ԵՐԵՒԱՆ, «Լրագիր».- Արցախի Ազգային ժողովի «Արդարութիւն», «Հայ Յեղափոխական Դաշնակցութիւն» եւ «Արցախի ժողովրդավարական կուսակցութիւն» խմբակցութիւնները 23 Սեպտեմբերին հրապարակեցին յայտարարութիւն մը, որուն մէջ կը նշեն, թէ Արցախի Ազգային ժողովի պատուիրակութիւնը չէր հրաւիրուած անկախութեան օրուան միջոցառման, ինչ որ կը նշանակէ, թէ Հայաստանի իշխանութիւնները՝ պետականութեան աւանդոյթները մերժելով, կասկածի տակ կը դնեն Արցախի՝ իրեն մաս կազմելը։ Ստորեւ՝ յայտարարութիւնը.
«Անցեալ տարուայ աւերիչ պատերազմից յետոյ հայկական երկու հանրապետութիւններում Սեպտեմբերի 2ի եւ Սեպտեմբերի 21ի պետական տօները լաւագոյն առիթ էին մեր ժողովրդին ու աշխարհին փոխանցելու հանրութեանը յուզող հիմնախնդիրների լուծման հնարաւորութիւնների եւ Արցախի ու Հայաստանի միջեւ կապերի անխախտելիութեան մասին սպասուած ուղերձները:
«Բայց, ինչպէս կանխատեսելի էր Հայաստանի ու Արցախի գործող իշխանութիւններից, ամէն ինչ կատարուել է ի վնաս հոգեբանական բարդ վիճակում գտնուող հանրութեանը ճգնաճամից դուրս բերելու համար: Երեւանի կենտրոնական հրապարակում Սեպտեմբերի 21ի երեկոյեան կազմակերպած, իրենց իսկ բնորոշմամբ, «գունագեղ միջոցառման» իրականացումն այն դէպքում, երբ առկայ էր հանրային հիմնաւորուած դժգոհութիւն, խօսում է այն մասին, որ օրուայ իշխանութիւնների համար «ասածից յետ չկանգնելու» տղայական մօտեցումն աւելի նախապատուելի տեղ ունի, քան պետականամէտ վարքագիծը:
«Հանրութեան համար զարմանալի էր այն դիրքորոշումը, որ նա արտայայտուեց Սեպտեմբերի 2ին, երբ համապատասխան հրաւէրների առկայութեան պարագայում այդպէս էլ Հայաստանի բարձրագոյն ղեկավար կազմից որեւէ պաշտօնեայ ներկայ չգտնուեց համահայկական նշանակութիւն ունեցող Արցախի Հանրապետութեան օրուայ միջոցառումներին եւ Ստեփանակերտ ժամանեց միայն խորհրդարանական պատուիրակութիւնը: Սպասելի էր, որ Սեպտեմբերի 21ին՝ Հայաստանի Հանրապետութեան անկախութեան օրուան նուիրուած միջոցառումներին մասնակցելու համար, ինչպէս նախորդ տարիներին, հրաւէր ուղարկուէր Արցախի խորհրդարանական պատուիրակութեանը, սակայն այս պարագայում եւս արհամարհուել են արարողակարգային պահանջները:
«Պետականութեան աւանդոյթներն ամրապնդելու ընձեռուած հնարաւորութիւնները մերժելով՝ ՀՀ գործող իշխանութիւնները կասկածի տակ են դնում Արցախի Հանրապետութեան սուբյեկտայնութիւնը (ենթակայութիւնը):
«Նման վերաբերմունքը, մինչ այդ նկատուած թերացումների հետ մէկտեղ, յղի է լուրջ վտանգներով եւ, անկախ դրդապատճառներից, էապէս վնասում է միջազգային ճանաչման ձգտող Արցախի Հանրապետութեան վարկանիշին, ինչպէս նաեւ բացասական ազդակներ հաղորդում կարգաւորման գործընթացում ներգրաւուած միջազգային կառոյցներին»:
