Հոլիվուդի Ս. Կարապետ Մայր եկեղեցին այն վառ փարոսն է, որ տասնամեակներ շարունակ լուսաւորել, ջերմացրել ու սատարել է քաղաքի եւ յարակից շրջանների հայ համայնքին: «Փոքրիկ Հայաստան»ի սրտում գտնուող եկեղեցին լաւագոյնս է իրականացրել առաքելութիւնը՝ շնորհիւ իր հոգեւոր առաջնորդ Վիգէն Աւագ. Քհնյ. Վասիլեանի, ով բարեխղճօրէն ծառայել է իր ազգի իւրաքանչիւր անդամին՝ երբեք չխնայելով ժամանակն ու եռանդը, դառնալով բարեկամ ու ընկեր, խորհրդատու եւ աջակից՝ օգնելով հաղորդակից դառնալ Աստուածային իմաստնութեանն ու հաւատարիմ մնալ ազգային ինքնութեանը:
Դեկտեմբերի 4ը տօնական էր շրջանի հայ համայնքի համար: Արեւմտեան Ամերիկայի Հայոց թեմի առաջնորդ Թորգոմ եպս. Տօնոյեանի առաջարկով եւ հովանաւորութեամբ, այդ օրը նշուեց Վիգէն Ա. քհնյ. Վասիլեանի քահանայական ձեռնադրութեան քառասուն ամեակը, որ նաեւ գնահատանքի առիթ էր նուիրուած սիրելի քահանային:
«Չորս տասնամեակ ձեր հոգեւոր սպասաւորութիւնը յանուն հայ ազգի եւ եկեղեցու առաւել պայծառացման, Յունաստանից սկսած մինչեւ ԱՄՆ արեւմտեան ափ, արժանի է յատուկ ընդգծումի եւ առատախինդ գնահատանքի: Դուք որպէս քառասուն տարուայ հոգեւոր մշակ, ծառայական ձեր կեանքին նոյնացրիք մարդկային ձեր բոլոր առանձնայատկութիւնները, եւ ձեր համայնքների տագնապներն ու ցաւերը, ուրախութիւններն ու յաջողութիւնները մեծահոգաբար նկատեցիք ձերը: Մասնաւորապէս գնահատում ենք տասնամեակների ձեր ծառայութիւնը Հոլիվուդի եկեղեցու անդաստանից ներս, որտեղ դուք երբեք չեղաք ծիսակատար հոգեւորական, այլ՝ իբրեւ հայր, եղբայր ու որդի հասաք շրջանի հոգեւոր ու ազգային անհամար կարիքների», առաջնորդական օրհնութեան ու գնահատանքի այս խօսքերն էր տէր Վիգէնին յղել թեմի առաջնորդը, ով նաեւ նախագահում էր Ս. Կարապետ Մայր եկեղեցու կիրակնօրեայ պատարագը:
Վիգէն Ա. քհնյ. Վասիլեանն էլ պատարագի ժամանակ իր քարոզում անդրադարձ կատարեց ծառայութեան քառասուն տարիներին՝ նշելով, որ փորձել է հաւատարիմ մնալ իր գործին, իր լուսաշող ուղուն՝ երբեմն լինելով խիստ ու անզիջող, քանզի առաջնային է համարել եկեղեցու կանոնների պահպանումը, եկեղեցու շահն ու բարգաւաճումը:
«Հաւատացած եմ, որ անձերը գնայուն են, մնայունը՝ Հայաստանեայց եկեղեցին է, յաւերժականը՝ հայ ժողովուրդը, հայոց հայրենիքը: Այնքան, մինչեւ Աստուած իմ մէջ շունչ է ներարկում, այնքան ժամանակ, մինչեւ ուժերս ինձ չեն դաւաճանել, պիտի շարունակեմ ծառայել Աստծոյ կամքին, մեր եկեղեցու պայծառութեանը, եւ մեր ազգի շէնութեանը: Յաճախ է Մեծարենցի «Տուր ինծի տէր երջանկութիւնն անանձնական» մեղեդին ուղեկցել ինձ, եւ քահանայական ծառայութեամբս Յունաստանից սկսած մինչեւ Ամերիկա՝ Փասադենա, Էնսինօ, եւ վերջին 24 տարիներին Հոլիվուդում ջանացել եմ ուրախութիւն տալ ուրիշներին: Վահան Թէքէեանի խօսքերն էլ միշտ մտքիս ես եղել՝ «Հաշուեյարդար. ի՜նչ մնաց. կեանքէն ինծի ի՞նչ մնաց, Ինչ որ տուի ուրիշին. տարօրինա՜կ, ա՛յն մնաց», ու այսօր, կանգնած քահանայական ձեռնադրութեան 40ամեակի շեմին, այդ բառերն են, որ կրկնում եմ, որ ինչ որ տուեցի ժողովրդիս այդ է, որ պիտի մնայ՝ ուրիշ ոչինչ», գեղարուեստական շնչով համեմուած իր խօսքում նշեց տէր Վիգէնը:
Նրա նուիրումի ու գործունէութեան մասին բազմաթիւ վկայութիւններ արուեցին տօնական պատարագին յաջորդած մեծարանքի ճաշկերոյթի ժամանակ: Եկեղեցու «Կարապետեան» սրահում, Հոլիվուդի Ս. Կարապետ Մայր եկեղեցու Հոգաբարձութեան կազմակերպած ձեռնարկին, ներկայ էին Ազգային վարչութեան, շրջանի հայկական կառոյցների ներկայացուցիչներ, եկեղեցու Հոգաբարձութիւնը, բարերարներ ու համայնքի անդամներ:
Հանդիսավար Մանուկ Սէրայտարեանը, անձնական պատմութեան միջոցով ներկայացրեց տէր Վիգէնին՝ յիշելով, թէ ինչպէս է իրեն քաջալերել եւ օգնել, երբ նոր էր տեղափոխուել ԱՄՆ բնակութեան: Նա այնուհետեւ ներկայացրեց միջոցառման յայտագիրը, որի գեղարուեստական մասը կազմուած էր Ռոզ եւ Ալէք Փիլիպոս Ազգային վարժարանի սաների ելոյթներից: «Տէր Վիգէնը տարիներ շարունակ անհուն հոգածութիւն է տածել Ս. Կարապետ Մայր եկեղեցուն կից կրթօջախի հանդէպ, եւ աշակերտներն այսօր, իւրովի են իրենց վերաբերմունքն արտայայտում», նշեց Սէրայտարեանը:
Ռոզ եւ Ալէք Փիլիպոսի Ազգային վարժարանի սաները ներկաներին հիացրեցին իրենց կատարումներով, եւ անսահման բերկրանք պատճառեցին իրենց սիրելի հոգեւոր առաջնորդին:
Կրտսեր աշակերտները ծրագիրը բացեցին աղօթքով, որին յաջորդեցին տարբեր տարիքային խմբերի աշակերտների դաշնամուրային կատարումը, ասմունքը, ժողովրդական երգն ու պարը: «Սուրբ Կարապետ եկեղեցու հոգեւոր հովիւ, տէր Վիգէնի հայրական օրհնութիւնն ու ոգեւորիչ խօսքերը մեծ ազդեցութիւն են դրոշմել «Փիլիպոս»ի մեր մեծ ընտանիքի անդամների վրայ, եւ յատկապէս մղիչ ուժ դարձել անցեալի եւ ներկայի մեր աշակերտների հոգեմտաւոր դաստիարակութեան մէջ: Անհատապէս իմ երախտագիտութիւնն եմ յայտնում, որ մեր հարազատ հոգեւորականն իր աջակցութիւնն ու խորհուրդները երբեք չի խնայել, երբ կարիք եմ ունեցել տարբեր թեմաներով վարժարանի յաջողութիւնն ու վերելքը ապահովելու ուղղութեամբ», իր խօսքում նշեց Ռոզ եւ Ալէք Փիլիպոս վարժարանի տնօրէնուհի Մարալ Դաւիթեանը՝ Փիլիպոսի մեծ ընտանիքի անունից երախտագիտութիւն յայտնելով, եւ աշակերտների հետ միասին տէր Վիգէնին նուիրելով իրենց կողմից պատրաստուած խորհրդանշական նուէր:
ՀՄԸՄի Լոս Անջելեսի վարչութեան կողմից Վիգէն Ա. քհնյ. Վասիլեանին, իր մշտական աջակցութեան համար երախտիքի խօսքեր ուղղեց դոկտոր Էնթընի Հինտոյեանը. «Փիլիպոսի շրջանաւարտ եմ, եւ յիշողութեանս մէջ միշտ կաք ձեր վառ ներկայութեամբ. երբ խօսքը Հոլիվուդի, մեր հայ եկեղեցու մասին է լինում՝ ձեզ եմ յիշում: Տասնեակ տարիներ սուրբ եւ զօրաւոր անձնաւորութիւն էք հանդիսացել այս համայնքի համար, եւ քաջալերել էք ոչ միայն ՀՄԸՄին, այլեւ համայնքային բոլոր կառոյցներին», նշեց Հինտոյեանը՝ յանձնելով ՀՄԸՄի կողմից գնահատագիրը:
Հայ Օգնութեան Միութեան ներկայացուցիչ Մակի Սարքունին էլ, Հոլիվուդի մասնաճիւղի անունից, երախտագիտութիւն յայտնելով, նշեց, որ տէր Վիգէնը միշտ նեցուկ է կանգնել կազմակերպութեանը՝ խրատներով, խրախուսիչ խօսքերով, այցերով հիւանդ ընկերուհիներին: «Հպարտ եւ ուրախ ենք, որ պատկանում ենք այս համայնքին եւ ուղղամտօրէն իրականացնում ենք մեր առաքելութիւնը, ինչի համար պարտական ենք մեր խոհեմ առաջնորդներին, որոնցից ամենաազդեցիկը տէր Վիգէնն է, ով իր անաչառ գործունէութեամբ միշտ համերաշխութիւն է նաեւ տարածում: Մեր համար մշտապէս մեծ հաճոյք է Ս. Կարապետ Մայր եկեղեցի այցելելը, որովհետեւ ոչ միայն հոգեւոր սնունդ ենք այստեղ ստանում, նաեւ՝ ըմբոշխնում ենք մեր հնադարեայ երգեցողութիւնները, ծէսերը, աւանդոյթները, որ տէր Վիգէնը մեզ մատուցում է բացառիկ ձեւերով», նշեց Սարքունին:
Եկեղեցու Հոգաբարձութեան կողմից իր խօսքում Մատլէն Աշճեանը նկարագրեց այն ապրումներն ու զգացումները, որ ունեցել են տէր Վիգէնի հետ աշխատանքի ընթացքում: «Սփիւռքի գոյութեան հիմքը եղել են նուիրումն ու ծառայութիւնը, եւ այսօրուայ մեր համայնքի ընթացքը պարտաւոր է անձնուրաց եւ նուիրուած անհատներին: Դուք ձեր կեանքով եւ գործունէութեամբ, այս նուիրումի արդար վաստակն արձանագրել էք: Ձեր ազգային, եկեղեցական կեանքի հարուստ էջերը թերթելու ընթացքում, անդրադառնալով ձեր ծառայութեանը՝ գնահատականը որպէս մարդ, հոգեւորական, գործընկեր միշտ կատարեալ է», յայտնեց եկեղեցու Հոգաբարձութեան ատենապետուհի Աշճեանը՝ հոգաբարձուների կողմից տէր Վիգէնին նուիրելով գեղեցիկ Լանջախաչ:
«Արեւմտեան թեմում սովորութիւն չկայ, որ քահանայի ծառայութեան ամեակները տօնուեն, սակայն ես որոշեցի, որ Վիգէն Ա. քհնյ. Վասիլեանի քահանայական ձեռնադրութեան 40ամեակը պէտք է նշենք, որովհետեւ հաւատում եմ, որ նա արժանի է յարգանքի այդ դրսեւորմանը Հոլիվուդի Մայր եկեղեցու եւ շրջանի հայ համայնքի կողմից՝ հովանաւորութեամբ առաջնորդարանի», այսպէս իր խօսքը սկսեց Թորգոմ եպս. Տօնոյեանը: Բնութագրելով Տէր Վիգէնին, նա նշեց որոշ առանձնայատկութիւններ, որ բացառիկ են դարձնում նրան՝ ընդգծելով բացարձակ անձնուիրումն առաքելութեանը:
«Շատ յատկանիշներով կարող եմ նկարագրել տէր Վիգէնին, բայց դրանցից կ՛առանձնացնեմ երեքը՝ բծախնդիր, երբ գործ ես վստահում, միշտ յաջողութեամբ է պսակւում, աշխատասէր, երբ ինչ աշխատանք տրուի միշտ կատարւում է բացարձակ ճշգրտութեամբ, եւ ինքնամատոյց՝ ինքնիրեն է նուիրում մինչեւ վերջ՝ իր ժամանակը, փորձառութիւնը, հոգատարութիւնը: Այսօրուայ ձեռնարկին ականատես եղանք, թէ որքան սիրով էին այս համայնքի ներկայացուցիչներն արտայայտւում՝ տնօրէնուհուց մինչեւ աշակերտ, իրենց սրտի խօսքն ասելիս ընդգծում տէր հօր զօրակցութիւնն իրենց իւրաքանչիւրի առաքելութեան մէջ: Այլ խօսքով, տէր Վիգէնը, այսօրուայ մեր կեանքում այն եզակի հոգեւորականներից է, որ գիտի Յիսուսի խօսքով ժամանակի նշանները կարդալ եւ ըստ այդմ առաջնորդուել ու իր համայնքին առաջնորդել: Հոգեւոր հաճոյք եմ ապրում, երբ այցելում եմ Հոլիվուդի Սուրբ Կարապետ եկեղեցին, որովհետեւ ամէն ինչ այնքան ամբողջական է՝ միշտ մաքուր է, խորանը պայծառ, ծաղիկները թարմ, ամենաանուշաբոյր խունկով համեմուած: Միաժամանակ, տէր Վիգէնն ամէն առիթով զօրավիգ է հանդիսացել ազգային առաջնորդարանի գործունէութեանը, ինչի համար եւս բարձր եմ գնահատում նրա առաքելութիւնը: Տէր Վիգէնի կեանքի բազմաթիւ երեւոյթների հանդէպ իմ սիրոյ մէջ սրտիս ամենամօտը իր անսահաման սէրն է տիկնոջ եւ զաւակների նկատմամբ», տէր Վիգէնի մասին խօսքն այսպէս ամփոփեց Թորգոմ եպս. Տօնոյեանը:
Վիգէն Ա. քհնյ. Վասիլեանին իրենց շնորհաւորանքներ էին յղել Կանադայի, Ատրպատականի Հայոց թեմերի առաջնորդները, կոնգրեսական Ադամ Շիֆը, Լոս Անջելեսի քաղխորհրդի անդամ Միթչ Օֆարելը:
Տէր Վիգէնն էլ իր խօսքում շնորհակալութիւն յայտնեց ներկաներին, համայնքի բոլոր ներկայացուցիչներին, ովքեր մշտապէս եկեղեցու եւ իր կողքին են եղել ազգային ու հոգեւոր կեանքը համայնքում վառ պահելու գործում: Նա նշեց, որ Սուրբ Կարապետ Մայր եկեղեցին արժանի է բոլորիս հոգածութեանը՝ յորդորելով ներգրաւուել կառոյցի պահպանման ու զարգացման հարցերում: Տէր Վիգէն Ա. քհնյ. Վասիլեանն իրեն նուիրուած առիթի ժամանակ էլ խօսեց միայն եկեղեցու յարատեւութեան կարեւորութեան մասին: Սիրելի հոգեւորականի խօսքին անսալով, ձեռնարկին ներկայ համայնքի նուիրեալներն ու բարերարները կատարեցին նուիրատուութիւններ: Ձեռնարկի համերաշխ ու սիրով լի մթնոլորտը եւս մէկ վառ վկայութիւնն էր Վիգէն Ա. քհնյ. Վասիլեանի ստեղծած միջավայրի ու գործի:
