ԵՐԵՒԱՆ, «Նիուզ», «Երկիր Մետիա».– ԵԱՀԿ դիտորդներուն տուած մամլոյ ասուլիսին ընթացքին, երբ անոնք առիթ տուին թղթակիցներուն հարցում ուղղելու, «Բէկում» ժողովրդավարութեան աջակցութեան կեդրոն հասարակական կազմակերպութեան գործիչներէն մէկը դիտորդներուն դիմաց կանգնեցաւ եւ սկսաւ խօսք արտասանել։ Սրահին մէջ իրարանցում ստեղծուեցաւ, եւ դիտորդները ժամանակաւոր կերպով կասեցուցին ասուլիսը։ Անվտանգութեան աշխատակիցները փորձեցին հեռացնել գործիչ աղջիկը, սակայն չյաջողեցան, որովհետեւ անոր ընկերները շրջապատած էին զինք։
Գործիչը յայտարարեց, որ ընտրութիւնները կայացած են խախտումներով, եւ որ եւրոպացի դիտորդները իրաւունք չունին հաստատելու այս ընտրութիւններուն արդիւնքները։
Աւելի ուշ «Բէկում» կազմակերպութիւնը հրապարակեց յայտարարութիւն մը, որուն մէջ նշուած էր. «Նախօրէին Հայաստանում տեղի ունեցած նախագահական ընտրութիւնները նախորդ նախագահական ընտրութիւնների համեմատ եղել են մէկ քայլ առաջ, երեք քայլ՝ յետ, երկու քայլ՝ աջ, կէս քայլ ձախ, այն է՝ չեն համապատասխանել Հայաստանի Սահմանադրութեան, Ընտրական Օրէնսգրքի պահանջներին, ինչպէս նաեւ միջազգային չափանիշներին: Ընտրութիւններն անցել են խորհրդարանական ընդդիմութեան առաջարկած Ընտրական օրէնսգրքի բարեփոխումների՝ իշխող մեծամասնութեան կողմից մերժուած լինելու ֆոնին: Թէեւ խորհրդարանական ընտրութիւններից յետոյ միջազգային ու տեղական դիտորդները, իրաւապաշտպաններն ու ընդդիմութիւնը բարձրաձայնել էին յատկապէս ընտրացուցակների աղաղակող անճշտութիւնների մասին, այնուամենայնիւ՝ նախագահական այս ընտրութիւններին ընդառաջ իշխանութիւնները որեւէ ջանք չեն գործադրել առկայ իրավիճակը շտկելու ուղղութեամբ:
«Յատկանշական է, որ Փետրուարի 18ին, կայացած ընտրութիւններին սեփական թեկնածու չեն առաջադրել եւ առաջադրուած որեւէ թեկնածուի չեն պաշտպանել երկրի հիմնական ընդդիմադիր քաղաքական, խորհրդարանական ուժերը՝ Հայ Ազգային Կոնգրեսը, «Բարգաւաճ Հայաստան»ը, Դաշնակցութիւն, Ազատ դեմոկրատներ կուսակցութիւնը, ինչը վկայում է այն մասին, որ ընտրութիւնները զուրկ են եղել իրական մրցակցութիւնից: Հիմնական ընդդիմադիր քաղաքական միաւորների՝ ընտրութիւններին սեփական թեկնածուով մասնակցելուց կամ առաջադրուած որեւէ այլ թեկնածուի սատարելուց հրաժարումը փաստում է ընտրական գործընթացների նկատմամբ քաղաքացիների, քաղաքական ուժերի խորը անվստահութեան առկայութիւնը: Այսպէս, խորհրդարանական ընդդիմադիր ուժերը տեղի ունեցած նախագահական ընտրութիւններն ի սկզբանէ որակել են իբրեւ ֆարս եւ շոու, քանի որ, ինչպէս արդէն նշուեց, մինչընտրական ժամանակահատուածում իշխող մեծամասնութիւնը խորհրդարանում տապալել է ընդդիմութեան ներկայացրած՝ ընտրական բարեփոխումների առաջարկների ընդունումը:
«Քուէարկութեան օրն ընտրատեղամասերը վերածուել են թատերական ներկայացման հարթակի, որտեղ քաղաքացիները դրսեւորել են իրենց վերաբերմունքը գործընթացին: Այսպէս, մամուլն ու ընկերային ցանցերը ողողուած են անվաւեր դարձած քուէաթերթիկների լուսանկարներով: Քուէաթերթիկների վրայ քաղաքացիները պատկերել են բուսական ու կենդանական, ինչպէս նաեւ հեքիաթային ու մուլտիպլիկացիոն աշխարհի միաւորներ, իսկ ընտրատեղամասերից մէկում ընտրողն ի նշան բողոքի կերել է իր քուէաթերթիկը: Յատկանշական է, որ ըստ պաշտօնական տուեալների՝ անվաւեր քուէաթերթիկների թիւը գտնւում է երրորդ հորիզոնականում: Քուէարկութեան ժամանակ ահազանգեր են ստացուել կրկնակի քուէարկութիւնների, լցոնումների, կարուսել կոչուող ընտրակեղծիքի, ընտրակաշառքի, ուրիշի փոխարէն քուէարկութեան վերաբերեալ:
«Այսպիսով, նախօրէին Հայաստանում կայացած նախագահական ընտրութիւնները կարելի է բնութագրել իբրեւ նորմալ, խայտառակ ընտրութիւններ:
«Յ.Գ. Հասարակական կազմակերպութիւնը հարկ է համարում ընդգծել, որ ՀՀ քաղաքացիները որեւէ պահանջ չեն ներկայացրել ԵԱՀԿ/ԺՀՄԻԳ դիտորդական առաքելութեան ներկայացուցիչներին, այլ ընդամէնը ներկայացրել են իրենց այլընտրանքային գնահատականը նախօրէին կայացած նախագահական ընտրութիւնների վերաբերեալ: Ցաւով ընդգծում ենք, որ ԵԱՀԿ ներկայացուցիչները բռնի ուժի գործադրմամբ փորձել են սահմանափակել Հայաստանի քաղաքացիների կարծիքն ազատ արտայայտելու իրաւունքը՝ այդպիսով ոտնահարելով նրանց խօսքի ազատութեան իրաւունքը»:
