ՆԱՆԷ ԱՒԱԳԵԱՆ
««Ֆերահեան»ը Արցախի համար», «Մենք Արցախն ենք», «1915ը տեղի է ունենում կրկին», «Կ՛անգնեցրէք շարունակուող ցեղասպանութիւնը», «Պահանջում ենք արդարութիւն», «Վերացրէք շրջափակումը», «Ձեռքներդ ետ քաշէք մեր հողերից«, «Ազգ-բանակ-յաղթանակ», «Մենք ուժեղ ենք միասին» կոչերով, պաստառներով ու Արցախի դրօշներով, Ֆերահեան Ազգային վարժարանի միջին եւ աւագ դասարանների շուրջ չորս հարիւր աշակերտ չորս մղոն քայլելով անցան Լոս Անջելեսի փողոցներով:
Ֆերահեանցիների նպատակն էր՝ իրազեկել հանրութեանը Արցախի շրջափակման մասին, պահանջել արդար լուծում եւ աջակցութիւն յայտնել Արցախի հայրենակիցներին:
Արցախը Հայաստանին կապող կեանքի ճանապարհի փակման եւ Արցախի՝ Ադրբեջանի կողմից շրջափակման 40րդ օրն անցկացուած «Քայլերթ Արցախի համար»ը մեկնարկեց Յունուար 20ին վարժարանից եւ ամփոփուեց շրջանի մարդաշատ այգիներից մէկում:
«Ադրբեջանը հարիւր քսան հազար բնակչի պահում է շրջափակման մէջ՝ արգելք հանդիսանալով սննդի եւ դեղորայքի մատակարարմանն արցախցիներին, բաժանելով բազմաթիւ ընտանիքների: Միջանցքի փակումը կործանարար ազդեցութիւն է ունեցել Արցախի տնտեսութեան եւ ամէնօրեայ կեանքի վրայ՝ ինչպէս նախատեսել էր Ադրբեջանի նախագահ Ալիեւը, որ պարբերաբար հրահանգում է անջատել նաեւ գազն ու էլեկտրականութիւնը ցուրտ ձմրան պայմաններում: Սա անընդունելի է, եւ պէտք է կասեցուի: Որպէս հայ համայնքի անդամներ, մեր պատասխանատուութիւնն է դիմագրաւել մեր եղբայրների եւ քոյրերի նկատմամբ իրականացուող այս դաժանութեանը: Մենք պէտք է մեր ձայնը բարձրացնենք ու պահանջենք, որ Ադրբեջանը յարգի Արցախում ապրող մարդկանց իրաւունքներն ու արժանապատուութիւնը: Մենք պէտք է իրազեկենք մեր հայրենակիցների իրավիճակի մասին՝ կապուելով Կոնգրեսում մեր ներկայացուցիչների հետ եւ Սպտակ տուն՝ պահանջելով պատժամիջոցներ կիրառել Ադրբեջանի դէմ՝ մարդու իրաւունքների կոպիտ խախտումների համար», յայտարարեց Սրբոց Նահատակաց Ֆերահեան Ազգային վարժարանի աւագ դպրոցի տնօրինուհի Սօսի Շանլեանը:
Կրթօջախի սանուհի Ամալեան էլ իր ելոյթում նշեց, որ վարժարանի աշակերտները հաւաքուել են, որ հանրութեանը տեղեկացնեն, թէ ինչ է կատարւում Արցախում: «Սա անարդար է, եւ համայն աշխարհը պէտք է միանայ մեզ ու վերջ տայ այս անարդարութեանը: Եկէ՛ք մեր ձայները բարձրացնենք եւ օգնենք մեր ժողովրդին», կոչ արեց աշակերտուհին:
«Մեր արմատներին, մեր պատմութեանը, մեր հայրենիքին» գրերով շապիկներ կրող Ֆերահեան վարժարանի աշակերտների պայքարի ոգին ի աջակցութիւն Արցախի ոգեւորիչ էր եւ յուզիչ: Տնօրինուհին նշեց, որ 44օրեայ պատերազմի արդիւնքներից յետոյ, իրենց սաների մօտ անտարբերութիւն էր նկատւում՝ պայմանաւորուած հիմնականում անորոշութեամբ:
«Անցեալ շաբաթ կազմակերպեցինք, որ աշակերտները հաւաքուեն ու հեռաձայնեն Սպիտակ տուն՝ պահանջելով, որ նախագահ Բայդենն անդրադառնայ Արցախում իրավիճակին եւ ջանքեր գործադրի վերացնելու շրջափակումը: Տեսնելով, թէ որքան խանդավառուած են մեր աշակերտներն ու թէ որքան մեծ է հայրենակիցներին աջակցելու ցանկութիւնը, որոշեցինք շարունակել Արցախի համար արշաւները: Այսօրուայ երթը, որին մասնակցում էին նաեւ մեր ուսուցիչներն ու բազմաթիւ ծնողներ, բաւական յաջող էր եւ կարծում եմ ծառայեց նպատակին», նշեց Շանլեանը:
Ֆերահեանի պատանիներն էլ հաւաստիացրեցին, որ շարունակելու են իրենց հնարաւորութիւնների սահմաններում անել հնարաւորը՝ աջակցելու հայրենակիցներին, եւ փոխանցեցին, որ իրենք Արցախի հետ են:
Պրավօ, աշակերտներ: Դուք շատ լաւ գործ մը ըրիք եւ լաւ ճամփայ մը բացիք: Ասանկ ցույցեր պէտք է որ ընեն մեր ամմէն աշակերտները, ոչ թէ մինակ հարիւրներով, հապա հազարներով պէտք է որ հաւագվին եւ քալեն , ամմէնուն ցցնելով որ Թիւրքիան եւ Ազերպայճանը ոճրագործ են, 100 տարի առաջ ըրածնին նորէն կընեն ուրիշ ձեվերով: Բոլորնիս պէտք է ամմէն քաղաքներու մէջը ասանկ ցոյցեր ընենք եւ մարդ եղողներուն հիշեցնենք որ Արցախին ինչեր կընէն 40 օրէ ի վեր: