ԵՐԵՒԱՆ.- 9 Նոյեմբեր 2020ի յանձնուողական յայտարարութեան միամեակին առիթով, Արցախի Ազգային ժողովի «Արցախի ժողովրդավարական կուսակցութիւն», «Հայ Յեղափոխական Դաշնակցութիւն, «Արդարութիւն», «Միասնական հայրենիք» եւ «Ազատ հայրենիք – ՔՄԴ» խմբակցութիւնները հրապարակեցին հետեւեալ յայտարարութիւնը.
«9 Նոյեմբեր 2020ի եռակողմանի յայտարարութեան ընդունումից անցել է մէկ տարի, սակայն ցայսօր շարունակւում է Ադրբեջանի հայատեաց քաղաքականութիւնը Արցախի ժողովրդի նկատմամբ` անտեսելով եւ արհամարհելով ՌԴ ուժերի խաղաղապահ առաքելութիւնը:
«Խուճապային մթնոլորտ ստեղծելու եւ Արցախի Հանրապետութիւնը հայաթափելու նպատակով ադրբեջանական կողմը վերջին շրջանում սկսել է թիրախաւորել բնակավայրերն ու քաղաքացիական անձանց:
«Անպատժելիութիւնից ոգեւորուած` Ադրբեջանը ս.թ. Նոյեմբերի 8ին զինուած ներթափանցում կատարելով, կրկին ահաբեկչութիւն իրականացրեց ռուս խաղաղապահների վերահսկողութեան ներքոյ գտնուող Շուշի-Բերձոր ճանապարհահատուածի Շուշիի մօտակայքում ջրամատակարարման աշխատանքներ կատարող քաղաքացիական անձանց նկատմամբ, ինչի արդիւնքում սպաննուել է 22ամեայ երիտասարդ, 3 անձ էլ հրազէնային վնասուածքներով հիւանդանոց փոխադրուել են:
«Նման գործելաոճը վկայում է, որ հայրենիքում արցախահայութեան անվտանգ եւ արժանապատիւ ապրելու իրաւունքի իրացումը հնարաւոր է միայն Արցախի Հանրապետութեան միջազգային ճանաչման պարագայում:
«Խստօրէն դատապարտում ենք նման յանցաւոր արարքները եւ պահանջում պատշաճ հետաքննութիւն եւ համարժէք քայլերի ձեռնարկում:
«Կոչ ենք անում ԵԱՀԿ Մինսկի խմբին` դատապարտել Ադրբեջանի նման գործելաոճը, իսկ ՌԴ խաղաղապահ ուժերին, ԱՀ զինուած ուժերին եւ այլ ուժային կառոյցներին` քաղաքացիական բնակչութեան նկատմամբ պարբերաբար իրականացուող ահաբեկչական գործողութիւնները կանխելու նպատակով դիմել կոշտ միջոցների»:
