միասին մասնակցել կառավարմանը: Այսպիսով՝ եթէ հնարաւոր լինի դրան հասնել, եթէ Թուրքիայում բոլորը ներկայացուցիչների միջոցով մասնակցեն կառավարման գործընթացին՝ ընտրուած ներկայացուցիչների միջոցով ստանալով կառավարչի որակաւորում, այդ դէպքում քաղաքացու եւ պետութեան, քաղաքացու եւ կառավարութեան միջեւ ուժեղ կապ կը հաստատուի: Այս կերպ մասնակցութիւնը կը դառնայ հնարաւոր, եւ եղբայրութեան ու հաւասարութեան հիման վրայ ապրելը կը հեշտանայ:
ԱԼԻՆ ՕԶԻՆԵԱՆ.- Նախկինում լրագրողներն արդէն ուղղել են ձեզ այն հարցը, թէ ինչպէս էք գնահատում Էրդողանի «Արդարութիւն եւ զարգացում» կուսակցութեան քաղաքականութիւնը: Կը ցանկանայի ձեզ մէկ այլ հարց տալ: Բացատրեցիք ձեր ներքին քաղաքականութիւնը, իսկ ի՞նչ կ՛ասէք ապագայում «Ժողովուրդների դեմոկրատական կուսակցութեան» ընդհանուր հայկական քաղաքականութեան մասին: Ինչպիսի՞ն կարող է այն լինել կամ արդեօք կուսակցութիւնը տարբերութիւն դնո՞ւմ է Սփիւռքի հայերի, Հայաստանի հայերի եւ Թուրքիայի հայերի միջեւ, թէ ունի աւելի ընդհանրական մօտեցում, ի՞նչ կ՛ասէք Ցեղասպանութեան մասին: Ո՞րն է «Ժողովուրդների դեմոկրատական կուսակցութեան» դիրքորոշումը:
Ս. ԴԵՄԻՐԹԱՇ.- Բնականաբար՝ Թուրքիայի եւ Հայաստանի միջեւ առանցքային հարց է 1915թ. Ցեղասպանութիւնը: Հաւատացած ենք, որ Թուրքիան պէտք է պաշտօնական մակարդակով առերեսուի Հայոց Ցեղասպանութեանը, ընդունի ճշմարտութիւնը. Ցեղասպանութեան արդիւնքում հասցուած վէրքն ամոքելու համար ոչ միայն անհրաժեշտ է պաշտօնապէս ներողութիւն խնդրել, այլեւ վստահութեան հիման վրայ վերակառուցել թուրքերի եւ հայերի, Թուրքիայի հայերի եւ Հայաստանի հայերի միջեւ յարաբերութիւնները: Այդուհանդերձ՝ երկու հասարակութիւնում էլ կայ թշնամանք, որն անընդհատ բորբոքւում եւ հրահրւում է: Մինչեւ այդ ատելութիւնը չհասցուի նուազագոյն մակարդակի՝ Թուրքիայի եւ Հայաստանի կառավարութիւնների նախաձեռնութիւններն ապարդիւն կը լինեն: Հետեւաբար իմ ցանկութիւնն է, որ Թուրքիայի եւ Սփիւռքի հայերը աջակցեն այդ թշնամանքի վերացմանը միտուած ջանքերին:
Միւս կողմից՝ Թուրքիայի կառավարութիւնն ու մամուլն իրենց բառապաշարի եւ տոնի տեսանկիւնից պէտք է լինեն շատ աւելի զգուշաւոր եւ կանխարգելեն Թուրքիայում հայերի դէմ ազգայնական տրամադրութիւններն ու թշնամանքը: Պաշտօնական յարաբերութիւններն աւելի հեշտ կը հաստատուեն, եթէ այդ ատելութիւնը երկու կողմից էլ նուազագոյնի հասցուի: Մենք մշտապէս սատարել ենք մեր կառավարութեանը, նախագահին՝ Հայաստանի կառավարութեան հետ յարաբերութիւնների հաստատման եւ սահմանի բացման հարցում, եւ դա շարունակում է լինել մեր դիրքորոշումը, քանի որ անցեալի ցաւը չի կարող առհաւէտ լինել թուրքերի ու հայերի միջեւ յարաբերութիւնների հիմքում: Սա խնդիր է, որը պէտք է յստակ լուծուի այսօր եւ այս փուլում:
Թուրքիայի Հանրապետութեան կառավարութիւնն էլ իր հերթին պէտք է աջակցի հայերին այս վէրքն ամոքելու հարցում, հայերին, որոնք համարւում են մի ժողովուրդ, որն անգամ հնարաւորութիւն չի ունեցել ողբալ իր կորուստները: Ճշմարտութեանն ու Ցեղասպանութեան իրողութեանն առերեսուելով՝ Թուրքիայի կառավարութիւնը պէտք է սատարի հայերին եւ օգնի, որ ձերբազատուեն ցաւից: Մեր կուսակցութիւնն այս հարցում վարում է շատ թափանցիկ ու բաց քաղաքականութիւն եւ սատարում է Թուրքիային՝ բոլոր հարեւանների հետ լաւ, ճիշդ ու ամուր յարաբերութիւններ հաստատելու ջանքերում: Այս համատեքստում Հայաստանն անշուշտ առանձնայատուկ տեղ է զբաղեցնում. ցաւօք յարաբերութիւնները չեն կարող զարգանալ՝ Հայոց Ցեղասպանութեան խնդրով պայմանաւորուած, եւ դա միակ ուղին է, որով հարցը հնարաւոր է լուծել:
ԱԼԻՆ ՕԶԻՆԵԱՆ.- Դուք խօսեցիք այն մասին, թէ արդեօք հասարակութիւնը պատրաստ է թէ ոչ, նշեցիք երկու կողմից ատելութեան ու թշնամանքի մասին, որոնք պէտք է նուազեցնել… Թերեւս դրա ականատեսը եղանք Թուրքիայում խաղաղութեան գործընթացի ժամանակ. նոյնիսկ երբ ուժերը յայտարարում էին ակնյայտ բաներ, ժողովուրդների միջեւ խնդիրներ չէին ծագում: Այս առումով մենք անհրաժեշտ ենք համարում, որ «Արդարութիւն եւ զարգացում» կուսակցութեան քաղաքականութիւնը հայկական հարցում դնենք հարցականիի տակ: Օրինակ՝ «արդար յիշողութեան» քաղաքականութիւնը, տառապանքների հաւասարեցումը… Կարծում էք սա՝ Ցեղասպանութեան 100րդ տարելիցից առաջ ճի՞շդ մօտեցում է:
Ս. ԴԵՄԻՐԹԱՇ.- Ինչպէս ասացի րոպէներ առաջ՝ եթէ կառավարութիւնը եւ մամուլը փոխեն իրենց բառապաշարն ու տոնը, Թուրքիայի հասարակութեան ներսում որեւէ խնդիր չի լինի: Նկատի ունեմ՝ կենտրոնի վարած քաղաքականութիւնը հրահրում է այդ թշնամանքը, ատելութիւնն ու ազգայնականութիւնը: Դասագրքերից, մամուլի լեզուից մինչեւ ոչ կառավարական կազմակերպութիւնների յարաբերութիւններ, մինչեւ նախարարների, վարչապետի ու կառավարական պաշտօնեաների օգտագործած բառապաշար, այս ամէնը պէտք է ծառայի Հայոց Ցեղասպանութեանն առերեսուելու հիմք: Մինչդեռ այսօր հակառակ պատկերն է: Այնքան ժամանակ, քանի դեռ չի փոխուել բառապաշարը, որը հայերին է վերագրում Հայոց Ցեղասպանութիւնն ու հայերին պատկերում որպէս Թուրքիայի թշնամի եւ սպառնալիք, Հայոց Ցեղասպանութեանն առերեսուելու գիտակցութիւն չի ձեւաւորուի:
Եթէ կառավարութիւնը թոյլ տար, եւ մամուլը սատարէր նրան՝ շատ կարճ ժամանակահատուածում, հաւատում եմ, մարդիկ կ՛աջակցէին Հայոց Ցեղասպանութեան եւ Հայկական Հարցի լուծմանը: Եթէ հայերի ապրած ցաւն ու տրաւման ճիշդ սահմանուեն, այդ ժամանակ միայն բոլորի կրած տառապանքները 1915ից առաջ եւ յետոյ, թուրքերի, քրդերի, հայերի բոլորի ցաւը կը վերածուի ընդհանուր ցաւի, եւ կարող ենք հրաժարուել «իմ ցաւը-քո ցաւը», »իմ կորուստները- քո կորուստները» սահմանումներից՝ դրանք դարձնելով մեր տառապանքը, մեր կորուստները, մեր վիշտը:
Ս. ԴԵՄԻՐԹԱՇ.- Անկեղծ ասած՝ մենք չենք ներկայացնում PKK-ն կամ Օջալանին, պէտք է բացայայտ ասենք, սակայն միայն քրդերին չէ, որ ներկայացնում ենք: Այո, մենք վայելում ենք քրդերի ճնշող մեծամասնութեան աջակցութիւնն ու ձայներ ստանում նրանցից, սակայն մեզ սատարում են նաեւ Թուրքիայի արեւմուտքում, մեզ սատարում են նաեւ թուրքերն ու հայերը, որոնք նոյնպէս քուէարկում են մեր օգտին: Այս ամէնը մեզ համար շատ արժէքաւոր է, շատ կարեւոր: Իմ արտայայտած մտքերը մեր կուսակցութեանն աջակցող բոլոր մարդկանց ընդհանուր մօտեցումն է: Այդուհանդերձ, քրդերը, որոնք մեզ համար չեն քուէարկում, նոյնպէս տեղեակ են Հայոց Ցեղասպանութիւնից ու հաւատում են, որ այն ընդունելն անհրաժեշտութիւն է, ու նաեւ գիտեն, որ այդ ժամանակ քրդական ցեղերը, քուրդ ընտանիքներն օգտագործուել են որպէս սպանութեան եւ տեղահանութեան գործիք:
Մենք մեծացել ենք՝ լսելով այս պատմութիւնները: Այդուհանդերձ՝ եթէ ամէն մէկը ստանձնի իրեն հասանելիք պատասխանատուութիւնը՝ արդար առերեսման, ճշմարտութեան հետ առերեսուելու տեսանկիւնից, այդ դէպքում քրդերը, անշուշտ, պէտք է անեն իրենց հասանելիք գործը, հայերն ու թուրքերն էլ՝ իրենցը: Ցանկացած հասարակութիւն չի կարող մէկ այլ հասարակութեան հետ հաստատել արդար եւ հաւասար յարաբերութիւններ՝ կոծկելով գործած յանցանքներն ու մեղքերը: Կան սխալներ, որոնք այդ ժամանակաշրջանում գործել են հայկական հրոսակախմբերը, սխալներ, որ արել են քրդական հրոսակախմբերը եւ սխալներ, որ արել են թուրքերը, սակայն այդ ամէնից վեր է Օսմանեան կայսրութեան ծայրաստիճան թերի պաշտօնական քաղաքականութիւնը: Եթէ այս վերջին կէտը դառնայ առերեսման մեկնարկային կէտ՝ ես հաւատում եմ, որ մարդիկ աւելի կը մօտենան միմեանց:
ԱԼԻՆ ՕԶԻՆԵԱՆ.- Հնարաւո՞ր է, որ «Ժողովուրդների դեմոկրատական կուսակցութեանը» տեսնենք Երեւանում Ապրիլին՝ 100րդ տարելիցին:
Ս. ԴԵՄԻՐԹԱՇ.- Շատ հնարաւոր է, շատ կը ցանկանայինք լինել այնտեղ: Արդէն ծրագրում ենք այց Հայաստան, կը ցանկանայինք այցելել բոլոր հարեւան երկրները, սակայն շատ ուրախ կը լինենք, եթէ կարողանանք այց կազմակերպել յատկապէս Հայաստան:
ՈՎ Է ՍԵԼԱՀԱԹԹԻՆ
ԴԵՄԻՐԹԱՇԸ
Թուրքիայի քրդական քաղաքական շարժման ամենանշանաւոր դէմքերից Դէմիրթաշը։ Ծնուել է 1973թ. Խարբերդի Բալու գաւառում: Նրա զազա ընտանիքը Բալուից գաղթել է Դիարբեքիր: Դեմիրթաշը հարցազրոյցներից մէկում պատմում է այդ օրերի մասին. «Մայրս եւ հայրս թէեւ իրար հետ զազաերէն էին խօսում, սակայն մեզ չէին սովորեցնում: Մեզ հետ թուրքերէն էին խօսում, որպէսզի մենք չապրենք այն դառնութիւնները, որ իրենք են տեսել: Միայն լիցէյում եմ իմացել, որ քուրդ կոչուող էթնիկ միաւոր կայ», ասել է Դեմիրթաշը:
Լիցէյից յետոյ Դեմիրթաշը կանգնել է դժուար ընտրութեան առաջ: Այդ ժամանակ տարածաշրջանում կռիւներ էին ընթանում, եւ Դեմիրթաշը տատանւում էր՝ բարձրանալ լեռները, այսինքն անդամագրուել PKK-ին (Քրդստանի աշխատաւորական կուսակցութիւն), թէ սովորել համալսարանում: Դեմիրթաշը նախընտրեց ոչ թէ լեռ բարձրանալ, այլ սովորել համալսարանում եւ աւարտեց Անկարայի համալսարանի Իրաւագիտութեան ֆակուլտետը:
2006թ. Դեմիրշաթը հանդէս եկաւ պատմական յայտարարութեամբ՝ ասելով. «Պէտք է վերագնահատել քրդական հարցի լուծման մէջ Աբդուլլահ Օջալանի դերակատարութիւնը»: Այս խօսքերի պատճառով 2010թ. նրա դէմ գործ յարուցուեց՝ ահաբեկչական կազմակերպութիւն քարոզելու մեղադրանքով:
2007թ. Թուրքիայի խորհրդարանական ընտրութիւններում որպէս «Ժողովրդավարական հասարակութեան կոնգրես»ի ներկայացուցիչ Դեմիրթաշն ընտրուել է Դիարբեքիրի պատգամաւոր: Սակայն ընտրական 10 տոկոսի շեմի պատճառով՝ ստիպուած էր դառնալ անկախ թեկնածու: Թուրքիայի սահմանադրական դատարանը «Ժողովրդավարական հասարակութեան կոնգրես»ի դէմ գործ յարուցեց, որի հետեւանքով Դեմիրթաշը մի խումբ կուսակիցների հետ հրաժարական տուեց եւ ստեղծեց «Խաղաղութիւն եւ ժողովրդավարութիւն» կուսակցութիւնը:
Դեմիրթաշը 2010թ. Յունուարին քուրդ կին գործիչ Գիւլթեն Քըշանաքի հետ միասին ստանձնեց կուսակցութեան համանախագահի պաշտօնը: 2011թ. խորհրդարանական ընտրութիւններում այս անգամ Հաքարից ընտրուեց պատգամաւոր: Այդ շրջանում հանդէս եկաւ մի յայտարարութեամբ, որը մեծ աղմուկ բարձրացրեց երկրում. «Տեղադրելու ենք Օջալանի արձանը»:
Թուրքիայի կառավարութիւնը 2012թ. վերջին սկսեց հանդիպումներ ունենալ Օջալանի հետ: Օջալանի փաստաբաններին երկար ժամանակ թոյլ չէին տալիս հանդիպելու իրենց պաշտպանեալի հետ: 2013թ. Յունուարից «Խաղաղութիւն եւ ժողովրդավարութիւն» կուսակցութեան պատուիրակութիւնն սկսեց այցելել Օջալանին: Դեմիրթաշն էլ այդ պատուիրակութեան կազմում էր: Նրանք Իմալըից ստացած տեղեկութիւնները փոխանցում էին Քանդիլի լեռներում հաստատուած PKK-ի ղեկավարութեանը: Հանգիստ, բայց սուր խօսքով յայտնի Դեմիրթաշը 2013թ. Յունուարից սկսած թուրք-քրդական խաղաղութեան գործընթացում ամենազդեցիկ դէմքերից է:
2014թ. Մարտին Թուրքիայում տեղի ունեցած տեղական ինքանակառավարման մարմինների ընտրութիւնների ժամանակ Դեմիրթաշի կուսակցութիւնը առաջադրել է հայ թեկնածուներ Ստամբուլի հայաշատ թաղամասերում: Այս թաղամասերում ընտրարշաւի ժամանակ բացի թուրքերէնից եւ քրդերէնից հնչում էին նաեւ հայերէն երգեր:
Դեմիրթաշը 2014թ. Օգոստոսին «Ժողովուրդների դեմոկրատական կուսակցութեան» կողմից առաջադրուեց նախագահի թեկնածու: Նա ընտրութիւններում մեծ յաջողութիւն գրանցեց՝ հաւաքելով ձայների մօտ 10 տոկոսը: Դեմիրթաշը՝ 30 տարուց ի վեր Թուրքիայի քաղաքական կեանքում պայքար մղող քրդական շարժման նոր սերնդի ամենաառանցքային ներկայացուցիչներից է:
Դեմիրթաշը 2014թ. Օգոստոսին առաջադրուեց Թուրքիայի նախագահի թեկնածու: Նա ընտրութիւններում մեծ յաջողութիւն գրանցեց՝ հաւաքելով ձայների մօտ 10 տոկոսը: Հանգիստ, բայց սուր խօսքով յայտնի Դեմիրթաշը 30 տարուց ի վեր Թուրքիայի քաղաքական կեանքում պայքար մղող քրդական շարժման նոր սերնդի ամենաառանցքային ներկայացուցիչներից է:
«ՍիվիլնեԹ»
ԵՂԵՌՆԻՆ ՆՈՒԻՐՈՒԱԾ ԱՅՍ ԹԻՒԻ ՀՈՎԱՆԱՒՈՐՆԵՐԷՆ
Alex Ara
Albarian, DDS
712 Ivy Street
Glendale, CA 91204
818-247-0085
———————————-
Carlitos Gardel
Restaurant
7963 Melrose Ave.,
Los Angeles, CA 90046
323-655-0891
————————————–
ESTATE JEWELERS OF SOUTH PASADENA
Ի Յիշատակ
Գասապեան (Սասուն)
եւ Տօնաւագեան (Պարտիզաք) Գերդաստաններուն
Սօնա Չոպանեան
եւ Սալբի
Գասապեան
————————————
Կարապետ
եւ Գէորգ Պէզճեաններու
Յիշատակին
Կարապետ եւ Մայտա Պէզճեան
Սագօ եւ Ուաֆա Պէզճեան
Յարութ եւ Սիլվա Խալլալեան
Շանթ եւ Վինսընթ Պէզճեան
—————————————
Ի Յիշատակ Ամուսնոյս՝
Սերոբ Սապունճեանին
եղբօրս եւ կնոջ՝
Վարանդ եւ Մարիէթ Դաւիթեաններուն
Ազնիւ Սապունճեան
——————————————–
Մեր 1.5 Միլիոն Անմեղ Նահատակներու Յիշատակին
Յարութ, Լենա եւ Ալեք
Սողոմոնեաններ
—————————————————-
ՀՕՄի Արեւմտեան
Միացեալ Նահանգներու Շրջանային Վարչութիւն
—————————————————-
