ԵՐԵՒԱՆ, «Նիուզ».- 15 կուսակցութիւններ զօրակցութիւն կը յայտնեն ընդդիմութեան յայտարարութեան մէջ արտացոլացող սկզբունքներուն եւ զանոնք կենսական կը նկատեն հայ ժողովուրդի եւ հայոց պետականութեան լինելիութեան հարցին մէջ: Այս մասին «Ֆէյսպուք»ի իր էջին վրայ գրած է «Հայաստան» խմբակցութեան անդամ, Հայաստանի Ազգային ժողովի փոխնախագահ Իշխան Սաղաթէլեան:
Ստորեւ անոր գրառումը.
«Հայ-ադրբեջանական եւ հայ-թուրքական յարաբերութիւնների կապակցութեամբ» ԱԺ ընդդիմադիր խմբակցութիւնների յայտարարութեան վերաբերեալ
«Մենք՝ Հայաստանի Հանրապետութեան քաղաքական ուժերս,
«Հաստատելով, որ.
«- Գործող իշխանութիւնների կողմից երկրում որդեգրուած հակասահմանադրական ընթացքը փաստացի մենիշխանութեան է տարել երկիրը,
«- Խորհրդարանական պետութեան ներկայացուցչական բարձրագոյն մարմնում՝ Հայաստանի Հանրապետութեան Ազգային ժողովում, երկրի համար օրհասական այս իրավիճակում, քաղաքական մեծամասնութեան կողմից մերժւում են ազգային-պետական շահերին առնչուող կարեւորագոյն քննարկումներն ու որոշումների կայացումը,
«- Գնալով խորանում են Հայաստանի պետականութեանն ու ազգային անվտանգութեանն ուղղուած սպառնալիքները, անտեսւում են Հայ ժողովրդի կենսական շահերը՝ երկիրը կանգնեցնելով պետականութեան կազմաքանդման շեմին,
«Կենսական անհրաժեշտութիւն ենք համարոււմ «Հայ-ադրբեջանական ու հայ-թուրքական յարաբերութիւնների կապակցութեամբ» ԱԺ յայտարարութեան ընդունումը:
«Զօրակցում ենք յայտարարութեան մէջ արտացոլուած սկզբունքներին եւ դրանք գնահատում կենսական հայ ժողովրդի եւ հայոց պետականութեան լինելիութեան հարցում:
«Կոչ ենք անում բոլոր քաղաքական ուժերին, հասարակական միաւորումներին ու անհատներին համախմբուել սոյն յայտարարութեան սկզբունքների եւ հայ ժողովրդի ազգային պետական շահերն արտացոլող օրակարգերի շուրջ»:
Յայտարարութիւնը ստորագրած են «5165 շարժում», «Ազատութիւն», «Ազգային անվտանգութիւն», «Ազգային համաձայնութիւն», ԱԻՄ, «Երկիր Ծիրանի», «Զարթօնք» ազգային քրիստոնէական, «Ժառանգութիւն», «Ինտելեկտուալ Հայաստան», «Համերաշխութիւն», «Հայաստանի դեմոկրատական կուսակցութիւն», «Հայաստանի ժողովրդավարական ազատական միութիւն», «Հայաստանի քրիստոնէա-դեմոկրատական միութիւն», «Ռեֆորմիստների» եւ «Սահմանադրական իրաւունք միութիւն» կուսակցութիւնները:
