Վարեց՝ ՆԱՆԷ ԱՒԱԳԵԱՆ
ՆԱՆԷ ԱՒԱԳԵԱՆ.- Պրն. քաղաքապետ, Գլենդելում, մասնաւորապէս վերջին տարիներին, նկատելիօրէն աւելացել են նորակառոյց շէնքերը, մշակութային եւ ժամանցի վայրերը: Զարգացման ի՞նչ քաղաքականութիւն է վարում Գլենդելի քաղաքապետարանը:
ԶԱՐԵՀ ՍԻՆԱՆԵԱՆ.- Գլենդելում վերջին մի քանի տարում լայնածաւալ շինարարարական աշխատանքներ են իրականացւում, մասնաւորապէս կենտրոնում եւ Սան Ֆերնանդոյի միջանցք կոչուող հատուածում՝ Լոս Ֆելիսի եւ Սան Ֆերնանդոյի անկիւնում: Նպատակն է՝ աշխուժացնել քաղաքի կենտրոնը, որպէսզի ժամանակը չսահմանափակուի միայն աշխատանքի եւ տան միջեւ, այլ մեր բնակիչները հնարաւորութիւն ունենան հաճելի ժամանց անցկացնելու քաղաքում: Այս նպատակով նաեւ բացուել են մշակութային նոր վայրեր, ամբողջովին վերանորոգուել է «Ալեքս» թատրոնը, միաժամանակ աւելացել են վաճառատները: Քաղաքապետարանը նաեւ ունի բիզնեսը զարգացնելու եւ պաշտպանելու ընդհանուր ռազմավարութիւն, որի շրջանակներում ստեղծում ենք պայմաններ՝ գործարարներին գրաւելու եւ նրանց յաջողութիւնը ապահովելու համար: Միաժամանակ, կարեւոր է նշել, որ այս ամէնը չի իրականացւում մեր բնակիչների հաշուին, մեր մատուցած ծառայութիւնների քանակի եւ որակի հաշուին:
ՆԱՆԷ ԱՒԱԳԵԱՆ.- Նշեցիք նոր կառուցուող շէնքերի մասին, արդեօք դրանք ներառո՞ւմ են նաեւ մատչելի բնակարաններ ցածր եկամուտ ունեցող ընտանիքների եւ «Սեքշըն 8» ծրագրում հերթագրուած բնակիչների համար:
ԶԱՐԵՀ ՍԻՆԱՆԵԱՆ.- Բնակարանները որակեալ նոր շէնքերում կարելի է թանկ համարել, համեմատած Գլենդելի միջին կարգի բնակարանների հետ: Սակայն շէնքերի մեծ մասում կան նաեւ մատչելի բնակարաններ: Գլենդելում երկու միջոց կայ ստանալու նման բնակարան. մէկը նախատեսուած է ցածր եկամուտ ունեցողներ քաղաքացիների համար, որ տրամադրւում է վիճակահանութեան միջոցով, եթէ դիմող անձը համապատասխանում է պահանջուող չափանիշներին: Միւս ձեւը՝ «Սեքշըն 8» կոչուող ծրագիրն է, որտեղ հերթագրուածների թիւը 2400 է, նրանցից ոմանք բնակարանի են սպասում 2003 թուականից: Ուրախութեամբ պէտք է նշեմ, որ այս ծրագրի համար անցեալ տարին շատ յաջող էր, քանզի վերջին 4 տարուայ ընթացքում առաջին անգամ ստացանք «Սեքշըն 8»ի վաուչերների (կտրօններու-Խմբ.) ֆինանսաւորում Դաշնային կառավարութիւնից: Խօսքը 175 նոր վաուչերի մասին է: Սա գուցէ գոհացնող չլինի նրանց համար, ովքեր երկար տարիներ է սպասում են իրենց բնակարանին եւ դեռ չեն ստացել, սակայն պէտք է խոստովանեմ, որ առաջընթաց արձանագրուեց, եւ ինչպէս իմ նախընտրական ծրագրում եղել է, այնպէս էլ այս հարցը շարունակելու է առաջնային լինել: Այս տարի երկու անգամ եղել եմ Վաշինգտոնում, եւ մեր վաշինգտոնեան ներկայացուցիչների՝ կոնգրեսականի, սենատորի եւ Բնակարանների զարգացման հարցերով վարչութեան պաշտօնեաների հետ իմ զրոյցի առաջնային թեման եղել է «Սեքշըն 8» ծրագիրը եւ դաշնային ֆինանսական տրամադրումների այդ նպատակով ակտիւ յատկացումները Գլենդելին:
ՆԱՆԷ ԱՒԱԳԵԱՆ.- Պրն. Սինանեան, այս լաւատեսական միտումների հետ մէկտեղ, քաղաքում կան նաեւ խնդիրներ, որ մտահոգում են բնակիչներին, եւ դրանց թւում առաջինը՝ æրի եւ Ելեկտրաէներգիայի սակագների բարձրացումն է: Նախորդ տարի ընդունուած օրէնքի համաձայն, առաջիկայ հինգ տարիներին սակագները կը բարձրանան 30 տոկոսով: Դուք դէմ էք քուէարկել այս օրէնքի նախագծին՝ նշելով, որ ենթակառուցուածքներն արդիականացնելու համար կատարուող բարձրացումը հնարաւոր էր աւելի քիչ տոկոսով: Հնարաւո՞ր է արդեօք, որ այս օրէնքը ներկայացուի վերանայման:
ԶԱՐԵՀ ՍԻՆԱՆԵԱՆ.- Օրէնքի վերանայումը շատ դժուար է, եւ բացատրեմ՝ ինչու: Անցեալ տարի հաստատուեցին ջրի, նախանցեալ տարի՝ ելեկտրականութեան սակագները, եւ արդիւնքում՝ երկու տարի է, որ մեր բիւջէյում ներառուած է նաեւ այս ոլորտներից ստացուող եկամուտը: Այժմ, քաղաքի ֆինանսական ողջ կառուցուածքը հիմնուած է նաեւ ֆինանսական այդ հոսքի վրայ, հետեւաբար՝ վերանայել հնարաւոր է, բայց հին սակագները վերադարձնելը՝ կարծում եմ հնարաւոր չէ: Աւելի վատ մի նորութիւն ասեմ նաեւ, որպէսզի մեր հայրենակիցները պատրաստուեն դրան գոնէ հոգեբանօրէն: Կալիֆորնիան չորս տարի է, որ գտնւում է երաշտի պայմաններում, եւ սա սպառնում է լուրջ հետեւանքներով: Սակրամենտոյից մեզ պարբերաբար տեղեկացնում են, որ նահանգում մնացել է մօտ մէկ տարուայ օգտագործման ջուր: æուրը խնայելու նպատակով, հնարաւոր է, որ շուտով Սակրամենտօն տարբեր միջոցներ ձեռնարկի՝ սահմանափակուի քաղաքացիների կողմից ջրի գործածումը, բարձրացուեն սակագները: Ես այս հանգամանքը մի քիչ անարդար եմ համարում, քանի որ ջրի 80 տոկոսը Կալիֆորնիա նահանգում օգտագործւում է գիւղատնտեսական նպատակներով, եւ ընդամէնը 20 տոկոսն է սպառւում բնակիչների կողմից: Սակայն, եթէ հաշուի առնենք, որ գիւղատնտեսութիւնն այս նահանգի ամենաշահութաբեր ոլորտն է եւ ապահովում է ԱՄՆի սննդամթերքի մեծ մասը, նահանգի կառավարութիւնը հիմնական ճնշումները կը գործադրի մարդկանց վրայ, եւ պէտք է պատրաստ լինենք:
ՆԱՆԷ ԱՒԱԳԵԱՆ.- Ձեր նախընտրական ծրագրում նշել էիք, որ զբաղուելու էք յոյժ կարեւոր մի հարցով՝ որ քաղաքի պետական կառոյցներում, քաղաքապետարանում, հրշէջ ծառայութիւնում, ոստիկանութիւնում, առաւել շատ հայ աշխատակիցներ ներգրաւուեն: Ձեր յայտարարութիւնը ելնում էր այն փաստից, որ շուրջ 45 տոկոս հայ բնակչութիւն ունեցող քաղաքի պայմաններում, նշուած կառոյցներում ազգութեամբ հայ աշխատակիցների թիւը նուազագոյնն է, ինչն անբնական է: Ի՞նչ առաջընթաց կայ այս հարցում:
ԶԱՐԵՀ ՍԻՆԱՆԵԱՆ.- Շատ կարեւոր հարց նշեցիք, եւ այդ ուղղութեամբ իմ աշխատանքն էլ իսկապէս արդարութիւնը վերականգնելու ձեւ է հայ բնակիչների համար: Արդիւնքներ կան որոշ բնագաւառներում, սակայն ցաւօք սրտի չեմ կարող խօսել լուրջ յաջողութեան մասին: Քաղաքապետարանում մենք վերջապէս ունենք բաժնի վարիչ. հանրային ծառայութիւնների բաժանմունքի ղեկավարն այժմ հայազգի Ռուբիկ Գոլանեանն է: Սա ի հարկէ դրական միտում է, բայց հաշուի առնելով, որ կան տասնեակ բաժանմունքներ, յաջողութեան մասին խօսելը վաղ է, եւ մենք չպէտք է բաւարարուենք այս արդիւնքով: Ես շարունակելու եմ աշխատել այն ուղղութեամբ, որ մեր հայրենակիցներին առաւել հնարաւորութիւններ տրուեն քաղաքապետարանում: Ոստիկանութիւնում վիճակն աւելի բարւոք է, քանզի այս համակարգում որոշ փոփոխութիւններ տեղի ունեցան, եւ այժմ, օրինակ՝ աշխատանքի համար դիմողներին տրւում է առաւելութիւն, եթէ խօսում են հայերէն կամ կորէերէն: Միաժամանակ, ունենք նոր ոստիկանապետ, ով տրամադրուած է բարեփոխումների: Հրշէջ ծառայութեան դէպքում մենք ոչ մի առաջընթաց չունենք, քանի որ այստեղ շատ մեծ դիմադրողականութիւն կայ, եւ ցանկութիւն չկայ ապահովելու արդար պայմաններ ամերիկահայութեան համար: Ներկայում, Գլենդելում կայ ընդամէնը երկու հայ հրշէջ, ինչը տխուր պատկեր է մի քաղաքի համար, որտեղ բնակչութեան 45 տոկոսը հայեր են:
ՆԱՆԷ ԱՒԱԳԵԱՆ.- Կարելի է ասել, որ սա խտրականութեան արտայայտութիւն է:
ԶԱՐԵՀ ՍԻՆԱՆԵԱՆ.- Ես այլ կերպ չեմ կարող բացատրել: Իրենք տարբեր արդարացումներ են բերում, սակայն ես արհամարհում եմ դրանք, որովհետեւ այդչափ արդարացում չի կարող լինել: Հրշէջ ծառայութիւնում 180 աշխատակից կայ, եւ հայերը մէկ տոկոսից պակաս են: Եթէ մենք լինէինք ցանկացած այլ, այսպէս ասած պաշտպանուած ազգի ներկայացուցիչ, օրինակ աֆրիկեան կամ լատինական ծագումով, հաւատացնում եմ, որ Վաշինգտոնի Արդարադատութեան վարչութիւնը վաղուց արդէն միջամտած կը լինէր այս հարցին եւ դատական գործեր բացած կը լինէր:
ՆԱՆԷ ԱՒԱԳԵԱՆ.- Ձեր կարծիքով, ինչպիսի՞ լուծում կայ այս հարցին:
ԶԱՐԵՀ ՍԻՆԱՆԵԱՆ.- Քաղխորհրդի վերջին ընտրութիւնների արդիւնքում, այսօր մենք ունենք քաղխորհրդի երեք հայ անդամ, եւ այս դէպքում պէտք է փորձենք հնարաւորինս պաշտպանել հայ համայնքի շահերը: Ես պատրաստ եմ եւ բացայայտ խօսում եմ այդ մասին թէ՛ քաղխորհդի նիստերում եւ թէ՛ հեռուստատեսութեամբ, եւ յոյս ունեմ, որ քաղխորհրդի երեք հայազգի անդամներով, ցանկութեան դէպքում, կարող ենք բեկում մտցնել այս հարցում, որովհետեւ տուեալ իրավիճակն անընդունելի է: Այս առումով նշեմ, որ հրշէջ ծառայութեան ղեկավարը հեռացաւ, եւ այժմ հնարաւորութիւն ունենք նշանակելու մի ղեկավարի, ով ոչ միայն տրամադրուած չէ հայ համայնքի նկատմամբ, նաեւ՝ քաջութիւն եւ համարձակութիւն կ՛ունենայ կոտրելու կարծրացած մի համակարգ եւ կառուցի նորովի, որովհետեւ այս պահին պարզ է, որ ինչ որ մի բան ճիշդ չէ:
ՆԱՆԷ ԱՒԱԳԵԱՆ.- Այս հարցում, կարծում եմ, հաւասարաչափ կարեւորութիւն ունի նաեւ հանրութեան մասնակցութիւնը: Մենք պէտք է կարողանանք մեր ձայնն առաւել զօրեղ դարձնել եւ բարձրաձայնել մեզ մտահոգող խնդիրների մասին:
ԶԱՐԵՀ ՍԻՆԱՆԵԱՆ.- Ինձ համար ցնցող է այն փաստը, որ օրինակ հրշէջ ծառայութիւնը, որ ծառայում է շուրջ 85 հազար հայերի, չունի հայերէն խօսող աշխատակիցներ: Հարաւային Գլենդելի շրջանում, որտեղ հիմնականում տարեց հայ բնակիչներ են եւ չեն տիրապետում անգլերէնին՝ օգնութիւնը թէեւ հասնում է, բայց լեզուական խնդիրներ են ծագում: Սա շատ լուրջ խնդիր է, եւ առնուազն զարմանալի է, որ մեր համայնքը չի կազմակերպւում եւ չի պահանջում արդար վերաբերմունք: Պէտք է գիտակցենք, որ մենք ունենք հաւասար պայմաններ, հաւասար իրաւունքներ այս քաղաքում եւ պահանջենք մեր իրաւունքների վերականգնումը: Պայքարել միայն «Սեքշըն 8» ծրագրով բնակարան ստանալու համար՝ ճիշդ չէ:
ՆԱՆԷ ԱՒԱԳԵԱՆ.- Հայ համայնքի ընդհանուր անտարբերութեան ֆոնին, թերեւս բնական է քաղաքային իշխանութիւնների արձագանգը: Քաղխորհդի Ապրիլի 7ին կայացած ընտրութիւններում բաւարար համարո՞ւմ էք մեր քուէարկողների մասնակցութիւնը:
ԶԱՐԵՀ ՍԻՆԱՆԵԱՆ.- Չեմ կարող բաւարար համարել, քանզի ունենալով 25 հազարից աւելի հայ արձանագրուած ընտրող, մօտաւորապէս վեց հազար հոգի է քուէարկել: Սա շատ ցածր թիւ է եւ խօսում է մեր քաղաքական հասունութեան պակասի մասին, որը ցաւալի է: Նոր չենք եկել այս քաղաք, եւ քուէարկելու իրաւունք ունեցող հայերի կրիտիկական զանգուած ունենք, ովքեր զարմանալիօրէն չեն գնահատում իրենց ձայնի ուժը:
ՆԱՆԷ ԱՒԱԳԵԱՆ.- Ինչո՞վ է պայմանաւորուած նման անտարբերութիւնը՝ այս դէպքում քաղաքական գործընթացների նկատմամբ:
ԶԱՐԵՀ ՍԻՆԱՆԵԱՆ.- Կարծում եմ, ժամանակ է պէտք, որ մեր հայրենակիցները գիտակցեն, թէ որքան ուժ է ներկայացնում իրենց քուէն: Շատ կարեւոր է նաեւ, որ ընտրուած պաշտօնեաները կատարեն իրենց խոստումները, արժանանան իրենց ընտրողի վստահութեանը: Սա հոգեբանօրէն մեծ ազդեցութիւն է ունենում:
Այս հարցում, կարեւոր է նաեւ ընտրուած պաշտօնեայի հաշուետուութիւնն իր ընտրողին: Վստահութիւնը ձեռք է բերւում նաեւ կատարուած աշխատանքով:
ՆԱՆԷ ԱՒԱԳԵԱՆ.- Քաղաքապետարանում՝ որպէս քաղխորհրդի անդամ եւ քաղաքապետ, դուք ծաւալել էք ակտիւ գործունէութիւն ամենատարբեր ոլորտներում: Ո՞րն էք համարում ձեր ամենամեծ ձեռքբերումը որպէս քաղաքապետ:
ԶԱՐԵՀ ՍԻՆԱՆԵԱՆ.- Իմ ամենամեծ ձեռքբերումը համարում եմ այն, որ ստեղծեցի մի մթնոլորտ, որ մեր քաղաքացիներն առաւել կապուեն քաղաքապետարանի հետ, որ քաղխորհրդի անդամներն առաւել հասանելի դառնան բնակիչներին: Անձամբ ես հանդիպել եմ բոլոր նրանց, ովքեր ինձ դիմել են ամենատարբեր հարցերով: Միաժամանակ, ստեղծել եմ «Քաղխորհրդի նիստը ձեզ թաղամասում» նախաձեռնութիւնը, որի շրջանակներում 2-3 ամիսը մէկ անգամ քաղխորհրդի նիստն անցկացնում ենք քաղխորհրդի շէնքից դուրս, որեւէ թաղամասում: Այս ծրագիրն ուղղուած է հանրութեան ներգրաւուածութիւնը քաղաքային գործընթացներում մեծացնելուն:
Կը ցանկանայի նշել նաեւ իմ կողմից ներկայացուած մէկ այլ գաղափարի՝ բարձր տեխնոլոգիաների ինկուբատոր (թխսիչ-Խմբ.) ստեղծելու մասին: Քաղաքապետարանը տարածք եւ որոշ պայմաններ է տրամադրում, որպէսզի այս ոլորտի բիզնեսներ գրաւենք դէպի մեր քաղաք: Ուրախութեամբ պէտք է նշեմ, որ Գլենդելում ներկայում գործում են երկու խոշոր ստուդիաներ՝ «Դիզնի Անիմէյշըն»ն ու «Դրիմուորքս»ը:
ՆԱՆԷ ԱՒԱԳԵԱՆ.- Այս տարի յատկապէս, ինչպէ՞ս է Գլենդելը նշում Հայոց Ցեղասպանութեան 100ամեակը:
ԶԱՐԵՀ ՍԻՆԱՆԵԱՆ.- Գլենդելում միշտ էլ պատշաճօրէն յիշատակւում է Հայոց Ցեղասպանութիւնը: Այս տարի ձեռնարկների թիւն է շատացել: Առանձնայատուկ է «Բրենդ» գրադարանում 45 օր նախատեսուած ցուցադրութիւնը, որտեղ ներկայացուած են հայ դասական եւ ժամանակակից արուեստագէտների գործեր: Ապրիլի 26ին «Ալեքս» թատրոնում կը կայանայ Հայոց Ցեղասպանութեանը նուիրուած քաղաքապետարանի ամէնամեայ ձեռնարկը: Միաժամանակ, բազմաթիւ միջոցառումներ են տեղի ունենում դպրոցներում, Հանրային քոլեջում: Կը ցանկանայի նշել Քաղխորհդի այս տարուայ հռչակագրի մասին: Հայ Դատի յանձնախմբի հետ միասին որոշեցինք, որ այս տարի լինի ոչ միայն ամէն տարի հրապարակուող հռչակագիր, այլ՝ բանաձեւ, որ օրէնքի ուժ կ՛ունենայ: Քաղաքային խորհրդի հինգ անդամներն էլ կողմ քուէարկեցին եւ միաժամանակ կոչ ուղղեցին ԱՄՆ նախագահին՝ ճանաչելու Հայոց Ցեղասպանութիւնը: Սա էլ մեր լուման էր՝ ճանաչման գործին:
ՆԱՆԷ ԱՒԱԳԵԱՆ.- Պրն. Սինանեան, դուք շարունակելու էք ձեր գործունէութիւնը քաղաքապետարանում որպէս քաղխորհրդի անդամ: Ի՞նչ ծրագրեր ունէք:
ԶԱՐԵՀ ՍԻՆԱՆԵԱՆ.- Խօսելով առաջիկայ ծրագրերից, կը ցանկանայի անդրադառնալ հայկական թանգարանի ստեղծմանը Գլենդելում, որի նախագիծը հաստատուել է, եւ շուտով տեղի կ՛ունենայ հիմնարկէքը: Կարծում եմ, սա բեկումնային դեր կ՛ունենայ Հարաւային Կալիֆորնիայում մեր համայնքի ներկայացուածութեան առումով: Ապրիլի 28ին Գլենդելն ու Գիւմրին կը դառնան քոյր քաղաքներ, որն իմ նախաձեռնութիւնն է: Շարունակելու եմ ջանքերս, որ հայ աշխատակիցները պաշտպանուած լինեն եւ լաւ աշխատատեղեր ունենան:
ՆԱՆԷ ԱՒԱԳԵԱՆ.- Շնորհակալութիւն հարցազրոյցի համար. որպէս վերջաբան, ի՞նչ կոչ կ՛ուղղէք մեր համայնքին:
ԶԱՐԵՀ ՍԻՆԱՆԵԱՆ.- Աւելի ներգրաւուած լինել քաղաքային գործընթացներում, քանզի մեր համայնքը կրում է բոլոր որոշումների հետեւանքները: Միաժամանակ, կ՛ուզէի նշել, որ մեծ պատիւ է ինձ համար լինել Գլենդելի քաղաքապետ եւ ներկայացնել մեր համայնքի շահերը:
