ԿԼԷՆՏԷՅԼ.- Միացեալ հայկական ֆոնտի 140րդ թռիչքը Երեւան հասաւ Սեպտեմբեր 30ին, փոխադրելով 1 միլիոն տոլար արժողութեամբ մարդասիրական օգնութիւն։
Այս թռիչքով, Միացեալ հայկական ֆոնտը իր կողմէ տրամադրեց 106,000 տոլար արժողութեամբ դեղորայք եւ բժշկական պիտոյքներ, որոնց մեծամասնութիւնը նուիրած էին AmeriCares կազմակերպութիւնը (83,000 տոլար արժողութեամբ), Կաթողիկէ բժշկական առաքելութեան վարչութիւնը ($14,000) եւ Քանատայէն Health Partners International կազմակերպութիւնը ($9000):
Հետեւեալ կազմակերպութիւններն ու անհատները եւս ապրանքներ նուիրելով մասնակցեցան այս թռիչքին՝ Հայկական օգնութեան ֆոնտը ($385,000), Նորք Մարաշ բժշկական կեդրոնը ($166,000), Մոնթրէալի Միջազգային օգնութեան հայկական կեդրոնը ($90,000), բժ. Սթիվըն Քաշեան ($84,000), Hershey բժշկական կեդրոնը ($55,000), Focus Armenia եւ բժ. Մարի Ալանի ($54,000), եւ Sacred Heart բժշկական Կեդրոնը ($41,000):
Թռիչքին մասնակցեցան նաեւ Անահիտ Երեմեան ($19,000), Հաուըրտ Գարակէօզեանի յիշատակի ընկերութիւնը ($18,000), Հայ օգնութեան միութիւնը ($16,000), Հայ մշակութեան հիմնարկը ($15,000), Հայ բարեգործական ընդհանուր միութիւնը ($13,000), բժ. Սամուէլ Մալայեան ($10,000) եւ Քալիֆորնիոյ հայ բժիշկներու միութիւնը ($10,000):
1989էն ի վեր, Միացեալ հայկական ֆոնտը 447 միլիոն տոլար արժողութեամբ մարդասիրական նպաստ ուղարկած է Հայաստան։
Միացեալ հայկական ֆոնտը համատեղ աշխատանքն է Ամերիկայի հայկական համագումարին, Հայ բարեգործական ընդհանուր միութեան, Ամերիկայի հայ աւետարանչական ընկերակցութեան, Հայ օգնութեան միութեան, Հայաստանեայց Եկեղեցւոյ Հիւսիսային Ամերիկայի առաջնորդարանին, Հայաստանեայց Առաքելական Եկեղեցւոյ Ամերիկայի առաջնորդարանին եւ »Լինսի« հիմնարկին։
Յաւելեալ տեղեկութեան համար կարելի է դիմել Միացեալ հայկական ֆոնտին՝ (818) 241-8900 թիւով:
