ՍՏԵՓԱՆԱԿԵՐՏ, «Ապառաժ».- ՀՅԴ Արցախի Կեդրոնական կոմիտէն 9 Ապրիլին, Արցախի մէջ տեղի ունեցած համապետական ընտրութիւններուն առիթով հետեւեալ յայտարարութիւնը հրապարակեց՝.
«Ի գիտութիւն ընդունելով Արցախի Հանրապետութեան Կենտրոնական ընտրական յանձնաժողովի հաղորդագրութիւնը ս. թ. Մարտի 31ին կայացած համապետական ընտրութիւնների պաշտօնական արդիւնքների վերաբերեալ եւ վերլուծելով ընտրական գործընթացին առնչուող տուեալներն ու տեղեկութիւնները, արձանագրում ենք.
«Ընտրութիւնները տեղի ունեցան օրէնքով սահմանուած կարգով, ժամկէտներում, մրցակցային, բայց անհաւասար պայմաններում, սակայն ընտրութիւններին նախորդած զարգացումները եւ քուէարկութեան ընթացքը համադրելի են 2005ին տեղի ունեցած ընտրախախտումների եւ արատաւոր երեւոյթների հետ:
«Հաշուի առնելով մեր Հանրապետութեան առջեւ ծառացած ներքին եւ արտաքին մարտահրաւէրները, գործադիր եւ օրէնսդիր իշխանութիւն ձեւաւորելու անհրաժեշտութիւնը, ընդունում ենք ընտրութիւնների արդիւնքները` ակնկալելով, որ յանուն ազատ, անկախ եւ կայուն զարգացող Արցախի` իշխանութիւնները կ՛անեն համարժէք հետեւութիւններ, մասնաւորապէս կ՛ապահովեն արձանագրուած ընտրախախտումների անաչառ, համակողմանի քննութիւնը, իսկ առաջիկայում լրջօրէն կ՛անդրադառնան համակարգային փոփոխութիւնների սահմանադրական լուծումների մեր քաղաքական պահանջի իրագործման եւ ընտրական օրէնսգրքի բարեփոխման հարցերին:
«Քարոզարշաւի ընթացքում անդրադարձել ենք հասարակութեանը յուզող հիմնախնդիրներին եւ ներկայացրել դրանց լուծման մեր պատկերացումները, տուրք չտալով ամբոխավարութեանը: Սակայն այս կամ այն պատճառով, ցաւօք, մեր խօսքը լայնօրէն չընկալուեց եւ խորհրդարանական ընտրութիւնների արդիւնքում մեր կուսակցութիւնը ԱՀ Ազգային ժողովում ներկայացուած կը լինի երեք պատգամաւորներով:
«Մեր դիրքորոշումների հաստատուն հենքը` երկրի անվտանգութեանը, կայուն զարգացմանը, անհրաժեշտ բարեփոխումներին, տնտեսական զարգացմանը, սոցիալական արդարութեանը եւ օրէնքի գերակայութեան ապահովմանը միտուած աշխատանքներն են:
«Շնորհակալութիւն ենք յայտնում ազատ ու գիտակցուած ընտրութիւն կատարած մեր բազմահազար հայրենակիցներին եւ այդ թւում` ՀՅ Դաշնակցութեան շուրջ համախմբուած ընտրապայքարի բոլոր մասնակիցներին:
«Ապրիլի 14ին նախատեսուած ԱՀ նախագահական ընտրութիւնների երկրորդ փուլին կը մասնակցեն առաւելագոյն քուէ ստացած երկու թեկնածուները: Մեկնելով մեր նախընտրական ծրագրի հիմնադրոյթներից եւ առկայ քաղաքական զարգացումներից` Դաշնակցութիւնը չի աջակցի նախագահի թեկնածուներից որեւէ մէկին:
«Անկախ քաղաքական հայեացքներից, մեզ բոլորիս միաւորում է հայրենիքի բարօրութիւնն ու զարգացումն առաջ տանելու վճռականութիւնը»:
