Յարգելի՛ գործընկերներ,
Յարգելի՛ պարոն Սարգսեան,
Մեր դիրքորոշումը ձեզ առաջադրելու հետ կապուած հիմնաւորուած է ոչ միայն նրանով, որ դրա համար կան բոլոր անհրաժեշտ իրաւաքաղաքական հիմքերը՝ պայմանաւորուած Ազգային ժողովի ընտրութիւններին ՀՀԿ արձանագրած արդիւնքներով եւ այն հանգամանքով, որ կոալիցիա կազմաւորելու մասին յուշագրով ՀՀԿին է վերապահուած վարչապետի թեկնածու առաջադրելու իրաւունքը, այլեւ նախեւառաջ նրանով, որ մենք միասին անցել ենք յուսադրող եւ մեր երկրի համար չափազանց բախտորոշ մի երկար ճանապարհ: Սակայն որ ամենակարեւորն է, ստանձնել ենք Հայաստանի եւ հայութեան բարեկեցիկ, ազատ ու արդար ապագան կերտելու առաքելութիւն:
Մենք միասին լաւագոյն հիմքերն ենք ստեղծել արդար Հայաստան եւ միասնական ու պաշտպանուած Արցախ ու Սփիւռք ունենալու համար:
Դրա ամենապերճախօս վկայութիւններից են՝ առաւել ժողովրդավարական եւ ժամանակակից մեխանիզմներով օժտուած խորհրդարանական համակարգի հիմնադրումը, որ հնարաւորութիւն է ընձեռում արձանագրելու արդէն 4րդ հանրապետութեան սկզբնաւորման մասին, հայ-թուրքական արձանագրութիւնների չեղարկումը եւ Համահայկական հռչակագրի ընդունումը, Արցախեան հիմնախնդրի լուծմանն ուղղուած արժանապատիւ եւ հայանպաստ բանակցութիւնների իրականացումը:
Միեւնոյն ժամանակ, պարո՛ն Սարգսեան, մենք պարտաւոր ենք չթերագնահատել եւ տեսնել առաջընթացի մեր ճանապարհին առկայ խոչընդոտներն ու վտանգները:
Սկիզբ առած բարեփոխումները շարունակելու ներկայ փուլի հետ կապուած մեր գնահատականներում, մենք, ի հարկէ, առաջնորդւում ենք առկայ խոչընդոտներն ու մարտահրաւէրները յաղթահարելու մեր միասնական պատասխանատուութեան գիտակցումով:
Ըստ այդմ, օրուայ խնդիրն է չէզոքացնել առարկայական եւ ենթակայական այն բոլոր մտահոգութիւնները, որոնք բխում են հասարակութեան մէջ ձեւաւորուած կարծրատիպերից: Կարծրատիպեր, որից առաջացած չվերացող դժգոհութիւնը փորձել ու փորձելու են օգտագործել սկսուած գործընթացների քաղաքական հակառակորդները:
Այս գործընթացը վարկաբեկելու ամենատարածուած բանաձեւը «միեւնոյնն է, ոչինչ չի փոխուելու» կանխավարկածն է, որ արտայայտւում է հիմնականում հետեւեալ ձեւակերպումներով.
– Փոփոխութիւնները ծխածածկոյթ են իշխանութիւնների վերարտադրութեան համակարգը յաւերժացնելու համար.
– Վերնախաւում անձերը նոյնն են, ուրեմն ոչինչ չի կարող փոխուել:
Այս կարծրատիպից հրաժարուելը մեր հիմնական մարտահրաւէրն է:
Պատճառների պատճառը, որ ծնել է այս կարծրատիպը, այն է, որ երկիրը երկար տարիներ շարունակ ունեցել է անձնակենտրոն ղեկավարում եւ դառը փորձ է կուտակել՝ պայմանաւորուած նախագահի ունեցած գերլիազօրութիւններով եւ գերանձնաւորուած պատասխանատուութեամբ:
Մենք հենց այս պատճառն ենք վերացրել, բայց մարդիկ սա կը գնահատեն, երբ որ դրա դրական հետեւանքները տեսնեն, ինչպէս որ ձեւաւորուել են նման բարդոյթներ՝ նախորդ համակարգի բացասական հետեւանքների յարատեւութեան արդիւնքում: Իսկ մարդկանց հանդիպող բացասական հետեւանքները հիմնականում յոռի բարքերն ու անարդարութիւններն են, հովանաւորչութիւնն ու խնամի-ծանօթ-բարեկամական քատրային քաղաքականութիւնն է: Սրա վերջը պէտք է տրուի:
Անշուշտ, բարքերը փոխելու համար անհրաժեշտ է նախեւառաջ կարգերը փոխել: Մենք, այս գիտակցումով է, որ միասին փոխել ենք հին կարգերը, սակայն դա անհրաժեշտ է, բայց ոչ բաւարար:
Այս նոր կարգերը պէտք է օր առաջ կեանքի կոչուեն: Բայց ոչ այն տրամաբանութեամբ, որ նոր գինին լցուի հին տիկերի մէջ, կամ հին շորի վրայ նոր կարկատան դրուի: Դրա ծանր հետեւանքներին ծանօթ ենք Աստուածաշնչից:
Այդ առումով, հասարակութեան լայն խաւերի մօտ յոյսը կարող է արթնանալ, եթէ այս փոփոխութիւնների արդիւնքում վերացուեն արմատաւորուած բացասական հետեւանքները, եւ մարդիկ հնարաւորինս արագ իրենց կենցաղում զգան եւ ճաշակեն համակարգային այս ծաւալուն փոփոխութիւնների դրական պտուղները:
Սա է մեզ կապող պատասխանատուութեան իմաստն ու բովանդակութիւնը:
Մենք լիայոյս ենք, որ ձեզ հետ միասին, պարո՛ն Սարգսեան, կարող ենք եւ պարտաւոր ենք, ցրելով բոլոր կասկածները, ապացուցել, որ ձեր կողմից 3րդ Հանրապետութեան 3րդ նախագահի պաշտօնից յետոյ 4րդ հանրապետութեան Ա. վարչապետի պաշտօնի ստանձնումը որեւէ հատուածական շահ չի հետապնդում, այլ կոչուած է, օգտագործելով ձեր հսկայական փորձը, նոր էջ բացել մեր ժողովրդի արժանապատիւ ապագայի համար եւ նոր շունչ հաղորդել մեր երկրի առաջանցիկ զարգացմանը:
Յաջողութիւն ձեզ, ձեր այս նոր առաքելութեան մէջ:
